ខេត្តកំពង់ចាម ៖ រថយន្តក្រុងដឹកអ្នកដំណើររបស់ក្រុមហ៊ុនមួយ បានជួបហេតុការណ៍គ្រោះថ្នាក់ចរាចរណ៍នៅលើផ្លូវជាតិលេខ៦ ត្រង់ចំណុចភូមិបែកពាង ឃុំជាលា ស្រុកបាធាយ ។ ហេតុការណ៍នោះកើតឡើងនៅវេលាម៉ោង១និង៣០នាទីយប់ រំលងអាធ្រាតឈានចូលព្រឹកថ្ងៃទី២៧ ខែកុម្ភៈ ឆ្នាំ២០១៨ ។
រថយន្តដឹកទំនិញធុនយក្សយីឌុប១គ្រឿងដឹកទំនិញ ដែលបើកបរក្នុងទិសដៅច្រាសទិសគ្នា បណ្តាលឲ្យអ្នកបើកបររថយន្តក្រុងស្លាប់ភ្លាមៗ និងអ្នកដំណើរអង្គុយពីខាងក្រោយរងរបួសធ្ងន់ស្រាលចំនួន១៩
នាក់ ដែលមានខ្មែរ និងបរទេសត្រូវបានបញ្ជូនទៅសង្គ្រោះនៅរាជធានីភ្នំពេញទាំងយប់ ។
លោកវរសេនីយ៍ត្រី សុខ សូល អធិការរងនគរបាលស្រុកបាធាយទទួលផែនសណ្តាប់ធ្នាប់ប្រាប់ឲ្យដឹងថា រថយន្តក្រុងដឹកអ្នកដំណើរបើកបរដោយឈ្មោះ កែវ សាវុធ ភេទប្រុស អាយុ៣៧ឆ្នាំ នៅភូមិជ្រលង
ឃុំប្រាសាទ ស្រុកកំពង់ត្របែក ខេត្តព្រៃវែង ។ ដែលបានដឹកអ្នកដំណើរមានខ្មែរ និងបរទេសចេញពីខេត្តសៀមរាបក្នុងគោលដៅឆ្ពោះមកកាន់រាជធានីភ្នំពេញ ស្របពេលមកដល់ត្រង់ភូមិបែកពាង ខាងលើដែលជាកន្លែងងងឹតក៏បានបុកជាមួយនឹងរថយន្តយីឌុប ដែលពាក់ស្លាកលេខព្រះសីហនុ
3A-2983 ដឹកទំនិញដែលបានបើកពីជើងមកត្បូង និងបម្រុងបត់ត្រឡប់ក្រោយនោះ ។
លោកអធិការរងទទួលផែនសណ្តាប់ធ្នាប់បន្តថា សម្លេងបុកបានលាន់ឮជាខ្លាំង ដែលជាហេតុធ្វើ
ឲ្យរថយន្តក្រុងរងការខូចខាតខាងមុខយ៉ាងដំណំ ហើយបានស្លាប់អ្នកបើកបរភ្លាមៗ និងអ្នកដំណើរអង្គុយពីក្រោយបានរងរបួសដល់ទៅ១៩នាក់ ក្នុងនោះស្រី១០នាក់ និងជនជាខ្មែរ០៤នាក់ (របួសធ្ងន់០៣នាក់) ជនជាតិថៃ០៣នាក់(របួសធ្ងន់០១ និងស្រាល០២នាក់) ជនជាតិអាឡឺម៉ង០៤នាក់ក្នុងនោះស្រីម្នាក់(របួសស្រាល) ជនជាតិអ៊ីស្រាអ៊ែល០២នាក់ (ស្ត្រីទាំងពីររបួសស្រាល) ជនជាតិចិនម្នាក់របួសធ្ងន់ សរុបអ្នករបួសធ្ងន់០៦នាក់ ស្រាល១៣នាក់ ហើយខូចខាតរថយន្តកម្រិតធ្ងន់ទាំង០២គ្រឿង ។
លោកវរសេនីយ៍ត្រី សុខ សូល អធិការរងទទួលផែនសណ្តាប់ធ្នាប់បន្ថែមថា ក្រោយពេលកើតហេតុ
កម្លាំងសមត្ថកិច្ចបានចុះទៅដល់ ដោយបានហៅរថយន្តសង្គ្រោះបន្ទាន់ មកដឹកអ្នករងគ្រោះយកមក
សង្គ្រោះនៅមន្ទីរពេទ្យបង្អែកស្រុកបាធាយ បន្ទាប់ក៏បញ្ជូនមកសង្គ្រោះនៅរាជធានីភ្នំពេញជាបន្ត
បន្ទាប់ ។ អ្នកបើកបររថយន្តដឹកទំនិញវិញ បានបើកទ្វាររថយន្តរត់គេចខ្លួនបាត់ មុនពេលដែលសមត្ថកិច្ចបានចុះទៅដល់ ។
រហូតដល់ភ្លឺច្បាស់ទើបជំនាញចរាចរណ៍ស្រុកបានរករថយន្តស្ទូច អូសយករថយន្តទាំង២គ្រឿង មករក្សាទុកនៅអធិការដ្ឋាននគរបាលស្រុកបាធាយ ដើម្បីធ្វើការស្រាវជ្រាវដោះស្រាយតាមច្បាប់ ៕
ចែករំលែកព័តមាននេះ