ខេត្តព្រៃវែង ៖ មន្ត្រីជំនាញសាខាកាំកុងត្រូលខេត្តព្រៃវែង កាលពីព្រឹកថ្ងៃទី១២ ខែកុម្ភៈនេះ បានសហការជាមួយមន្ទីរពាណិជ្ជកម្មខេត្ត ធ្វើការចុះត្រួតពិនិត្យទំនិញ នៅតាមស្តង់លក់ដូរជាច្រើន ក្នុងផ្សារព្រៃវែង តែជាលទ្ធផល…
ខេត្តព្រៃវែង ៖ មន្ត្រីជំនាញសាខាកាំកុងត្រូលខេត្តព្រៃវែង កាលពីព្រឹកថ្ងៃទី១២ ខែកុម្ភៈនេះ បានសហការជាមួយមន្ទីរពាណិជ្ជកម្មខេត្ត ធ្វើការចុះត្រួតពិនិត្យទំនិញ នៅតាមស្តង់លក់ដូរជាច្រើន ក្នុងផ្សារព្រៃវែង តែជាលទ្ធផល គឺពុំបានរកឃើញទំនិញដែលច្បាប់ហាមឃាត់ ឬចំណីអាហារដែលមានដាក់លាយសារធាតុគីមីនោះឡើយ ។
លោក អ៊ុត សុភាព ប្រធានសាខាកាំកុងត្រូលខេត្តព្រៃវែង បានឲ្យដឹងថា ក្នុងសកម្មភាពចុះត្រួតពិនិត្យនេះ មន្ត្រីរបស់លោកបានធ្វើការត្រួតពិនិត្យនៅតាមស្តង់អាជីវករចំនួន១៨ស្តង់ តែពុំបានរកឃើញទំនិញដែលខូចគុណភាពនោះទេ ជាមួយគ្នានេះក៏បានធ្វើតេស្តបឋម លើសំណាកចំនួន៥គំរូដូចជា មឹក បង្គារ ជ្រក់ស្ពៃ សរសៃគុយទាវ និងបាញ់កាញ់ផងដែរ ប៉ុន្តែចំណីអាហារទាំងនោះ គឺសុទ្ធតែពុំមានដាក់លាយសារធាតុគីមីទាំងអស់ ។
លោក អ៊ុត សុភាព បានបញ្ជាក់ថា ផ្សារព្រៃវែងនេះ គឺជាផ្សារទី១ហើយ នៅក្នុងចំណោមផ្សារទាំងអស់នៅក្នុងខេត្តព្រៃវែង ដែលមន្ត្រីជំនាញចុះត្រួតពិនិត្យរកពុំឃើញមាន ដាក់លក់ទំនិញខូចគុណភាព និងចំណីអាហារដែលមិនមានដាក់លាយសារធាតុគីមីនោះ គឺខុសប្លែកពីពេលមុនៗដែលមន្ត្រីកាំកុងត្រូលធ្លាប់ចុះពិនិត្យក្នុងផ្សារ តែងតែបានរកឃើញទំនិញខូចគុណភាព និងចំណីអាហារដែលដាក់លាយសារធាតុគីមី ដែលនេះសរបញ្ជាក់ឲ្យឃើញថា បងប្អូនក្រុមអាជីវករក្នុងផ្សារព្រៃវែងទាំងអស់ បានយល់ច្បាស់ ហើយអំពីផលប៉ះពាល់នៃទំនិញ និងសារធាតុគីមីដែលច្បាប់ហាមឃាត់ ចំពោះសុខភាពរបស់អ្នកបរិភោគ ។
ដោយឡែកបងប្អូនប្រជាពលរដ្ឋក្នុងក្រុងព្រៃវែងឯណោះវិញ ក៏បានបង្ហាញនូវភាពសប្បាយរីករាយជាខ្លាំងផងដែរ នៅពេលឃើញមន្ត្រីជំនាញចុះត្រួតពិនិត្យ ហើយរកឃើញថា ទំនិញ និងចំណីអាហារទាំងអស់ ដែលអាជីវករក្នុងផ្សារព្រៃវែងដាក់លក់ សុទ្ធតែមានគុណភាព និងមិនបង្កផលប៉ះពាល់ដល់សុខភាពរបស់ពួកគាត់ដែលជាអ្នកបរិភោគនោះ ៕
ចែករំលែកព័តមាននេះ