យុគសម័យនេះ មនុស្សភាគច្រើនជ្រើសរើសខុនដូសម្រាប់រស់នៅ ខណៈវាជាទ្រព្យមួយប្រភេទទៀតដែលទទួលបានការពេញនិយម ជាពិសេស អ្នកដែលត្រូវការភាពងាយស្រួលជាច្រើនយ៉ាង ។ ខុនដូមានទាំងប្រភេទ Low Rise ដែលមានកម្ពស់មិនលើសពី៨ជាន់…
យុគសម័យនេះ មនុស្សភាគច្រើនជ្រើសរើសខុនដូសម្រាប់រស់នៅ ខណៈវាជាទ្រព្យមួយប្រភេទទៀតដែលទទួលបានការពេញនិយម ជាពិសេស អ្នកដែលត្រូវការភាពងាយស្រួលជាច្រើនយ៉ាង ។ ខុនដូមានទាំងប្រភេទ Low Rise ដែលមានកម្ពស់មិនលើសពី៨ជាន់ និងប្រភេទ High Rise មានកម្ពស់លើស៨ជាន់ ។
មនុស្សជាច្រើនអាចនឹងមានឱកាសសម្រាប់ជ្រើសរើសខុនដូរស់នៅ ។ ការជ្រើសរើសខុនដូ គឺត្រូវមានការរើសជាន់ផងដែរ អ្នកខ្លះចូលចិត្តខុនដូមិនខ្ពស់ ប៉ុន្តែសម្រាប់អ្នកខ្លះវិញបែរជាចូលចិត្តរស់នៅខុនដូខ្ពស់ៗ ។ តើខុនដូខ្ពស់ៗទាំងនេះមានគុណសម្បត្តិ និង
គុណវិបត្តិខុសគ្នាដូចម្តេចខ្លះ ?
*គុណសម្បត្តិ ៖
១-ខុនដូជាន់ខ្ពស់មានទេសភាពស្អាត បរិយាកាសល្អ និងកម្លាំងខ្យល់ខ្លាំង ៖
កាន់តែរស់នៅខុនដូជាន់ខ្ពស់កាលណា ទស្សនីយភាព និងទេសភាពផ្សេងៗកាន់តែស្អាត ដោយយើងអាចមើលឃើញទិដ្ឋភាពបានទូលំទូលាយ និងច្បាស់ ។ បើអ្នកជ្រើសរើសបន្ទប់នៅផ្នែកដែលគ្មានអគារខ្ពស់បាំង ខុនដូជាន់ខ្ពស់នឹងកាន់តែបង្ហាញទេសភាពប្រណីត ជាពិសេស ចាប់ជាន់ទី១០-២០ ។
២-បរិយាកាសបរិសុទ្ធ ស្រស់ស្រាយ និងមានអូហ្សូនពេញៗ ៖
ជាន់នេះមានខ្យល់អាកាសល្អបរិសុទ្ធជាងជាន់ក្រោម ព្រមទាំងមានអូហ្សូនពេញ។ នៅជាន់នេះនឹងមានខ្យល់បរិសុទ្ធចូលមកគ្រប់ពេលវេលា បើជាពេលព្រឹកវិញ ជាន់នេះមានខ្យល់អាកាសបរិសុទ្ធស្រស់ស្រាយជារៀងរាល់ព្រឹក ។
៣-សារជាតិពុលនៅជាន់ខ្ពស់ គឺតិចជាងជាន់ក្រោម ៖
ជាពិសេស ខុនដូមានទីតាំងនៅកណ្តាលក្រុង បរិមាណធូលី ឬបរិយាកាសកខ្វក់ចេញពីកន្លែងផ្សេងៗដូចជា បំពង់ផ្សែង ឬដីនៅតាមផ្លូវ បើខុនដូកាន់តែខ្ពស់ប៉ុនណា យើងនឹងអាចចៀសវាងបរិយាកាសកខ្វក់ទាំងនេះកាន់តែខ្លាំងឡើង ។
៤-ជាន់ខ្ពស់គ្មានមូស និងសត្វល្អិតរំខាន ៖
គ្មានបញ្ហារំខានចិត្តពាក់ព័ន្ធនឹងរឿងស្រមោច មូស កន្លាត ។ល។ ព្រោះសត្វទាំងនេះ ភាគច្រើនតែងប្រទះឃើញនៅក្នុងខុនដូជាន់ទាបប៉ុណ្ណោះ ។
៥-ជាន់ខ្ពស់ស្ងប់ស្ងាត់ និងមានភាពផ្ទាល់ខ្លួន ជាង ៖
ខុនដូនៅជាន់ទាបៗ អ្នកអាចទទួលនូវផលប៉ះពាល់ពីសំឡេងរំខាន ដូចជា សំឡេងចរាចរនៅតាមផ្លូវ, សំឡេងពីទីប្រជុំជននៅម្តុំនោះ និងសំឡេងរំខានពីអ្នកជិតខាង ដូច្នេះ បើអ្នករស់នៅខុនដូជាន់ខ្ពស់ៗ បញ្ហាទាំងនេះនឹងត្រូវបានកាត់បន្ថយយ៉ាងច្រើន ។
*គុណវិបត្តិ ៖
១-បន្ទប់យន្តប្រើមិនបានពេលដាច់ភ្លើង ៖
វាជាបញ្ហាមួយដែលត្រូវជួបប្រទះ ព្រោះថា គ្មានគម្រោងណាដែលភ្លើងមិនរលត់ទេ គឺត្រូវមានហេតុការណ៍ភ្លើងដាច់ក្នុងពេលណាមួយ។ បើអ្នករស់នៅក្នុងខុនដូជាន់ខ្ពស់ៗហើយមានភ្លើងដាច់ បើរង់ចាំមិនបាន គឺត្រូវដើរចុះតាមជណ្តើរជំនួស ទម្រាំនឹងចុះមកដល់ដី គឺនឿយហត់ខ្លាំង ខណៈខុនដូជាន់ក្រោមងាយស្រួលជាង ក្នុងករណីដាច់ភ្លើង ។
២-ជាន់ខ្ពស់ប្រើពេលយូរជាងក្នុងការរង់ចាំបន្ទប់យន្ត ៖
សម្រាប់អ្នកណាដែលជ្រើសរើសរស់នៅខុនដូជាន់ខ្ពស់ ក្នុងពេលទៅធ្វើការ គឺពួកគេត្រូវភ្ញាក់ពីព្រឹកមុនអ្នកដទៃ ព្រោះបើមិនដូច្នោះទេ នឹងត្រូវរង់ចាំបន្ទប់យន្តយូរជាងធម្មតា ហើយបើគម្រោងខ្លះមានបន្ទប់យន្តតែ១ ថែមទាំងថ្ងៃនោះមានអ្នកផ្លាស់មករស់នៅថែមទៀត ឬមានអ្នករើចេញពីទីនេះ គឺត្រូវរង់ចាំយូរ ។ ផ្ទុយមកវិញ អ្នករស់នៅជាន់ក្រោមមិនលំបាកទេ ដោយពួកគេគ្រាន់តែជ្រើសរើសដើរចុះតាមជណ្តើរផង និងហាត់ប្រាណផង។
៣-នៅជាន់ក្រោមមានសេវាទូរស័ព្ទល្អជាងជាន់ខ្ពស់ ៖
មនុស្សភាគច្រើនតែងធ្លាប់ជួបបញ្ហានៅពេលពួកគេឡើងទៅជាន់លើ គឺសេវាទូរស័ព្ទស្ទើរតែគ្មាន ដោយសារសេវាខ្លះត្រូវបានបញ្ជូនមកក្នុងកម្រិតមិនខ្ពស់ប៉ុន្មាន ដើម្បីឲ្យសេវាខ្លាំងៗបែកខ្ចាយបានទូលាយ ។ ដូច្នេះ ធ្វើឲ្យសេវាចែកចាយមិនបានទៅដល់ទីខ្ពស់ ឬជាន់ខាងលើមានសេវាខ្សោយ ខណៈតាមជាន់នីមួយៗមានចំនួនបន្ទប់ច្រើន ដែលធ្វើឲ្យសេវាចូលទៅមិនបានដល់ទូរស័ព្ទរបស់អ្នក ។
៤-ខុនដូជាន់ខ្ពស់មានតម្លៃថ្លៃជាងជាន់ក្រោម ៖
ទោះបីជាខុនដូជាន់ខ្ពស់មានទេសភាពស្រស់ស្អាត បរិយាកាសល្អ និងភាពផ្ទាល់ខ្លួនច្រើនជាងជាន់ក្រោមក្តី ប៉ុន្តែវាតែងមានតម្លៃខ្ពស់ជាង។ ពេលខ្លះ វាអាចមានតម្លៃខ្ពស់ជាង២-៣ដងឯណោះ ហើយជាន់លើនេះតែងមានឈ្មួញកណ្តាល ឬក្រុមហ៊ុនអចលនទ្រព្យជាច្រើនទិញយកអស់ ហេតុនេះ វាធ្វើឲ្យមានតម្លៃមានឱកាសឡើងខ្ពស់ទៀត ៕
ចែករំលែកព័តមាននេះ