ខេត្តបាត់ដំបង ៖ ប្រជាពលរដ្ឋដែលចាញ់បោកការវិនិយោគទុនប្រាក់ របស់ក្រុមហ៊ុន(EBC) ប្រមាណ៥០នាក់ ដែលអះអាងថា មកពីខេត្តចំនួន៤បានមកជួបជុំគ្នានៅខាងមុខសាលាខេត្តបាត់ដំបង នៅរសៀលថ្ងៃទី១៣ កុម្ភៈ ដើម្បីពិភាក្សាគ្នាអំពីគម្រោងឡើងទៅរាជធានីភ្នំពេញ…
ខេត្តបាត់ដំបង ៖ ប្រជាពលរដ្ឋដែលចាញ់បោកការវិនិយោគទុនប្រាក់ របស់ក្រុមហ៊ុន(EBC) ប្រមាណ៥០នាក់ ដែលអះអាងថា មកពីខេត្តចំនួន៤បានមកជួបជុំគ្នានៅខាងមុខសាលាខេត្តបាត់ដំបង នៅរសៀលថ្ងៃទី១៣ កុម្ភៈ ដើម្បីពិភាក្សាគ្នាអំពីគម្រោងឡើងទៅរាជធានីភ្នំពេញ ដើម្បីស្នើសុំឲ្យសម្ដេច តេជោ ហ៊ុន សែន ជួយអន្តរាគមន៍។ លោក អ៊ុំ ស មកពីស្រុកសំឡូត បានឲ្យដឹងថា ប្រជាពលរដ្ឋដែល មានកាន់បដាសរសេរខ្លឹមសារនានាផង ហើយមកប្រមូលផ្ដុំគ្នានេះ មានមកពីខេត្តពោធិ៍សាត់ ខេត្តប៉ៃលិន ខេត្តសៀមរាប និងខេត្តបាត់ដំបង។ លោកនិយាយថា ពួកគាត់មកជួបជុំគ្នានេះក្នុងបំណងពិភាក្សាគ្នា អំពីគម្រោងឡើងទៅរាជធានីភ្នំពេញ ដើម្បីស្នើសុំជំនួយពីសម្ដេចតេជោ ហ៊ុន សែន ជួយរកដំណោះស្រាយ រឿងលុយ ដែលពួកខ្លួនចាញ់បោកក្រុមហ៊ុន EBC ម្នាក់ៗរាប់ម៉ឺនដុល្លា។
បើតាមការលើកឡើងរបស់ក្រុម អ្នកចាញ់បោកក្រុមហ៊ុន EBC ទាំងនេះបានឲ្យដឹងថា ពួកគេបានចាញ់កលក្រុមហ៊ុននេះ ដោយសារតែ ភ្នាក់ងាររបស់ក្រុមហ៊ុនអះអាងថា ក្រុមហ៊ុនEBC មានច្បាប់អនុញ្ញាតត្រឹមត្រូវពីក្រសួងមហាផ្ទៃ ក្នុងការរកស៊ីបណ្ដាក់ទុនលុយដែលផ្ដល់ការប្រាក់ខ្ពស់រហូតដល់ទៅ១០% លើសពីការប្រាក់នៅធនាគារ។ ក្រុមនេះបានប្រាប់ថា ដោយសារតែក្រុមហ៊ុមផ្ដល់ការប្រាក់ខ្ពស់ដូច្នេះហើយ ទើបពួកគាត់សម្រេចចិត្ត វេចលុយ យកទៅបណ្ដាក់ទុនជាមួយក្រុមហ៊ុន តែអ្នកខ្លះមិនទាន់ទទួលបានការប្រាក់ផង ស្រាប់តែក្រុមហ៊ុនវេចបង្វិចរត់ចោល ហើយមេៗបានគេចខ្លួនបាត់អស់ ធ្វើឲ្យពួកគាត់ជំពាក់ បំណុលគេគ្រប់ទីកន្លែង។
ជាពិសេសជំពាក់បំណុលធនាគារ ដែលពួកគេយកប្លង់ដីទៅបញ្ចាំ ដើម្បីយកលុយមកវិនិយោគជាមួយក្រុមហ៊ុនEBC ព្រោះតែចង់បានការប្រាក់ខ្ពស់។ ជាមួយនឹងការជួបជុំនេះ ក្រុមអ្នកចាញ់បោកក្រុមហ៊ុនEBC បានបង្ហើបប្រាប់ថា ក្រុមអ្នកចាញ់បោក EBC នៅទូទាំងប្រទេសរាប់ម៉ឺននាក់ អាចនឹងលើកគ្នាទៅកាន់រាជធានីភ្នំពេញ នៅថ្ងៃទី១៩ កុម្ភៈនេះ ដើម្បីសុំអន្តរាគមន៍ពីសម្ដេចតេជោហ៊ុន សែន ឲ្យជួយរកដំណោះជាមួយក្រុមហ៊ុនEBC។ ពួកគេបានបញ្ជាក់ដែរថា ពេលនេះក្រុមអ្នកចាញ់បោកក្រុមហ៊ុនEBCទូទាំងប្រទេស កំពុងជួបជុំពិភាក្សា គ្នារៀបចំគម្រោង ដើម្បីឡើងទៅតវ៉ានៅរាជធានីភ្នំពេញហើយ៕
https://youtu.be/kSzTc7iOATo
ចែករំលែកព័តមាននេះ