រាជធានីភ្នំពេញ ៖ យុវជនម្នាក់បានផឹកស្រាស្រវឹងជោគជាំ ហើយបានបើកបររថយន្តដឹកមាន់១គ្រឿងជ្រុលទៅបុករថយន្ត១គ្រឿងទៀត ដែលម្ចាស់ចតទុកស្ងៀម បណ្ដាលឲ្យរងការខូចខាតយ៉ាងដំណំ បន្ទាប់មកបានកៀរលោកតាអាចារ្យម្នាក់បណ្ដាលឲ្យរងរបួសជើង រួចជ្រុលទៅបុកចូលឱសថ និងភេសជ្ជមួយកន្លែងទៀត ។ ហេតុការណ៍នោះបានកើតឡើងកាលពីវេលាម៉ោង១១និង៣០នាទីថ្ងៃត្រង់ ថ្ងៃទី០២ ខែមិនា ឆ្នាំ២០១៨ នៅលើកំណាត់ផ្លូវវ៉េងស្រេង ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ ។
រថយន្តដឹកមាន់បង្កហេតុ១គ្រឿងនោះពណ៌ស ពាក់ស្លាកលេខភ្នំពេញ 2W-9364 បានបើកបរដោយយុវជនម្នាក់ឈ្មោះ ហោង រ៉ាង អាយុ២២ឆ្នាំ មានស្រុកកំណើតនៅក្នុងភូមិរកា ឃុំរកា ស្រុកកណ្តាលស្ទឹង ខេត្តកណ្ដាល ។ ដែលបានរេចង្កូតជ្រុលទៅបុករថយន្ត១គ្រឿងទៀត ពណ៌ខ្មៅ ពាក់ស្លាកលេខ ភ្នំពេញ 2AC-3579 ដែលកំពុងចតស្ងៀមរួច ទើបបុកចូលឱសថស្ថាន និងលក់ភេសជ្ជ ប៉ុន្តែមិនបានបណ្ដាលឲ្យអ្នកនៅក្នុងនោះរងគ្រោះឡើយ ។
ចំណែកលោកតាអាចារ្យរងគ្រោះ ឈ្មោះ នួន ផាន អាយុ៥៩ឆ្នាំ ស្នាក់ក្នុងសង្កាត់ស្ទឹងមានជ័យ និងមានស្រុកកំណើតនៅជិតវត្តប្រហ៊ូត ស្រុកមេសាងខេត្តព្រៃវែង រងរបួសជើង ។
អ្នកឃើញហេតុការណ៍បានឲ្យដឹងថា នៅមុនពេលកើតហេតុពួកគាត់បានឃើញរថយន្តបង្កបានបើកបរធ្វើដំណើរក្នុងទិសដៅពីកើតទៅលិចក្នុងស្ថានភាពរេពេញផ្លូវ ។ លុះពេលទៅដល់ត្រង់ចំណុចកើតហេតុខាងលើស្រាប់តែរេចង្កូតជ្រុលទៅបុករថយន្តពណ៌ខ្មៅ កំពុងឈប់ចតស្ងៀម បណ្ដាលឲ្យរងការខូចខាត រួចជ្រុលទៅកៀរលោកតាអាចារ្យ បណ្ដាលឲ្យរងរបួស ។ បន្ទាប់មកបានរថយន្តមិនបានឈប់នោះឡើយ ក៏ជ្រុលទៅបុកចូលឱសថស្ថាន និងលក់ ។
ក្រោយមកអ្នកបើកបរត្រូវរថយន្តបង្កត្រូវបានប្រជាពលរដ្ឋនាំគ្នាដេញចាប់បានប្រគល់ជូននគរបាល ដើម្បីសួរនាំ និងចាត់ការតាមច្បាប់ ៕
ចែករំលែកព័តមាននេះ