ទីក្រុងវ៉ាស៊ីនតោន ៖ រដ្ឋាភិបាលលោកប្រធានាធិបតី ដូណាល់ ត្រាំ នឹងប្រកាសបន្ថែមពីព័ត៌មានលម្អិតនៃគម្រោងវិនិយោគហេដ្ឋារចនាសម្ព័ន្ធដ៏ចាស់ទ្រុឌទ្រោមរបស់សហរដ្ឋអាមេរិក ដែលមានតម្លៃដល់ទៅ១,៥ទ្រីលានដុល្លារឯណោះ ។ ឧត្តមមន្ត្រីក្នុង White…
ទីក្រុងវ៉ាស៊ីនតោន ៖ រដ្ឋាភិបាលលោកប្រធានាធិបតី ដូណាល់ ត្រាំ នឹងប្រកាសបន្ថែមពីព័ត៌មានលម្អិតនៃគម្រោងវិនិយោគហេដ្ឋារចនាសម្ព័ន្ធដ៏ចាស់ទ្រុឌទ្រោមរបស់សហរដ្ឋអាមេរិក ដែលមានតម្លៃដល់ទៅ១,៥ទ្រីលានដុល្លារឯណោះ ។
ឧត្តមមន្ត្រីក្នុង White House និយាយថា ថវិកាសម្រាប់គម្រោងនេះរួមមាន ២០០ប៊ីលានដុល្លារសម្រាប់ការជួសជុលផ្លូវថ្នល់ ស្ពាន និងហេដ្ឋារចនាសម្ព័ន្ធសំខាន់ៗផ្សេងទៀត ។ ក្រោមសំណើនេះ វិនិយោគិនរដ្ឋ និងឯកជននឹងចូលរួមក្នុងការវិនិយោគប្រមាណ១,៣ទ្រីលានដុល្លារបន្ថែមទៀត ។
លោកត្រាំ បានសន្យាថា នឹងជួសជុលហេដ្ឋារចនាសម្ព័ន្ធអាមេរិក ហើយប្រកាសពីគម្រោងតម្លៃ១,៥ទ្រីលានដុល្លារផងដែរកាលពីខែមុន ។
ឧត្តមមន្ត្រីក្នុង White House ថ្លែងថា ៖« ហេដ្ឋារចនាសម្ព័ន្ធ គឺជាកត្តាដ៏សំខាន់មួយសម្រាប់ដំណើរការសេដ្ឋកិច្ចអាមេរិក ។ ភាពជោគជ័យជាច្រើនរបស់យើង គឺជាលទ្ធផលនៃគុណភាពហេដ្ឋារចនាសម្ព័ន្ធដែលយើងមានក្នុងប្រវត្តិសាស្ត្រ ប៉ុន្តែប្រព័ន្ធបច្ចុប្បន្ននេះបានខូចខាតហើយ ។ យើងមិនបានវិនិយោគគ្រប់គ្រាន់លើហេដ្ឋារចនាសម្ព័ន្ធទេ ។ ទោះជាមានថវិកាគ្រប់គ្រាន់ក្តី ក៏យើងត្រូវការរយៈពេលដល់ទៅ១០ឆ្នាំដែរ ទើបអាចសាងសង់បាន » ។
សភាជាតិនឹងចរចាពីសំណើនេះ ហើយលោកត្រាំ នឹងកោះហៅតំណាងរាស្ត្រពីគណបក្សទាំងពីរមកជួបគ្នាក្នុង White House នាថ្ងៃពុធខាងមុខ ។ ពួកគេអាចនឹងសួរលោកត្រាំថា តើថវិកាទាំងនេះបានមកពីណា ? ព្រោះតែការសម្រេចចិត្តលើពន្ធ និងការចំណាយរបស់សភានឹងមានឱនភាព ។
គណៈកម្មាធិការរ៉ាប់រងថវិកាសហព័ន្ធព្យាករថា គម្រោងចំណាយដែលបានសម្រេចដោយសភាកាលពីសប្តាហ៍មុន អាចនឹងបង្កើនឱនភាពដល់ទៅ៤២០ប៊ីលានដុល្លារក្នុងរយៈពេល១០ឆ្នាំខាងមុខ ។ រដ្ឋាភិបាលលោកត្រាំ និយាយថា ថវិកាទាំងនេះនឹងមានប្រភពពីការកាត់បន្ថយការចំណាយលើកម្មវិធីផ្សេងទៀត ។
ទោះជាយ៉ាងណា អ្នកជំនាញព្រមានថា ការខូចខាតផ្លូវថ្នល់ ផ្លូវរថភ្លើង និងប្រព័ន្ធផ្លូវអាកាស អាចនឹងប៉ះពាល់ដល់សេដ្ឋកិច្ចអាមេរិកយ៉ាងខ្លាំង ៕
ចែករំលែកព័តមាននេះ