រាជធានីភ្នំពេញ ៖ នៅពេលបណ្តាប្រទេសនានាក្នុងពិភពលោក កំពុងបង្អួតគ្នាដើម្បីបង្ហាញពីកិត្យានុភាព និងមូលដ្ឋាននៃការរីកចម្រើនរបស់ខ្លួន ដោយសាងសង់អគារខ្ពស់ៗកប់ពពក កម្ពុជាក៏បាននិងកំពុងដើរតាមលំអាននេះដែរដើម្បីបង្ហាញខ្លួនក្នុងនាមជាប្រទេសមួយដែលស័ក្តិសមជាខ្លាសេដ្ឋកិច្ចក្នុងតំបន់ ។
ជាមួយនឹងមហិច្ឆតានេះ កាលពីសប្តាហ៍មុន មន្ត្រីជាន់ខ្ពស់ក្រសួងដែនដីបានបង្ហើបថា ក្រុមហ៊ុនរ៉ូយ៉ាល់ គ្រុប បានស្នើសុំការសាងសង់ អគារពាណិជ្ជកម្មកម្ពស់៦០០ម៉ែត្រនៅទីតាំងសណ្ឋាគារកាំបូឌីយ៉ាណាសព្វថ្ងៃនេះ ។ វាជាដំណឹងដ៏គួរឲ្យភ្ញាក់ផ្អើលមួយ ខណៈអគារពាណិជ្ជកម្មភ្លោះ Thai Bunrong Twin Tower កម្ពស់៥៦០ម៉ែត្រ ដែលគ្រោងសាងសង់នៅក្បែរនោះហាក់ស្ងៀមស្ងាត់ មិនទាន់មានព័ត៌មានអ្វីនៅឡើយទាក់ទងនឹងពេលវេលាសាងសង់ជាក់លាក់ ។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត បានមានប្រសាសន៍កាលពីពេលថ្មីៗនេះថា ក្រុមហ៊ុនរ៉ូយ៉ាល់ គ្រុប របស់អ្នកឧកញ៉ា គិត ម៉េង គ្រោងនឹងឈូសសណ្ឋាគារកាំបូឌីយ៉ាណា ដើម្បីត្រួសត្រាយផ្លូវសម្រាប់សាងសង់អគារមួយដែលមានកម្ពស់៦០០ម៉ែត្រ ។
លោកថ្លែងបន្តថា ៖« វាគ្រាន់តែជាផែនការប៉ុណ្ណោះ ក្រុមហ៊ុនរ៉ូយ៉ាល់ គ្រុប បានស្នើសុំរាជរដ្ឋាភិបាលនូវសិទ្ធិសម្រាប់គម្រោងនេះ » ។ លោកបន្តថា ៖« តាមគម្រោងក្រុមហ៊ុន Royal Group គ្រោងវាយកម្ទេចសណ្ឋាគារកាំបូឌីយ៉ាណា ហើយក្រុមហ៊ុននេះនឹងសាងសង់អគារកម្ពស់ ៦០០ម៉ែត្រនៅទីនោះ » ។
ជាមួយគ្នានេះដែរ ក្រុមហ៊ុន ថៃ ប៊ុនរ៉ុង ដែលបានចាប់ដៃគ្នាជាមួយក្រុមហ៊ុន Sun Kian Ip Group របស់ប្រទេសចិន ក៏បានប្រកាសពីផែនការសាងសង់អគារមួយដែលមានកម្ពស់៥៦០ម៉ែត្រនៅទីតាំងជិតនោះផងដែរ ។
លោកសាស្ត្រាចារ្យ ទួស សាភឿន ស្ថាបត្យករដែលចូលរួមរចនាប្លង់ស្ថាបត្យកម្មអគារពាណិជ្ជកម្ម Thai Bunrong Twin Tower ធ្លាប់បានថ្លែងកាលពីពេលថ្មីៗនេះថា ការសាងសង់អគារពាណិជ្ជកម្មលំដាប់ពិភពលោកនេះ នឹងមិនមានការផ្លាស់ប្តូរទេ ដោយសារបច្ចុប្បន្ននេះក្រុមហ៊ុនមានមូលដ្ឋានលុយរឹងមាំ និងបានត្រៀមទុនរួចហើយ ដើម្បីសាងសង់អគារនេះឲ្យទទួលបានជោគជ័យតាមការគ្រោងទុក ។
លោកបន្តថា ៖« បច្ចុប្បន្ន ក្រុមហ៊ុនកំពុងរៀបចំរចនាប្លង់អគារនេះឡើងវិញ ដោយមានការចូលរួមពីស្ថាបត្យករ វិស្វករលំដាប់ពិភពលោក ដែលមានបទពិសោធន៍សាងសង់អគារខ្ពស់ៗចូលរួមរចនាគម្រោងនេះ » ។
លោកបន្តថា ៖« នៅពេលអគារនេះសាងសង់ហើយ វានឹងជា Landmark មួយសម្រាប់រាជធានីភ្នំពេញ ហើយនឹងធ្វើឲ្យកម្ពុជាកាន់តែទាក់ទាញបាននូវអ្នកវិនិយោគអន្តរជាតិ ក៏ដូចជាក្រុមហ៊ុនធំៗលំដាប់ពិភពលោក មកតាំងការិយាល័យកណ្តាលនៅទីក្រុងភ្នំពេញកាន់តែច្រើនថែមទៀត » ។
តាមគម្រោងអគារពាណិជ្ជកម្មលំដាប់ពិភពលោក Thai Bunrong Twin Tower គ្រោងនឹងប្រើប្រាស់ចម្រុះដូចជា ផ្សារទំនើបលំដាប់អន្តរជាតិ សណ្ឋាគារកម្រិតផ្កាយ៦ អាផាតមិន សម្រាប់អភិជន ខុនដូប្រណីត ភោជនីយដ្ឋាន និងការិយាល័យលំដាប់ពិភពលោកជាដើម ។ នេះបើតាមលោក ទួស សាភឿន បានបញ្ជាក់ ។
លោកបន្តថា ក្រោយពេលសាងសង់ចប់ ក្រុមហ៊ុនគ្រោងចំណាយទុន៣.០០០លានដុល្លារថែមទៀត ដើម្បីធ្វើឲ្យមជ្ឈមណ្ឌលពាណិជ្ជកម្មនេះដំណើរការដោយរស់រវើក និងទទួលបានជោគជ័យ ។
ជាមួយគ្នានេះដែរ កម្ពុជាក៏គ្រោងសាងសង់មជ្ឈមណ្ឌលពាណិជ្ជកម្មកម្ពស់៦០០ម៉ែត្រមួយទៀត ស្ថិតនៅភាគខាងជើងរាជធានីភ្នំពេញផងដែរ ដោយគម្រោងនេះស្ថិតនៅក្នុងទីក្រុងនាគរាជសម្តេចតេជោ ហ៊ុន សែន ដែលស្ថិតនៅស្របតាមបណ្តោយផ្លូវជាតិលេខ៦អា និងផ្លូវជាតិលេខ៥ ស្របគ្នានឹងដងទន្លេមេគង្គ និងទន្លេសាប ។
គម្រោងទីក្រុងនេះ គ្រោងចំណាយប្រាក់៨០ពាន់លានដុល្លារអាមេរិក ប៉ុន្តែគម្រោងនេះស្ថិតនៅក្នុងផែនការនៅឡើយ ដោយសាររាជរដ្ឋាភិបាលកំពុងរង់ចាំដៃគូវិនិយោគអន្តរជាតិនានា ពិសេសប្រទេសចិន ។
លោក ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ធ្លាប់បានថ្លែងថា គម្រោងនេះលោកបានដាក់ឆ្លងសម្តេចតេជោរួចហើយ ហើយសម្តេចតេជោបានស្នើសុំឲ្យមានការសិក្សាលម្អិតបន្ថែមទៀត មុនពេលគម្រោងនេះទទួលបានការយល់ព្រមពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា ។
លោកបន្តថា ទីក្រុងនាគរាជសម្តេចតេជោ ស្ថិតនៅលើផ្ទៃដីជាង៣ម៉ឺនហិកតា ជាទីក្រុងមួយសាងសង់ឡើងដើម្បីដឹងគុណដល់សម្តេច ដែលហ៊ានពលីជីវិតដើម្បីនាំមកនូវសុខសន្តិភាព និងអភិវឌ្ឍន៍ជាតិ ។
លោកបន្តថា ៖« កម្ពុជាខកខានសាងសង់ទីក្រុង៥៨០ឆ្នាំមកហើយ ហេតុនេះ កម្ពុជាគួរតែសាងសង់ទីក្រុងថ្មី ដោយសារទីក្រុងភ្នំពេញ ជាទីក្រុងចាស់ និងមានមនុស្សរស់នៅកកកុញរួចទៅហើយ » ។ លោកបន្តថា ៖« ហេដ្ឋារចនាសម្ព័ន្ធទីក្រុងនេះមានទាំងផ្លូវក្រោមដី ផ្លូវទឹក ផ្លូវគោក និងផ្លូវអាកាស ដែលអាចដោះស្រាយបញ្ហាចរាចរណ៍បានរាប់រយឆ្នាំ » ។
រដ្ឋលេខាធិការរូបនេះបានស្នើសុំរដ្ឋាភិបាលចិន និងវិនិយោគិនចិនគាំទ្រគម្រោងនេះ ព្រោះសម្តេចតេជោតែងតែគាំទ្រចិននៅលើឆាកអន្តរជាតិ និងប្រកាន់យកគោលនយោបាយ «ចិនតែមួយ» ជាអ្វីដែលសម្តេចបានខិតខំពូនជ្រំនូវទំនាក់ទំនង និងផលប្រយោជន៍សម្រាប់ប្រជាជាតិទាំងពីរ ៕
ចែករំលែកព័តមាននេះ