ខេត្តស្ទឹងត្រែង ៖ គ្រួសារកងទ័ពកងពលតូចអន្តរាគមន៍១២៨ យោភូមិភាគទី១ និងប្រជាពលរដ្ឋជាង១,០០០នាក់ បានទទួលការពិនិត្យ និងព្យាបាលជំងឺពីសំណាក់ក្រុមវេជ្ជសាស្ត្រសម្តេចតេជោ ដឹកនាំដោយលោកស្រី ហ៊ុន ម៉ាណា…
ខេត្តស្ទឹងត្រែង ៖ គ្រួសារកងទ័ពកងពលតូចអន្តរាគមន៍១២៨ យោភូមិភាគទី១ និងប្រជាពលរដ្ឋជាង១,០០០នាក់ បានទទួលការពិនិត្យ និងព្យាបាលជំងឺពីសំណាក់ក្រុមវេជ្ជសាស្ត្រសម្តេចតេជោ ដឹកនាំដោយលោកស្រី ហ៊ុន ម៉ាណា ។
នៅព្រឹកថ្ងៃទី០៤ ខែមីនា ឆ្នាំ២០១៨ នេះ លោកស្រី ហ៊ុន ម៉ាណា បានដឹកនាំក្រុមវេជ្ជសាស្ត្រសម្តេចតេជោ ចុះពិនិត្យព្យាបាលជំងឺជូនប្រជាពលរដ្ឋ និងគ្រួសារកងទ័ពដោយឥតគិតថ្លៃ នេះបានធ្វើឡើងបរិវេណវរសេនាតូចអន្តរាគមន៍២៨៣ កងពលតូចអន្តរាគមន៍១២៨ យោភូមិភាគទី១ ស្រុកសៀមប៉ាង ខេត្តស្ទឹងត្រែង ។
លោកស្រី ហ៊ុន ម៉ាណា បានមានប្រសាសន៍ថា សកម្មភាពដែលកំពុងអនុវត្តន៍នៅពេលនេះ គឺជាយកចិត្តទុកដាក់របស់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានឲ្យក្រុមវេជ្ជសាស្ត្រចុះពិនិត្យ និងព្យាបាលប្រជាពលរដ្ឋជូនប្រជាពលរដ្ឋ ។ សកម្មភាពមនុស្សធម៌នេះ គឺជាការចូលរួមចំណែកជាមួយរាជរដ្ឋាភិបាលកម្ពុជា ក្នុងការបម្រើសេវាសុខាភិបាល បង្ខិតឲ្យនៅជិតប្រជាពលរដ្ឋ ដើម្បីសម្រាលទុក្ខលំបាកដល់ពួកគាត់ ។
ការពិនិត្យពិគ្រោះ និងព្យាបាលជំងឺដោយឥតគិតថ្លៃនោះ រួមមានវះកាត់តូចចំនួន៣៨នាក់, ពិនិត្យ និងព្យាបាលមាត់ធ្មេញចំនួន៩៤នាក់, ពិនិត្យរោគស្ត្រី៧១នាក់, ពិនិត្យ និងព្យាបាលជំងឺទូទៅចំនួន៧៦២នាក់, សម្ភព និងអេកូសាស្ត្រ ចំនួន៨៣នាក់, ផ្តល់វែនតាចំនួន៣០០គ្រឿង ផ្តល់ថ្នាំសម្លាប់សត្វល្អិតជូនប្រជាពលរដ្ឋ, អប់រំសុខភាពដល់ប្រជាជនដែលមកទទួលសេវាព្យាបាលជាច្រើននាក់ផងដែរ ។
លោកឧត្តមសេនីយ៍ទោ មៀច សាមុត មេបញ្ជារកងពលតូចអន្តរាគមន៍លេខ១២៨ យោភូមិភាគទី១ តំណាងឲ្យប្រជាពលរដ្ឋនិងក្រុមគ្រួសារកងទ័ពបានថ្លែងអំណរគុណ ចំពោះក្រុមវេជ្ជសាស្ត្រសម្តេចតេជោ ដែលបានចុះពិនិត្យជំងឺទូទៅ ជាពិសេសថ្លែងអំណរគុណចំពោះ សម្តេចអគ្គមហាសេនាបតីតេជោ ហ៊ុន សែន និងលោកសម្តេចកិតតិព្រឹទ្ធបណ្ឌឹត ដែលជានិច្ចកាល សម្តេចទាំងទ្វេតែងតែគិតគូចំពោះសុខភាពរបស់នាយទាហាន នាយទាហានរង និងពលទាហាន កងកម្លាំងប្រដាប់អាវុធ រួមទាំងក្រុមគ្រួសាប្រជាពលរដ្ឋ ដោយបានបញ្ជូនក្រុមគ្រូពេទ្យមកព្យាបាលជំងឺជូនពួកគាត់ ដោយឥតគិតថ្លៃ ជាការចូលរួមកាត់បន្ថយលើការចំណាយរបស់ពួកគាត់ បានមួយគ្រាសម្រាប់ការថែទាំសុខភាព ៕
ចែករំលែកព័តមាននេះ