ខេត្តបន្ទាយមានជ័យ ៖ ជនរងគ្រោះដែលជិះម៉ូតូបុកគូថរថយន្តសណ្តោងរបស់ថៃលើដងផ្លូវជាតិលេខ5 មុខស្ថានីយ៍ដឹកអ្នកដំណើរអន្តរជាតិស៊ូជិង ក្នុងភូមិអណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែត កាលពីយប់ថ្ងៃទី3 ខែមីនា ត្រូវបានស្គាល់អត្តសញ្ញាណហើយ គឺជាប្រជាការពារភូមិ។
ជនរងគ្រោះខាងលើឈ្មោះ អ៊ុំ សុខន ភេទប្រុស អាយុ67ឆ្នាំ មុខរបរប្រជាការពារភូមិ រស់នៅក្នុងភូមិអូរជ្រៅ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
បើតាមនគរបាលចរាចរណ៍បានបញ្ជាក់ថា ដោយសារមានការសហការពីមន្ទីរសាធារណការ និងដឹកជញ្ជូនខេត្ត ជួយឆែកមើលស្លាកលេខម៉ូតូ ទើបស្គាល់អត្តសញ្ញាណជនរងគ្រោះ។ ចំណែកមូលហេតុ គឺដោយសារជនរងគ្រោះចេញក្រៅមិនបានយកឯកសារណាមួយដាក់ជាប់ខ្លួន ម្យ៉ាងគ្មានទាំងទូរស័ព្ទទៀត។
តាមសមត្ថកិច្ចជំនាញនៃអធិការដ្ឋាននគរបាលក្រុងប៉ោយប៉ែតប្រាប់ថា សពរងគ្រោះពេលនេះ ត្រូវបានក្រុមគ្រួសារ និងសាច់ញាតិយកទៅលំនៅដ្ឋាន ដើម្បីធ្វើបុណ្យតាមប្រពៃណីហើយ ។
គួររំលឹកថា បុរសម្នាក់បានស្លាប់នៅនិងកន្លែងដោយសារម៉ូតូបុកគូថរថយន្តសណ្តោងរបស់ថៃដែលចតស្ងៀម ហេតុការណ៍នេះកើតឡើងកាលពីម៉ោង06និង50នាទីល្ងាច ថ្ងៃទី03 មីនា លើដងផ្លូវជាតិលេខ5 មុខស្ថានីយដឹកអ្នកដំណើរអន្តរជាតិស៊ូជីង ក្នុងភូមិអណ្តូងថ្មមាស សង្កាត់ផ្សារកណ្តាល។ មុនពេលកើតហេតុជនរងគ្រោះជិះម៉ូតូម៉ាកហុងដាឌ្រីម សេ125ពណ៌ខ្មៅ ពាក់ស្លាកលេខបន្ទាយមានជ័យ 1Q.2514 មកពីខាងលិច លុះដល់ចំណុចកើតហេតុក៏បុកគូទរថយន្តសណ្តោង ពាក់ស្លាកលេខ Thailand 70-1437 ដែលចតស្ងៀម បណ្តាលឲ្យជនរងគ្រោះស្លាប់នៅនិងកន្លែងតែម្តង ចំណែកអ្នកបើកបររថយន្តថៃបានគេចខ្លួនបាត់៕
ចែករំលែកព័តមាននេះ