រាជធានីភ្នំពេញ ៖ នារី២នាក់ ម្នាក់ជាអ្នកម៉ាស្សា និងម្នាក់ទៀតជាមេការ ត្រូវបានកម្លាំងកងរាជអាវុធហត្ថ ខណ្ឌមានជ័យ ធ្វើការឃាត់ខ្លួនបញ្ចូនទៅកាន់មូលដ្ឋានកងរាជអាវុធហត្ថខណ្ឌ ដើម្បីធ្វើការសួរនាំ ក្រោយភ្ញៀវដែលចូលទៅម៉ាស្សា បានបាត់លុយសុទ្ធចំនួន២.៣០០ដុល្លារ ដោយប្រែមកជាលុយ ដុល្លារសែនទៅវិញ។ ហេតុការណ៍នេះបង្កឲ្យមានការភ្ញាក់ផ្អើលឡើង កាលពីវេលាម៉ោង ៣រសៀល ថ្ងៃទី ២២ ខែកុម្ភៈ ឆ្នាំ២០១៨ នៅចំណុចទីតាំងម៉ាស្សាកោសជប់មួយកន្លែងយីហោ ” ហេងហេង ” ស្ថិតក្នុងភូមិត្នោតជ្រុំ សង្កាត់បឹងទំពុន២ ខណ្ឌមានជ័យ។ បុរសជាជនរងគ្រោះ មិនត្រូវមិនបានបញ្ចេញ អត្តសញ្ញាណឡើយ ដែលមានវ័យប្រមាណជាង៤០ឆ្នាំ។ ដោយឡែកស្ត្រី២នាក់ដែលត្រូវឃាត់ខ្លួន មកសួរនាំមានឈ្មោះ ទី១. ភិន នី អាយុ៣៥ឆ្នាំ ជាអ្នកម៉ាស្សាឲ្យជនរងគ្រោះ និងទី២.ឈ្មោះ ដៅ វន ជាមេការមើលការខុសត្រូវនៅទីតាំងខាងលើ។
តាមប្រភពព័ត៌មានពីបុរសជាជនរងគ្រោះ បានឲ្យដឹងថា នៅវេលាខាងលើដោយសារតែខ្លួនអស់កម្លាំងពេក ខ្លួនក៏ចូលទៅទីតាំងខាងលើដើម្បីកោសជប់ និងម៉ាស្សាបន្តិចក្រែងធូរខ្លួន ដោយក្នុងតម្លៃតែ១ម៉ឺនរៀលប៉ុណ្ណោះ ដោយពេលនោះខ្លួនមានលុយ ដុល្លារសុទ្ធចំនួន២.៥០០ដុល្លារ ក្នុងកាបូប ដោយពេលម៉ាស្សា គឺបានព្យួរខោទៅលើជញ្ជាំង។ ក្រោយម៉ាស្សាអស់រយៈពេលជិតកន្លះម៉ោងរួចមក លោកក៏បានចាកចេញពីទីតាំងខាងលើ លុះជិះម៉ូតូចេញមិនបានគីឡូដីផង លោកបានឈប់ម៉ូតូ ដើម្បីមើលលុយក្នុងកាបូប ស្រាប់តែនៅសល់តែ៣០០ដុល្លារប៉ុណ្ណោះដែលជាលុយពិតប្រាកដ ដោយឡែក២.៣០០ដុល្លារទៀត សុទ្ធតែជាលុយដុល្លារសម្រាប់សែន។ បន្ទាប់ពីដឹងថាខ្លួនត្រូវគេបន្លំយកលុយ បុរសជាជនរងគ្រោះ បានជិះម៉ូតូត្រឡប់មកកាន់ទីតាំងម៉ាស្សាខាងលើវិញ រួចស្រែកខ្លាំងៗទាំងអារម្មណ៍ខឹងសម្បា ទៅកាន់នារីម៉ាស្សាដែលម៉ាស្សាឲ្យខ្លួន ដោយឲ្យនាងត្រូវយកលុយដែលបានបន្លំ យកមកសងខ្លួនវិញ បើពុំដូច្នោះខ្លួននឹងប្តឹងសមត្ថកិច្វឲ្យឃាត់ខ្លួន។ ភ្លាមៗនោះ ភាគីខាងស្ត្រីម៉ាស្សា បានបដិសេធដាច់អហង្ការថា ខ្លួនមិនបានបន្លំយកលុយអ្នកណាឡើយ ជាហេតុធ្វើឲ្យបុរសរងគ្រោះ សម្រេចចិត្តទំនាក់ទំនងទៅកាន់មន្ត្រីកងរាជអាវុធហត្ថខណ្ឌចុះអន្តរាគមន៍ដល់ទីតាំងខាងលើភ្លាមៗផងដែរ។
ស្របពេលដែលមន្ត្រីកងរាជអាវុធហត្ថទៅដល់ ស្ត្រីម៉ាស្សា រួមជាមួយមេការ បានសម្រេចសុំសង សំណងទៅកាន់បុរសរងគ្រោះចំនួន១.០០០ដុល្លារ តែត្រូវបុរសរងគ្រោះបដិសេធមិនទទួល ប្រសិនបើមិនគ្រប់ចំនួន។ក្រោយពួកសម្រេចចិត្តសងសំណងទៅជនរងគ្រោះ ១.០០០ដុល្លាររួចមក សមត្ថកិច្ចអាវុធហត្ថក៏មានការសង្ស័យ ទើបសម្រេចឃាត់ខ្លួនពួកគេទាំង២នាក់ បញ្ជូនទៅកាន់ ទីបញ្ជាការកងរាជអាវុធហត្ថខណ្ឌមានជ័យ ដើម្បីធ្វើការសាកសួរនាំបន្តតែម្តងទៅ។ មន្ត្រីអាវុធហត្ថ ឲ្យដឹងថា ក្រោយការសាកសួរនាំអស់ជិត២០នាទី ស្ត្រីម៉ាស្សា និងមេការ បានសម្រេចចិត្តសងសំណង ទៅខាងបុរសរងគ្រោះសរុបទាំងអស់ចំនួន ២.០០០ដុល្លារ ហើយបុរសរងគ្រោះក៏សម្រេចចិត្តទទួលយក ដោយមិនបានដាក់ពាក្យប្តឹងអ្វីទៀតឡើយ ដោយក្នុងនោះ បុរសរងគ្រោះត្រូវខាតប្រាក់ចំនួន៣០០ដុល្លារ។ ប៉ុន្តែទន្ទឹមនឹងការសងនោះ ស្ត្រីទាំង២នាក់ នៅតែបដិសេធថាពួកគេមិនបានលួចឡើយ។
ក្រោយការសងសំណង និងមិនមានពាក្យបណ្តឹងជនរងគ្រោះ ពិសេសដោយយល់ឃើញថា ស្ត្រីដែលជាអ្នកម៉ាស្សា មានកូនតូចផងនោះ សមត្ថកិច្ចអាវុធហត្ថបានសម្រេចធ្វើកិច្ចសន្យាអប់រំណែនាំ ពួកគេ ដោយឲ្យពួកគេត្រូវបញ្ឈប់សកម្មភាពលួចបន្លំគេទៀត បើទោះបីជាអ្នកទាំង២បដិសេធ ក៏សមត្ថកិច្ចដឹងថាពួកគេជាអ្នកយកទៅហើយដែរ ព្រោះបើពួកគេមិនបានយកចាំបាច់សងសំណង ទៅម្ចាស់ដើមគេធ្វើអ្វី .? ក្រោយការអប់រំណែនាំ ពួកគេត្រូវបានអនុញ្ញាតឲ្យត្រឡប់ទៅលំនៅឋានវិញ។ សូមបញ្ជាក់ នាពេលបច្ចុប្បន្ន បាតុភាពដូចករណីខាងលើ គឺកើតមានច្រើនណាស់ ដោយករណីខ្លះ ជនរងគ្រោះដែលត្រូវបានស្ត្រីម៉ាស្សាបន្លំលុយហើយ មិនអាចយកមកវិញសូម្បី១សេន និងអ្នកខ្លះ ក៏អាចយកមកវិញបានខ្លះក្រោយការអន្តរាគមន៍របស់សមត្ថកិច្ច ។ ប៉ុន្តែករណីបែបនេះ មិនមានន័យទូលំទូលាយ សំដៅចំពោះនារី ឬស្ត្រីម៉ាស្សាទូទៅនោះទេ គឺមួយចំនួនតែប៉ុណ្ណោះ ព្រោះបាតុភាពអាក្រក់នេះកំពុងកើតមានមិនដាច់ផងដែរ តាមបណ្តាទីតាំងម៉ាស្សាមួយចំនួន ក្នុងភូមិសាស្ត្ររាជធានីភ្នំពេញ៕
ចែករំលែកព័តមាននេះ