រាជធានីភ្នំពេញ ៖ ក្រុមហ៊ុនវិនិយោគរួមគ្នាមួយឈ្មោះថា Chungkang Steel Structure (Cambodia) បន្ទាប់ពីដំណើរការបាន១ឆ្នាំ ដោយមានការគាំទ្រយ៉ាងខ្លាំងពីអតិថិជន និងការកើនឡើងខ្ពស់នៃតម្រូវការទីផ្សារ…
រាជធានីភ្នំពេញ ៖ ក្រុមហ៊ុនវិនិយោគរួមគ្នាមួយឈ្មោះថា Chungkang Steel Structure (Cambodia) បន្ទាប់ពីដំណើរការបាន១ឆ្នាំ ដោយមានការគាំទ្រយ៉ាងខ្លាំងពីអតិថិជន និងការកើនឡើងខ្ពស់នៃតម្រូវការទីផ្សារ បានសម្រេចចិត្តពង្រីកដំណាក់កាលទី២ ដោយបង្កើនសមត្ថភាពផលិតទ្វេដង ។
សូមបញ្ជាក់ថា ISI Group ដែលជាក្រុមហ៊ុនឈានមុខគេក្នុងវិស័យឧស្សាហកម្មផលិតដែកក្នុងប្រទេសកម្ពុជា រួមជាមួយនឹង Fuxin Steel Buildings (ដែលជាក្រុមហ៊ុនបុត្រសម្ព័ន្ធ ISI GROUP) បានចុះកិច្ចព្រមព្រៀងវិនិយោគរួមគ្នាជាមួយនឹង China Steel Structure Corporation (CSSC) ដែលជាក្រុមហ៊ុនដ៏ធំមួយមានជំនាញផ្នែកផលិតគ្រោងបង្គំដែករបស់តៃវ៉ាន់ និងក្រុមហ៊ុន Welhunt Materials Enterprise (WH) ដែលមានបទពិសោធន៍ជាង២៥ឆ្នាំ ក្នុងការធ្វើពាណិជ្ជកម្មអន្តរជាតិលើសម្ភារដែក ដើម្បីបង្កើតជាក្រុមហ៊ុនវិនិយោគរួមគ្នាមួយឈ្មោះថា Chungkang Steel Structure (Cambodia) ក្នុងឆ្នាំ ២០១៥ ។
ក្រុមហ៊ុនបានចាប់ផ្តើមប្រតិបត្តិការនៅក្នុងត្រីមាសទី១ នៃឆ្នាំ២០១៦ ជាមួយនឹងសមត្ថភាពក្នុងការផលិតចំនួន១៥០០តោនក្នុងមួយខែ។ បន្ទាប់ពីដំណើរការបាន១ឆ្នាំ ដោយមានការគាំទ្រយ៉ាងខ្លាំងពីអតិថិជន និងការកើនឡើងខ្ពស់នៃតម្រូវការទីផ្សារ បានធ្វើឲ្យក្រុមហ៊ុននេះ (Chungkang Steel Structure (Cambodia)) សម្រេចចិត្តពង្រីកដំណាក់កាលទី២ ដោយបង្កើនសមត្ថភាពផលិតទ្វេដង រហូតដល់ ៣០០០ តោនក្នុងមួយខែ ហើយវាបានសម្រេចជាស្ថាពរនៅត្រីមាសទី៤ នៃឆ្នាំ២០១៧។
ជាមួយគ្នានោះក្រុមហ៊ុន Fuxin Steel Buildings ដែលជាផ្នែកមួយរបស់ក្រុមហ៊ុន ISI Group បាននឹងកំពុងបន្តផ្ដោតលើការសាងសង់សំណង់ដែក (Pre-engineered Building) ដូចជា រោងចក្រ ឃ្លាំង និងសំណង់អគារចាប់ពីខ្នាតតូច រហូតដល់កម្រិតមធ្យម។ ដោយឡែកក្រុមហ៊ុនថ្មីតាមរយៈការវិនិយោគរួមគ្នានេះ កំពុងផ្ដោតទៅលើគ្រោងអគារដែកធ្ងន់ៗ ដូចជា អគារខ្ពស់ៗ មហាវិថី ស្ពាន និងរោងចក្រផលិតថាមពល។
លោក កាំង ឡេង អគ្គនាយករបស់ក្រុមហ៊ុន ISI Group បញ្ជាក់ថា៖ «យើងពិតជាមានសេចក្តីរីករាយ និងមានមោទនភាព ទាំងកម្រិតក្រុមហ៊ុន និងកម្រិតប្រទេសដែលធ្វើឲ្យក្រុមហ៊ុនដ៏សំខាន់ គឺCSSC ក្លាយជាដៃគូរបស់យើង»។
លោក Sun Chin I ជានាយកគ្រប់គ្រងនៃក្រុមហ៊ុន ChungKang Steel Structure (Cambodia) បានថ្លែងក្នុងសេចក្តីប្រកាសព័ត៌មានថា៖ «កាលពីឆ្នាំ២០១៤ ក្រុមហ៊ុន CSSC របស់យើងបានកំណត់ទិសដៅច្បាស់លាស់ក្នុងការពង្រីកខ្លួនចូលមកក្នុងតំបន់អាស៊ាន ហើយបានជ្រើសរើសទីក្រុងភ្នំពេញ ជាទីតាំងមូលដ្ឋាន និងជាទីស្នាក់ការកណ្តាលនៃការផលិតសម្រាប់ទីផ្សារប្រទេសកម្ពុជា និងដើម្បីចែកចាយទៅកាន់តំបន់ទាំងមូល។ យើងចង់ពង្រឹង និងពង្រីកតាមរយៈបណ្ដាញរបស់ ISI Group មិនមែនដើម្បីត្រឹមតែចង់ឲ្យក្លាយជាក្រុមហ៊ុនដែលធំជាងគេក្នុងប្រទេសទេ ប៉ុន្តែគឺជាក្រុមហ៊ុនឈានមុខគេក្នុងកម្រិតតំបន់។ ដោយមានការសហការរួមគ្នាជាមួយនឹងក្រុមហ៊ុន Fuxin Steel Buildings យើងបានសម្រេចនូវសមិទ្ធផលគួរឲ្យកត់សម្គាល់ជាច្រើន ជាក់ស្តែងគម្រោងចំណតរថយន្តដ៏ធំបំផុតក្នុងប្រទេសកម្ពុជា គឺAEON Mall 2៕
ចែករំលែកព័តមាននេះ