រាជធានីភ្នំពេញ ៖ សំណុំរឿងបណ្តឹងឧទ្ធរណ៍របស់លោក មាជ សុវណ្ណរ៉ា អតីតមន្ត្រីនៃគណបក្សសង្គ្រោះជាតិទទួលបន្ទុកប្រព័ន្ធផ្សព្វផ្សាយបក្ស និងសកម្មជន១០នាក់ ត្រូវបានចៅក្រមជំនុំជម្រះ លោក ប្លង់ សំណាង តំណាងមហាអយ្យការ លោក អ៊ឹម ផាន និងលោក ង៉ែត សារ៉ាត់ សំណុំអង្គសេចក្តីបទដឹកនាំកុបកម្ម និងចូលចូលរួមកុបកម្ម ក្នុងករណីហិង្សានៅទីលានប្រជាធិបតេយ្យកាលពីខែកក្កដា ឆ្នាំ២០១៤ ។
ជនជាប់ចោទចំនួន២នាក់ ចំណោម១១នាក់ ត្រូវបានតុលាការសាកសួរ ចំពោះមុខក្រុមចៅក្រមលើបណ្តឹងឧទ្ធរណ៍របស់ខ្លួន ដែលមិនសុខចិត្តចំពោះការសម្រេចរបស់សាលាដំបូងរាជធានីភ្នំពេញ ដែលបានផ្តន្ទាទោសដាក់ពន្ធនាគារពី៧ឆ្នាំដល់២០ឆ្នាំ ។ ការជំនុំជម្រះនេះបានធ្វើឡើងនៅចំពោះជនជាប់ចោទ និងមេធាវីការពារក្តី ។ សាលាឧទ្ធរណ៍បានសាកសួរដេញដោលជនជាប់ចោទពីរនាក់ប៉ុណ្ណោះ នៅព្រឹកថ្ងៃទី២៣ ខែកុម្ភៈ ឆ្នាំ២០១៨នេះ ។
ដោយសារតែអស់ម៉ោងរដ្ឋបាលតុលាការបានបញ្ជូនជនជាប់ចោទទាំង១១នាក់ ទៅកាន់ពន្ធនាគារព្រៃស ។ តុលាការមិនទាន់បានកំណត់ពីពេលវេលានៃការកំណត់សវនាការឡើងវិញនៅពេលណានៅឡើយទេ ។ ជនជាប់ចោទ១១នាក់ ត្រូវបានចាប់ខ្លួនបន្តបន្ទាប់ក្នុងឆ្នាំ២០១៤ នៅស្ពាននាគសង្កាត់វត្តភ្នំ ខណ្ឌដូនពេញ បន្ទាប់ពីមានការអះអាងថា អំពើហិង្សាបានកើតឡើងរវាងសន្តិសុខយាមទីលាន និងក្រុមសកម្មជននៃគណបក្សសង្គ្រោះជាតិ ។ ជនរងគ្រោះជាច្រើននាក់ត្រូវបានគេរាយការណ៍ថា បានរងបួស និងជាដើមបណ្តឹងក្នុងសំណុំរឿងនេះ ។
ក្នុងសំណុំរឿងនេះជនជាប់ចោទចំនួន៤នាក់ ត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគារម្នាក់ៗ២០ឆ្នាំ ពីបទដឹកនាំកុបកម្ម និងជនជាប់ចោទ៧នាក់ ត្រូវបានផ្តន្ទាទោសដាក់ពន្ធនាគារម្នាក់ៗ៧ឆ្នាំ ពីបទចូលរួមកុបកម្មប្រព្រឹត្តទៅនៅថ្ងៃទី១៥ ខែកក្កដា ឆ្នាំ២០១៤ នៅសង្កាត់វត្តភ្នំ ខណ្ឌដូនពេញ រាជធានីភ្នំពេញ ។ សាលាឧទ្ធរណ៍ នៅថ្ងៃនេះ បានសម្រេចលើកពេលសវនាការ កាត់ទោសលោក មាជ សុវណ្ណារ៉ា រួមទាំងសកម្មជនគណបក្សប្រឆាំង១០នាក់ផ្សេងទៀត ពាក់ព័ន្ធនឹងសំណុំរឿង ហិង្សានៅលើស្ពាននាគ ក្បែរទីលានប្រជាធិបតេយ្យ កាលពីឆ្នាំ២០១៤ ។
គួរបញ្ជាក់ថា សវនាការនេះបានធ្វើម្តងរួចមកហើយ និងត្រូវបានលើកពេលទៅថ្ងៃក្រោយ ដោយមិនកំណត់ បន្ទាប់ពីអនុរក្សពន្ធនាគារ បានបញ្ជូនជនជាប់ចោទ ទៅដល់សាលាឧទ្ធរណ៍ នៅវេលាម៉ោង៨និង០០ព្រឹក ថ្ងៃទី២៥ ខែមេសា ឆ្នា២០១៧ ។ បើតាមការបញ្ជាក់របស់ មន្ត្រីតុលាការ នៅពេលនោះថា មូលហេតុដែលនាំឱ្យសាលាឧទ្ធរណ៍លើកពេលសវនាការចំពោះសំណុំរឿងនេះ ដោយសារតែដើមបណ្តឹងមិនចូលខ្លួន ។
សូមរំលឹកថា អតីតមន្ត្រីបក្សប្រឆាំង និងសកម្មជនបក្ស គឺ លោក មាជ សុវណ្ណារ៉ា និងសកម្មជនគណបក្សសង្គ្រោះជាតិ១០នាក់ផ្សេងទៀត ត្រូវបានតុលាការចោទពីបទ «ដឹកនាំកុបកម្ម និងអំពើចូលរួមចលនាកុបកម្ម» ប្រព្រឹត្តនៅចំណុចទីលានប្រជាធិបតេយ្យ ក្នុងសង្កាត់វត្តភ្នំ ខណ្ឌដូនពេញ កាលពីថ្ងៃទី១៥ ខែកក្កដា ឆ្នាំ២០១៤ ។
លោក មាជ សុវណ្ណារ៉ា និងសកម្មជន CNRPទាំង១០នាក់ រួមមានឈ្មោះ អឿ ណារិន, ឃិន រឿន ហៅឃិន ចំរើន, នាង សុឃុន , សាន គឹមហេង, ស៊ុ ពុទ្ធី , កែ ឃីម ហៅ វិន ឌី, ទេព ណារិន, អាន បឋម ហៅ សុខុម, សាន សីហៈ និង អ៊ុក ពេជ្រសំណាង កាលពីថ្ងៃទី២១ ខែកក្កដា ឆ្នាំ២០១៥ ត្រូវបានសាលាដំបូងរាជធានីភ្នំពេញ ផ្ដន្ទាទោស ឲ្យជាប់ពន្ធនាគារពី៧ឆ្នាំ ដល់២០ឆ្នាំ ពាក់ព័ន្ធនឹងហិង្សានៅក្បែរទីលានប្រជាធិបតេយ្យកាលពីខែកក្កដាឆ្នាំ២០១៤ ៕
ចែករំលែកព័តមាននេះ