ខេត្តកំពង់ឆ្នាំង ៖ ក្នុងឱកាសចុះសាកសួរសុខទុក្ខ ដល់សិក្ខាកាមជានាយ នាយទាហានរង របស់សាលាយោធភូមិភាគពិសេស ដែលកំពង់ហ្វឹកហាត់បាញ់គ្រាប់ពិត នៅជើងភ្នំជើងលៀង ហៅភ្នំថ្មស ស្ថិតក្នុងភូមិកោះខ្ទម្ភ ឃុំជៀប ស្រុកទឹកផុស កាលពីរសៀលថ្ងៃទី០៥ ខែមីនា ឆ្នាំ២០១៨ លោកស្រី កែវ ចន្ទ័មុនី អ្នកតំណាងរាស្ត្រមណ្ឌលកំពង់ឆ្នាំង អមដំណើរដោយលោកស្រីអភិបាលខេត្តរង លោកស្រីក្រុមប្រឹក្សាខេត្ត និងលោកស្រីភរិយាអភិបាលខេត្ត បានថ្លែងថា អ្នកនៅសមភូមិក្រោយ សូមគោរព និងកោតសរសើរនូវវីរៈភាពរបស់បងប្អូនកងទ័ព ដែលកំពុងហ្វឹកហាត់នៅទីនេះយ៉ាងលំបាក ដើម្បីត្រៀមទៅឈរជើងការពារជាតិមាតុភូមិរបស់យើងពីសត្រូវឈ្លានពាន ។
លោកស្រីបានបន្តថា ថ្ងៃនេះយើងទាំងអស់គ្នាដែលជាអ្នកនៅសមរភូមិក្រោយ សូមនាំយកនូវអំណោយ ទឹកសុទ្ធ ក្រមា និងថវិការមួយចំនួន មកផ្តល់ជូនបងប្អូនកងទ័ព ដែលកំពុងហ្វឹកហាត់នៅទីនេះ ថ្វីបើអំណោយទាំងនេះតិចតួចក៏ពិតមែន តែបានបង្ហាញនូវការសាមគ្គីភាព រវាងសមរភូមិមុខ និងសមរភូមិក្រោយ ។ ជាមួយគ្នានេះដែរ យើងខ្ញុំទាំងអស់គ្នា ដែលជាអ្នកនៅសមរភូមិក្រោយ សូមគោរពត្រងត្រាប់នៅគំរូវីរៈភាពរបស់បងប្អូនកងទ័ព ហើយប្រែក្លាយពីការគោរពនេះ នឹងខិតខំធ្វើការងារនៅសមរភូមិក្រោយ ដើម្បីបុព្វហេតជាតិ ដើម្បីបុព្វហេតុសុខសន្តិភាព និងបុព្វហេតុការអភិវឌ្ឍន៍ជាតិមាតុភូមិរបស់យើង ។ ថ្ងៃនេះក៏ជាថ្ងៃប្រារព្ធខួបលើកទី១០៧ នៃថ្ងៃទិវាសិទ្ធនារីអន្តរជាតិ៨មីនា ដែលតាមមន្ទីរអង្គភាពនានា ក្នុងខេត្តកំពុងប្រារព្ធធ្វើជាបន្តបន្ទាប់ ។ ជាមួយគ្នានេះក្រសួងកិច្ចការនារី បានកំណត់យកកត្តា៣យ៉ាងដើម្បីឲ្យការគោរពទិវាសិទ្ធនារីមានប្រសិទ្ធភាពកាន់តែខ្លាំងក្លាជាងនេះ គឺទី១.ត្រូវមានការចូលរួមជួបជុំប្រារព្ធទិវា៨មីនា នៅតាមអង្គភាពរៀងៗខ្លួន ទី២.ត្រូវចងបដាពាក្យស្លោកនានា ពាក់ព័ន្ធដល់ទិវា៨មីនា, ការគោរពសិទ្ធស្ត្រី និងកុមារ ស្ត្រីត្រូវមានឱកាស និងទី៣.ចុះសាកសួរសុខទុក្ខស្ត្រីសម្រាកព្យាបាលតាមន្ទីរពេទ្យ កុមាកំព្រា និងគ្រួសារកងទ័ព និងកងទ័ពជាដើម ។
ជាក់ស្តែងថ្ងៃនេះ លោកស្រី ដែលជាថ្នាក់ដឹកនាំខេត្ត ដែលជាស្ត្រីបានចុះសាកសួរសុខទុក្ខដល់បងប្អូន កងទ័ពដល់ទីនេះ សបញ្ជាក់ថា នេះជាការយកចិត្តទុកដាក់របស់ថ្នាក់ដឹកនាំដែលជាអ្នកនៅសមរភូមិក្រោយ ចំពោះអ្នកសមរភូមិមុខ ដែលមិនអាចខ្វះបាន ។ ជាមួយគ្នានេះដែរ ថ្នាក់ដឹកនាំខេត្តសូមផ្តល់ជូននូវក្រមាចំនួន៤០០ក្រមា ទឹកសុទ្ធ១០០កេស និងថវិការរបស់ លោកឧកញ៉ា កុយ សុវណ្ណ ចំនួន៤លានរៀលផងដែរ ។
យោងតាមរបាយការរបស់លោកឧត្តមសេនីយ៍ទោ ធន ធឿន មេបញ្ជារការតំបន់ប្រតិបត្តិការសឹករងកំពង់ឆ្នាំង បានឲ្យដឹងថា សិក្ខាកាមដែលកំពុងហ្វឹកហាត់នៅសាលាយោធភូមិភាគពិសេសនៅពេលនេះ មានចំនួន៣០០នាក់ ក្នុងនោះមកពីខេត្តកំពង់ធំចំនួន១៩១នាក់ និងក្រៅពីនោះមានមកពីខេត្តកណ្តាល រាជធានីភ្នំពេញ និងកំពង់ឆ្នាំង ។ ពេលចប់វគ្គសិស្សនាយនាយទាហានរងទាំងនេះ និងចូលបំពេញក្រមខណ្ឌ ក្នុងភូមិភាគ១ ដែលកំពុងឈរជើងការពារបូរណៈភាពទឹកដី នៅខេត្តស្ទឹងត្រែង ៕
ចែករំលែកព័តមាននេះ