រាជធានីភ្នំពេញ ៖ ថ្វីបើការបើកបរជាសកម្មភាពធម្មតារាល់ថ្ងៃ តែវាអាចនឹងមានគ្រោះ ថ្នាក់ ប្រសិនបើអ្នកបើកបរមិនបានយកចិត្តទុកដាក់គ្រប់គ្រាន់ទៅលើអ្វីដែលនៅជុំវិញខ្លួន ។ ជាមួយគ្នានេះ អ្នកបើកបរក៏បាត់បង់ម្ចាស់ការផងដែរ ប្រសិនជាត្រូវបានរំខានដោយអ្នករួមដំណើរ…
រាជធានីភ្នំពេញ ៖ ថ្វីបើការបើកបរជាសកម្មភាពធម្មតារាល់ថ្ងៃ តែវាអាចនឹងមានគ្រោះ ថ្នាក់ ប្រសិនបើអ្នកបើកបរមិនបានយកចិត្តទុកដាក់គ្រប់គ្រាន់ទៅលើអ្វីដែលនៅជុំវិញខ្លួន ។ ជាមួយគ្នានេះ អ្នកបើកបរក៏បាត់បង់ម្ចាស់ការផងដែរ ប្រសិនជាត្រូវបានរំខានដោយអ្នករួមដំណើរ ឬទូរស័ព្ទ ។
អ្នកបើកបរដែលមានបទពិសោធន៍ជាង២០ឆ្នាំ លោក មឿន គឹមស្រៀន បានប្រាប់ពីចំណុចល្អៗ៣ចំណុច ដើម្បីឲ្យការបើកបររបស់លោកអ្នកប្រកបដោយសុវត្ថិភាព ។
លោកនិយាយថា ការបើកបររថយន្ដ មើលទៅពិតជាធម្មតា តែបើយើងប្រហែសតែបន្ដិច គ្រោះថ្នាក់អាចនឹងកើតមានឡើង ។ ដូច្នេះ បន្ទាប់ពីការគោរពច្បាប់ចរាចរណ៍ជាអាទិភាពហើយ អ្នកបើកបរក៏ត្រូវដឹងដែរពីចំណុចមួយចំនួនដែលអាចបណ្ដាលឲ្យមានគ្រោះថ្នាក់កើតឡើងផងដែរ ។
ដើម្បីសុវត្ថិភាពពេញលេញក្នុងការធ្វើដំណើរនោះ លោកថា ៖« យើងគួរយកចិត្តទុកដាក់ទៅលើ៣ចំណុចដូចជា ពិនិត្យរថយន្ដ មុនពេលចេញដំណើរ, ការជជែករំខានពីអ្នករួមដំណើរ និងការប្រើប្រាស់ឧបករណ៍អេឡិចត្រូនិក ពេលកំពុងបើកបរ »។
លោកបានពន្យល់ថា ៖« មុនពេលចេញដំណើរ យើងត្រូវរៀបចំសម្ភារនៅក្នុងរថយន្ដឲ្យរៀបរយ ដោយសារសម្ភារខ្លះអាចរអិលឬវិលទៅជាប់នឹងហ្គែ៊រ ឬហ្វ្រាំង ដូចជា គ្រឿងកំប៉ុង និងដបទឹកសុទ្ធជាដើម ជាពិសេសរថយន្ដគ្រួសារដែលមានសមាជិកកូនតូច ។ ជាមួយគ្នានេះ ត្រូវធានាថាសម្ភារទាំងនោះរក្សាទុកនៅកន្លែងដែលមានសុវត្ថិភាព ចៀសវាងធ្លាក់នៅពេលកំពុងបើកបរ ។
លោកបន្ដថា អ្នកបើកបរក៏ត្រូវពិនិត្យកញ្ចក់ផងដែរ ប្រសិនបើអ្នកធ្លាប់ឲ្យរថយន្ដទៅមិត្តភក្តិខ្ចី ព្រោះអ្នកផ្សេងអាចកំណត់ទីតាំងកញ្ចក់ដើម្បីតម្រូវតាមស្ថានភាពរបស់គេ។ ប្រសិនមិនបានពិនិត្យឡើងវិញទេ អ្នកអាចនឹងជួបគ្រោះថ្នាក់ជាយថាហេតុ ដោយសារមើលមិនឃើញ។ ដូច្នេះ មុនពេលចេញដំណើរ ត្រូវប្រាកដថាអ្នកអាចមើលតាមកញ្ចក់ឃើញគ្រប់គ្រាន់ ។ ទន្ទឹមនឹងនេះ ក្នុងអំឡុងពេលកំពុងបើកបរ អ្នកត្រូវឧស្សាហ៍មើលសកម្មភាពតាមកញ្ចក់ដើម្បីដឹងថា មានអ្វីខ្លះដែលកំពុងកើតឡើងនៅជុំវិញរថយន្ដ។
លោកថា ៖« ការសម្លឹងមើលនេះ ក៏ជួយឲ្យយើងបើកបរមិនភ្ញាក់ស្មារតីនៅពេលមានអ្វីឆ្លងកាត់ ដូចជាអ្នកថ្មើរជើង ឬរថយន្ដផ្សេងទៀតជាដើម ។ ជាមួយគ្នានេះ មុនពេលប្ដូរទិស ឬគន្លងផ្លូវ យើងត្រូវសម្លឹងមើលកញ្ចក់ជានិច្ច ដើម្បីប្រាកដថា គ្មានឧបសគ្គនៅក្បែរដែលនាំឲ្យមានគ្រោះថ្នាក់ »។
អ្នកបើកបររូបនេះបន្ដថា ខណៈកំពុងផ្ដោតអារម្មណ៍លើស្ថានភាពផ្លូវ អ្នកបើកបរត្រូវសម្លឹងមើលមនុស្ស ឬសត្វដែលនៅតាមផ្លូវ ហើយរក្សាសុវត្ថិភាពរបស់ពួកគេផងដែរ។ ជាមួយគ្នានេះ អ្នកត្រូវដឹងពីស្ថានភាពនៅជុំវិញខ្លួន ដែលគិតថាវានឹងអាចកើនឡើង ។
ទោះជាយ៉ាងនេះក្ដី លោកថា អ្នកបើកបរអាចបែកអារម្មណ៍ ឬបាត់ម្ចាស់ការលើខ្លួនឯងដែរ ប្រសិនមានការជជែករំខានពីអ្នករួមដំណើរ ដែលរារាំងអ្នកមិនឲ្យប្រតិកម្មជាមួយឧបសគ្គនឹងកើតឡើងនៅខាងមុខ ហើយប្រសិនបើអ្នករួមដំណើរសន្ទនារហូតដល់នាំឲ្យមានអារម្មណ៍មួម៉ៅឬខឹងទៀតនោះ ត្រូវរង់ចាំរហូតដល់អ្នកឈប់ ឬចតរថយន្ដដោយសុវត្ថិភាពសិន ដោយសារការមានអារម្មណ៍មិនល្អ ធ្វើឲ្យអ្នកបើកបរពិបាកក្នុងការគ្រប់គ្រងស្ថានភាព ។
យ៉ាងណាក៏ដោយ លោកថា ៖« អ្វីដែលសំខាន់នោះ ចូរប្រាប់អ្នករួមដំណើរក្នុងរថយន្ដថា ខ្ញុំកំពុងបើកបរ ។ ការនិយាយដូច្នេះ អ្នកដទៃនឹងមិនរំខាន ឬធ្វើឲ្យប៉ះពាល់អារម្មណ៍យើងទេ »។
លោកគឹមស្រៀងបន្ដថា ជាទូទៅ អ្នកបើកបរតែងតែចាក់បទចម្រៀង ឬស្ដាប់វិទ្យុពេលផងដែរ ប៉ុន្ដែដើម្បីធានាពីការរំខាន ចូរកុំផ្លាស់ប្តូរប៉ុស្ដិ៍ ឬឌីសចម្រៀងញឹកញាប់ពេក ។ លោកថា ៖« ការធ្វើបែបនេះ នាំឲ្យអ្នកបើកបរបាត់ការផ្ដោតអារម្មណ៍លើអ្វីៗដែលនៅជុំវិញខ្លួន » ។
ចែករំលែកព័តមាននេះ