ខេត្តកំពង់ស្ពឺ ៖ នារីម្នាក់មានវ័យ១៧ឆ្នាំបានសម្រេចចិត្តបញ្ចប់ជីវិតខ្លួនឯងដោយការធ្វើអត្តឃាត បានត្រឹមតែបន្សល់ទុកភាពស្ដាយស្រណោះ អាឡោះអាល័យពីក្រុមគ្រួសារតែប៉ុណ្ណោះ។ ចំពោះមូលហេតុនៃការស្លាប់ត្រូវបានអ្នកដឹងរឿងទម្លាយថា មកពីវិបត្តិផ្លូវចិត្តព្រោះតែការលួចបង្កាត់ ភ្លើងស្នេហ៍រោលរាលជាមួយសង្សា។ នគរបាលស្រុកឱរ៉ាល់បានប្រាប់ថា ករណីនេះ…
ខេត្តកំពង់ស្ពឺ ៖ នារីម្នាក់មានវ័យ១៧ឆ្នាំបានសម្រេចចិត្តបញ្ចប់ជីវិតខ្លួនឯងដោយការធ្វើអត្តឃាត បានត្រឹមតែបន្សល់ទុកភាពស្ដាយស្រណោះ អាឡោះអាល័យពីក្រុមគ្រួសារតែប៉ុណ្ណោះ។ ចំពោះមូលហេតុនៃការស្លាប់ត្រូវបានអ្នកដឹងរឿងទម្លាយថា មកពីវិបត្តិផ្លូវចិត្តព្រោះតែការលួចបង្កាត់ ភ្លើងស្នេហ៍រោលរាលជាមួយសង្សា។ នគរបាលស្រុកឱរ៉ាល់បានប្រាប់ថា ករណីនេះ កាលពីវេលាម៉ោង៨ព្រឹក ថ្ងៃទី១៨ ខែកុម្ភៈ ឆ្នាំ២០១៨ នៅខាងក្រោយផ្ទះរបស់នារីរងគ្រោះ ចម្ងាយ៣០០ម៉ែត្រ ស្ថិតនៅក្នុងភូមិថ្មី ឃុំតាសាល ស្រុកឱរ៉ាល់ ខេត្តកំពង់ស្ពឺ។ នារីរងគ្រោះមានឈ្មោះ ឡេង ឈន អាយុ១៧ឆ្នាំ ជាកសិករ រស់នៅក្នុងភូមិកើតហេតុខាងលើ។ ប្រភពពីមន្ត្រីនគរបាលដែលធ្វើ ការសាកសួរសាក្សី និងសាច់ញាតិនារីរងគ្រោះបានឲ្យដឹងថា “នាងបានបាត់ពីផ្ទះតាំងពីថ្ងៃទី១៥ កុម្ភៈ ២០១៨ ពេលនោះសាច់ញាតិបងប្អូនឪពុកម្តាយបាននាំគ្នាដើររកគ្រប់ច្រកល្ហកដែរ តែមិនឃើញឡើយ”។
ប្រភពបន្តថា រហូតដល់ថ្ងៃភ្ញាក់ផ្អើលមានក្លិនស្អុយតាមខ្យល់មកម្តងក៏នាំគ្នាដើររកតាមក្លិន ខ្យល់ស្រាប់តែប្រទះឃើញសពនាងចងកនឹងដើមកំប៉េះរហូតហើមស្អុយមើលសភាពមិនចង់យល់ទៅហើយ”។ បើតាមការស្រាវជ្រាវពីមិត្តភក្តិរបស់នាងទើបដឹងថា នាងបានលួចបង្កាត់ភ្លើងស្នេហ៍ជាមួយបុរស មិនស្គាល់អត្តសញ្ញាណម្នាក់រហូតមានផ្ទៃពោះ ពេលនោះនាងមិនចង់ទុកកូនក្នុងផ្ទៃនាងឡើយ ដោយសុំលុយសង្សា១០ម៉ឺនរៀលដើម្បីពន្លូតកូននោះចេញ តែទំនងជាសង្សានាងមិនឲ្យទើបនាងខ្លាច ខ្នាស់គេក៏សម្រេចបញ្ចប់ជីវិតបែបនេះតែម្តងទៅ”។ ប្រភពបន្តថា តាមសាច់ញាតិនារីរងគ្រោះបានឲ្យដឹងថា មួយរយៈពេលចុងក្រោយនេះនាងចេះតែមានអាការៈក្អូតចង្អោរ ទឹកមុខស្លេកស្លាំងខ្លាំង មិនសូវនិយាយស្តី អ្វីទាំងអស់ជាមួយបងប្អូនក្នុងផ្ទះ។
បើតាមមិត្តភក្តិរបស់នាងបានបង្ហើបឲ្យដឹងថា បានជារូបនាងដាច់ចិត្ត ចងកសម្លាប់ខ្លួននោះ គឺមកពីនាងខឹងជាមួយសង្សាបណ្តូលចិត្តក្បត់ចិត្តនាង ហើយនាងបានសុំលុយ សង្សារចំនួនតែ១០ម៉ឺនរៀលប៉ុណ្ណោះដើម្បីយកកូននៅក្នុងផ្ទៃរបស់ពួកគេចេញកុំឲ្យដឹងដល់សាច់ញាតិក្រុមគ្រួសារ និងខ្មាស់អ្នកជិតខាង ប៉ុន្តែសង្សានាងមិនឲ្យនាងក៏សម្រេចចិត្តចងកសម្លាប់ខ្លួនតែម្តងទៅ។ បើតាមនគរបាលជំនាញដែលចុះពិនិត្យសន្និដ្ឋានថា ពិតជាស្លាប់ដោយសារតែយកក្រមាចងកសម្លាប់ខ្លួន ពិតប្រាកដមែន។ រួចប្រគល់សពឲ្យសាច់ញាតិយកទៅធ្វើបុណ្យតាមប្រពៃណី។ ពេលនេះសមត្ថកិច្ចកំពុងបន្តធ្វើការស្រាវជ្រាវរកសង្សារបស់នាងជាបន្តទៀតដើម្បីស្វែងរកមូលហេតុពិតប្រាកដ។ អ្នកដឹងរឿងបានសម្ដែងនូវការហួសចិត្ត និងអាណិតដល់ក្រុមគ្រួសារនាងជាខ្លាំង ដោយអ្នកខ្លះលើកឡើងថា មិនគួរណានាងគិតខ្លីយកវិធីសម្លាប់ខ្លួនមកដោះស្រាយបញ្ហាបែបនេះសោះ ៕
ចែករំលែកព័តមាននេះ