រាជធានីភ្នំពេញ ៖ ក្រុមប្រឹក្សាឃុំ-សង្កាត់ និងអ្នកតំណាងរាស្ត្រដែលបានចុះឈ្មោះ និងមានសិទ្ធិបោះឆ្នោតនៅភ្នំពេញចំនួន៤៥២នាក់ នៅព្រឹកថ្ងៃទី២៥ ខែកុម្ភៈ ឆ្នាំ២០១៨នេះ បានទៅកាន់មណ្ឌលបោះឆ្នោតភូមិភាគទី១ នៅក្នុងវិទ្យាល័យប៊ុនរ៉ានីហ៊ុនសែនវត្តភ្នំ ដើម្បីបោះឆ្នោតជ្រើសតាំងសមាជិកព្រឹទ្ធសភាអាណត្តិទី៤ ។
នៅក្នុងមណ្ឌលនេះមានការិយាល័យបោះឆ្នោតចំនួនពីរ គឺការិយាល័យលេខ១០០១ និងការិយាល័យលេខ១០០២ ។ អង្គបោះឆ្នោតជាសមាជិកក្រុមប្រឹក្សាសង្កាត់មកពីខណ្ឌទាំង១២ ក្នុងរាជធានីភ្នំពេញ និងអ្នកតំណាងរាស្ត្រមណ្ឌលភ្នំពេញដែលស្ថិតក្នុងតំណែង ឬតួនាទី ។ គេមានការកត់សម្គាល់ថា សមាជិកក្រុមប្រឹក្សាឃុំ-សង្កាត់ទាំង១២ខណ្ឌក្នុងរាជធានីភ្នំពេញភាគច្រើន មកពីគណបក្សកាន់អំណាច (CPP) ។ បើទោះបីជាមានគណបក្សចូលរួមការប្រកួតការបោះឆ្នោតនេះមានចំនួន៤បក្សក៏ដោយ ។ គណៈកម្មាធិការជាតិរៀបចំការបោះឆ្នោត (គជប) បានបញ្ជាក់ថា គណបក្សប្រជាជនកម្ពុជា គណហ្វុនស៊ិនប៉ិច គណបក្សយុវជនកម្ពុជា និងគណបក្សខ្មែររួបរួមជាតិ ។ មណ្ឌលបោះឆ្នោតនៅតាមភូមិភាគចំនួន៨ នៅទូទាំងរាជធានីខេត្ត ។
អាសនៈមានចំនួន៥៨ ក្នុងចំណោម៦២ អាសនៈ ដែលត្រូវបានបោះឆ្នោតជ្រើសតាំងដោយអង្គបោះឆ្នោតជាង១ម៉ឺននាក់ រួមមានក្រុមប្រឹក្សាឃុំ-សង្កាត់ និងតំណាងរាស្ត្រក្នុងតួនាទី ។ អាសនៈចំនួន(២រូប) ត្រូវបានបោះឆ្នោតជ្រើសតាំងដោយរដ្ឋសភា និងអាសនៈ(២រូប)ទៀត ជ្រើសតាំងដោយព្រះមហាក្សត្រ ។
គជប និងធ្វើការប្រកាសលទ្ធផលបណ្តោះអាសន្ននៃការបោះឆ្នោតនេះ នៅវេលាម៉ោង៣រសៀល បន្ទាប់ពីការិយាល័យបោះឆ្នោតត្រូវបានបិទ និងបញ្ជូនលទ្ធផលបណ្តោះអាសន្នមកកាន់ទីស្តីការគជប ៕
ចែករំលែកព័តមាននេះ