ខេត្តកំពត ៖ នៅថ្ងៃបុណ្យចូលឆ្នាំប្រពៃណីចិន-វៀតណាម នាឆ្នាំ២០១៨នេះ ភ្ញៀវទេសចរណ៍ជាតិ អន្តរជាតិមកលេងកម្សាន្តនៅក្នុងទឹកដីខេត្តកំពតមានការកើនឡើងជាងឆ្នាំ២០១៧ រីឯសភាពការសុវត្ថិភាពសន្តិសុខ និយាយជារួម រាល់សកម្មភាពបទល្មើសផ្សេងៗ រយៈពេលបុណ្យបីថ្ងៃនេះ គឺគ្មានហេតុការអ្វីគួរឲ្យកត់សម្គាល់ឡើយ ។
ដោយឡែកបុណ្យចូលឆ្នាំប្រពៃណីចិន-វៀតណាមនាឆ្នាំនេះ សម្រាប់ការធ្វើដំណើរកម្សាន្ត តាមយានយន្តគ្រប់ប្រភេទរបស់ភ្ញៀវទៅកាន់កន្លែងកម្សាន្តទាំងត្រឡប់មកពីកន្លែងកម្សាន្តវិញ ឃើញថា ការធ្វើចរាចរណ៍ពុំមានចរាចរណ៍ដូចឆ្នាំមុនៗដែរ ។ បើស្ទះត្រឹមតែ១៥នាទីទៅ៣០នាទីប៉ុណ្ណោះ ដោយមានការរៀបចំបញ្ជាចរាចរណ៍របស់កម្លាំងការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តនៅប្រចាំការ គ្រប់ផ្លូវបំបែក និងគោលដៅសំខាន់ៗនៅក្នុងក្រុងក៏ដូចជានៅជាយក្រុង ដើម្បីជួយសម្រួលចរាចរណ៍ជូនភ្ញៀវយ៉ាងយកចិត្តទុកដាក់បំផុត ។
កំណើនភ្ញៀវ បើតាមតួរលេខសរុបរបស់មន្ទីរទេសចរណ៍ខេត្ត ដែលបានសរុបចំនួនភ្ញៀវមកលេងកម្សាន្តតាមតំបន់រមណីដ្ឋាននានាក្នុងខេត្តកំពត និងសរុបយាន្តយន្តគ្រប់ប្រភេទដែលជាមធ្យោបាយសម្រាប់ធ្វើដំណើរកម្សាន្តតាមតំបន់រមណីដ្ឋានដូចខាងក្រោម ភ្ញៀវសរុប១២៦,៨៩៤ នាក់កើនឡើង ៥១,៦៤% បើធៀបនឹងឆ្នាំ២០១៧ ក្នុងនោះទេសចរណ៍ក្នុងស្រុកចំនួន១២៤,៣៣១នាក់ ទេសចរអន្តរជាតិចំនួន២,៥៦៣នាក់ ។
រថយន្តគ្រប់ប្រភេទសរុប១៥,៣២៩គ្រឿង ម៉ូតូគ្រប់ប្រភេទសរុប៦,០៧២គ្រឿង ។ ដោយឡែករមណីដ្ឋានឋានសួគ៌បូកគោ មានភ្ញៀវទេសចរណ៍ទៅលេងកម្សាន្តសរុប៤០,២៩៩នាក់ រថយន្តគ្រប់ប្រភេទរបស់ភ្ញៀវឡើងទៅសរុបចំនួន៧០៨៨ គ្រឿង ។
គួររំលឹកថា ទន្ទឹមនឹងសមត្ថកិច្ចខិតខំការពារសន្តិសុខសុវត្ថិភាពបានល្អ ជូនបងប្អូនភ្ញៀវទេសចរណ៍ជាតិ និងអន្តរជាតិដែលមកលេងកម្សាន្តរយៈពេលបីថ្ងៃ ដោយជោគជ័យគួរឲ្យកត់សម្គាល់យ៉ាងនេះក្តីក៏ខេត្តកំពតរបស់យើង នៅមានចន្លោះខ្វះខាតមួយចំនួនធ្វើឲ្យភ្ញៀវមានការរិះគន់ ទៅលើអាជ្ញាធរក៏ដូចជា សមត្ថកិច្ចស្ថាប័នជំនាញនៅក្នុងខេត្ត នៅខ្វះការណែនាំដល់ក្រុមអាជីវករលក់ដូរចំណីអាហារដូចជា គ្រឿងសមុទ្រតម្លៃឡើងតាមអំពើចិត្ត ដូចជា ក្តាមសេះ១គីឡូក្រាម តម្លៃពី៤ម៉ឺន ទៅ៨ម៉ឺនរៀល ,មឹក១គីឡូក្រាម តម្លៃពី៤ម៉ឺនរៀល ទៅ៦ម៉ឺនរៀល និងម្ហូបអាហារដែលជាគ្រឿងសមុទ្រមួយចំនួនទៀតមានការឡើងថ្លៃប្រហាក់ប្រហែលគ្នាដែរ ។
ចំណែកផ្ទះសំណាក់សម្រាប់ភ្ញៀវស្នាក់នៅក៏មានការឡើងថ្លៃខុសពីថ្ងៃធម្មតាដែរ ចំណុចខ្វះខាតខាងលើនេះហើយដែលធ្វើឲ្យភ្ញៀវមានការត្អូញត្អែរពីទំនិញឡើងថ្លៃគ្រប់ៗគ្នាផងដែរ ៕
ចែករំលែកព័តមាននេះ