ខេត្តស្វាយរៀង ៖ ផ្ទះឈើលើថ្មក្រោមដំបូលប្រក់ស័ង្កសី ជញ្ជាំងក្ដារត្រូវបានអគ្គិភ័យលេបត្របាក់អស់ទាំងស្រុងទាំងកណ្ដាលរាត្រី នៅវេលាម៉ោង០១និង៤៥នាទីរំលងអធ្រាត្រ ឈានចូលថ្ងៃទី០៦ ខែមីនា ឆ្នាំ២០១៨ នេះស្ថិតនៅក្នុងភូមិមេភ្លើង សង្កាត់ស្វាយរៀង ក្រុងស្វាយរៀង ។
យោងតាមសមត្ថកិច្ចបានឱ្យដឹងថា ហេតុការណ៍ នៃគ្រោះអគ្គិភ័យនេះបង្កឡើងដោយសារការឆ្លងចរន្តអគ្គិសនី ពីបន្ទប់ផ្នែកខាងលើ ហើយបង្កជាអណ្ដាតភ្លើងបានឆេះរាលដាលរហូតដល់ដំបូលផ្ទះ និងតួផ្ទះទាំងមូលតែម្តង ។ បើតាមម្ចាស់ផ្ទះឈ្មោះ ប្រាក់ សុផាត ភេទប្រុស អាយុ ៦០ឆ្នាំ មុខរបរលាងម៉ូតូ មានទីលំនៅភូមិឃុំកើតហេតុខាងលើ បានឲ្យដឹងថា ផ្ទះដែលត្រូវអគ្គិភ័យលេបត្របាក់នោះមានទំហំ៧ម៉ែត្រគុណនឹង៩.៥ម៉ែត្រសង់អំពីឈើថ្មក្រោមដំបូលប្រក់ស័ង្កសី ជញ្ជាំងក្តារ ហើយនៅមុនពេលកើតហេតុនោះ រូបគាត់ និងក្រុមគ្រួសារបានសម្រាន្តលង់លក់ ស្រាប់តែមានផ្សែងហុយចេញពេញផ្ទះបង្កឲ្យមានការភ្ញាក់ផ្អើល និងដាស់គ្នាឡើងរួចទូរស័ព្ទរាយការណ៍ទៅសមត្ថកិច្ច ដើម្បីសុំជួយអន្តរាគមន៍ជួយយករថយន្តពន្លត់អគ្គិភ័យមកបាញ់ទឹកពន្លត់ ក៏ប៉ុន្តែអ្វីៗវាហួសពេលទៅហើយ គឺគ្រាន់តែគ្រប់គ្រង់បានមិនឆេះរាលដាលទៅដល់ផ្ទះអ្នកដ៏ទៃ ។
ហើយក្នុងនោះសមត្ថកិច្ចក្រុងស្វាយរៀង បានប្រើប្រាស់រថយន្តពន្លត់អគ្គិភ័យអស់ចំនួន៣គ្រឿង គឺរថយន្តរបស់ស្នងការដ្ឋាននគរបាលខេត្តស្វាយរៀងចំនួន២គ្រឿង និងរថយន្តពន្លត់អគ្គិភ័យរបស់កងរាជអាវុធហត្ថខេត្តមួយគ្រឿងធ្វើការពន្លត់ជាង២ម៉ោងទើបគ្រប់គ្រង់សភាពការបានតែវាឆេះអស់ទៅហើយសល់តែគ្រោងឆ្អឹង ។ ហើយទំហំនៃការខូចខាតយើងពុំទាន់ដឹងថា ខូចខាតទ្រព្យសម្បត្តិអស់ប៉ុន្មាននៅឡើយនោះទេ គឺឆេះហ្មត់ទៅហើយ ម្ចាស់ផ្ទះយកបានតែទ្រព្យសម្បត្តិបន្តិចបន្តួចប៉ុណ្ណោះ ៕
ចែករំលែកព័តមាននេះ