រាជធានីភ្នំពេញ ៖ ក្រោមគ្រោងការណ៍ជំនួយឧបត្ថម្ភឥតសំណងសម្រាប់គម្រោងរបស់អង្គការក្រៅរដ្ឋាភិបាលជប៉ុន កាលពីថ្ងៃទី២៣ កុម្ភៈ កន្លងមក រដ្ឋាភិបាលជប៉ុនបានឯកភាពផ្ដល់ថវិកាចំនួន១.១៣១.៥៤៧ដុល្លារដល់អង្គការចំនួន២ ដែលកំពុងបំពេញបេសកកម្មដោះមីន និងគ្រាប់យុទ្ធភណ្ឌមិនទាន់ផ្ទុះនៅកម្ពុជា និងកំពុងអនុវត្តគម្រោង «ការធ្វើឲ្យប្រសើរឡើងសុខភាពមាតា និងទារកនៅក្នុងខេត្តតាកែវ» ។
ថ្លែងក្នុងពិធីចុះហត្ថលេខាលើកិច្ចសន្យាផ្ដល់ជំនួយនេះ លោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុន ប្រចាំកម្ពុជា បានមានប្រសាសន៍ថា រដ្ឋាភិបាលជប៉ុនបានសម្រេចផ្ដល់ថវិកាប្រមាណ៦៧ម៉ឺន៦ពាន់ដុល្លារដល់អង្គការ JMAS សម្រាប់ការផ្ទេរបច្ចេកទេសបោសសម្អាតមីនទៅឲ្យអង្គការ CMAC ដោយប្រើម៉ាស៊ីនដោះគ្រាប់បែកចង្កោមលើកដំបូងនៅកម្ពុជា ក្នុងតំបន់សម្បូរគ្រាប់មីន និងកាកសំណល់គ្រាប់បែកចង្កោមនៅលាយបញ្ចូលគ្នា និងផ្ដល់ថវិកាដល់អង្គការ World Vision Japan ចំនួន៤៥ម៉ឺន៦ពាន់ដុល្លារសម្រាប់ការបណ្ដុះបណ្ដាលបុគ្គលិករបស់មណ្ឌលសុខភាព ផ្ដល់ការអប់រំសុខភាពដល់អ្នកម្ដាយនៅក្នុងតំបន់ និងកែលម្អប្រព័ន្ធផ្គត់ផ្គង់ទឹកស្អាត និងអនាម័យនៅតាមមណ្ឌលសុខភាពនានា ។
លោកឯកអគ្គរាជទូតថ្លែងថា ៖« តាមរយៈគម្រោងនេះ យើងសង្ឃឹមយ៉ាងមុតមាំថា ប្រជាជននឹងបានរួចផុតពីការភ័យខ្លាចដោយសារគ្រាប់មីន និងកាកសំណល់ជាតិផ្ទុះដែលសេសសល់ពីសង្គ្រាម, សុខភាពមាតា និងទារក នឹងត្រូវបានកែលម្អតាមរយៈការផ្សព្វផ្សាយយល់ដឹងដ៏ត្រឹមត្រូវអំពីសុខភាព និងទទួលបានទឹកស្អាតប្រកបដោយសុវត្ថិភាព ហើយគម្រោងនេះ នឹងចូលរួមចំណែកក្នុងការអភិវឌ្ឍសហគមន៍បន្ថែមទៀត » ។
ប្រធានតំណាងអង្គការ JMAS លោក Shibata Mikio បានលើកឡើងថា រហូតមកដល់ពេលនេះ JMAS បាននិងកំពុងធ្វើសកម្មភាពរបស់ខ្លួននៅកម្ពុជាអស់រយៈពេល១៦ឆ្នាំហើយ។ ទោះបីអត្រាគ្រោះថ្នាក់ដោយសារគ្រាប់មីន និងគ្រាប់យុទ្ធភណ្ឌមិនផ្ទុះបានថយចុះក៏ពិតមែន ប៉ុន្ដែក៏នៅមានជនរងគ្រោះប្រហែល១០០នាក់ផងដែរក្នុង១ឆ្នាំៗ ។ ក្នុងនោះជាងពាក់កណ្ដាលនៃជនរងគ្រោះ គឺគ្រោះថ្នាក់ដោយសារគ្រាប់យុទ្ធភណ្ឌមិនទាន់ផ្ទុះ ។
លោកថ្លែងថា ៖« តាមរយៈគម្រោងថ្មីរបស់ JMAS នៅពេលនេះ យើងនឹងដាក់ឲ្យប្រតិបត្តិការនូវគ្រឿងចក្របោសសម្អាតគ្រាប់បែកចង្កោមនៅតំបន់គោលដៅស្ថិតក្នុងស្រុកកំពង់ស្វាយ និងស្រុកសន្ទុក ខេត្តកំពង់ធំដែលជាតំបន់មានគ្រាប់មីនប្រឆាំងមនុស្សជាតិ និងគ្រាប់បែកចង្កោមនៅលាយឡំគ្នា ។ ជាមួយគ្នានេះ យើងនឹងធ្វើការផ្ទេរបច្ចេកទេសការបោសសម្អាតកាកសំណល់ជាតិផ្ទុះពីសង្គ្រាម និងគ្រាប់មីនឲ្យមានប្រសិទ្ធភាពខ្ពស់ ដោយប្រតិបត្តិការរួមគ្នារវាងក្រុមដោះមីនដោយមនុស្ស ក្រុមគ្រឿងចក្របោសសម្អាតមីនប្រឆាំងមនុស្ស និងក្រុមគ្រឿងចក្របោសសម្អាតគ្រាប់បែកចង្កោម» ។
លោកបន្ដថា ៖« ទោះបីជាការចូលរួមមានបន្ដិចបន្ដួចក៏ដោយ តែយើងមានបំណងចែករំលែកនូវវិបុលភាព សុវត្ថិភាព និងការអភិវឌ្ឍ ដោយមានគោលដៅរំដោះផ្ទៃដីឲ្យមានសុវត្ថិភាពមកវិញ និងធ្វើឲ្យអត្រាថយចុះចំនួនជនរងគ្រោះជាលំដាប់នៅតំបន់ដែលបាននិងកំពុងគំរាមកំហែងដោយសារគ្រាប់មីន និងគ្រាប់យុទ្ធភណ្ឌមិនទាន់ផ្ទុះក្នុងប្រទេសកម្ពុជា ដោយមានកិច្ចសហប្រតិបត្តិការរួមគ្នាជាមួយអង្គការCMAC អ្នកដោះមីន អ្នកបញ្ជាគ្រឿងចក្រ និងទីប្រឹក្សាជប៉ុនឲ្យបានស្អិត រមួត » ។
លោក តាគូយ៉ា ម៉ាត់ស៊ូកា តំណាងអង្គការ World Vision Japan បានសម្ដែងនូវអំណរគុណចំពោះរដ្ឋាភិបាលជប៉ុន ដែលបានគាំទ្រយ៉ាងពេញទំហឹងលើការអនុវត្តគម្រោង «ការធ្វើឲ្យប្រសើរឡើងសុខភាពមាតា និងទារកនៅក្នុងខេត្តតាកែវ» ដែលបានអនុវត្តឆ្នាំទី១កន្លងទៅ ។
លោកថ្លែងថា ៖« តាមរយៈជំនួយនេះ យើងនឹងបន្ដផ្ដល់នូវការបំប៉នសមត្ថភាព បុគ្គលិក មន្ត្រីមណ្ឌលសុខភាព និងក្រុមគាំពារសុខភាពភូមិ អំពីចំណេះដឹងទាក់ទងនឹងការថែទាំសុខភាពកុមារ និងទារក ទាំងមុន និងក្រោយពេលសម្រាល ហើយយើងនឹងបង្កើតឲ្យមានបរិយាកាសប្រកបដោយអនាម័យនៅតាមមណ្ឌលសុខភាព តាមរយៈការសាងសង់បង្គន់អនាម័យ អាងស្ដុកទឹកភ្លៀង និងស្ថានីយចម្រោះទឹកស្អាត។ ជាមួយគ្នានេះ យើងនឹងធ្វើការនៅភូមិដទៃទៀត ដើម្បីបង្ការ និងស្ដារនីតិសម្បទាកុមារ និងទារកដែលកំពុងជួបប្រទះកង្វះអាហារូបត្ថម្ភតាមរយៈគំរូសហគមន៍កូនល្អ ឬ PD Hearth ដែលនេះនឹងនាំឲ្យទារកអាចលូតលាស់ប្រសើរក្នុងកំឡុងពេល១ពាន់ថ្ងៃនៃជីវិតដំបូងរបស់ពួកគេ និងធានាថា ពួកគេមានអនាគតល្អ » ។
លោកប្ដេជ្ញាថា នឹងអនុវត្តគម្រោងឆ្នាំទី២នេះដោយធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា ជាពិសេសធ្វើការជាមួយក្រសួងសុខាភិបាល ។ ក្នុងពេលជាមួយគ្នានេះ យើងនឹងបន្ដអនុវត្តសកម្មភាពជាច្រើនជាមួយដៃគូ រួមមាន មន្ទីរសុខាភិបាលខេត្តតាកែវ ស្រុកប្រតិបត្តិគិរីវង្ស និងស្រុកប្រតិបត្តិកោះអណ្ដែត ដើម្បីធ្វើឲ្យប្រសើរឡើងនូវសេវាកម្មសុខភាពសម្រាប់មាតា និងទារក ។
យោងតាមសេចក្ដីប្រកាសព័ត៌មានរបស់ស្ថានទូតជប៉ុនប្រចាំកម្ពុជា កម្មវិធីជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុនបានចាប់ផ្ដើមនៅកម្ពុជាតាំងពីឆ្នាំ២០០២មក ដើម្បីគាំទ្រដល់សកម្មភាពអង្គការក្រៅរដ្ឋាភិបាលជប៉ុន ក្នុងកិច្ចខិតខំប្រឹងប្រែងជួយដល់ការអភិវឌ្ឍ និងស្ថាបនាប្រទេសកម្ពុជាឡើងវិញនៅតាមកម្រិតមូលដ្ឋាន។
សេចក្ដីប្រកាសបញ្ជាក់ថា ចាប់តាំងពីឆ្នាំ២០០២មក រដ្ឋាភិបាលជប៉ុនបានផ្ដល់ថវិកាជាង៣១លានដុល្លារដល់គម្រោងចំនួន១០៧ ដែលផ្ដោតសំខាន់ទៅលើវិស័យអប់រំកម្រិតមូលដ្ឋាន វិស័យសុខាភិបាល វិស័យកសិកម្ម និងសកម្មភាពបោសសម្អាតមីន ៕
ចែករំលែកព័តមាននេះ