ខេត្តស្ទឹងត្រែង ៖ សត្វស្លាបដ៏កម្រក ត្រយ៉ងយក្សមួយក្បាល ជាសត្វតំណាងឱ្យប្រទេសកម្ពុជា ដែលស្ថិតក្នុងបញ្ជីក្រហមរបស់អង្គការ IUCN ជាប្រភេទសត្វរងគ្រោះជិតផុតពូជបំផុតនៅលើពិភពលោក។ ពួកវារស់នៅក្នុងប្រទេសកម្ពុជា និងតិចតួចនៅក្នុងប្រទេសឡាវ។
សត្វត្រយ៉ងយក្សពេញវ័យត្រូវបានគេប៉ាន់ប្រមាណថា មានចំនួនតែជិត២០០ក្បាលប៉ុណ្ណោះនៅលើពិភពលោក ក្នុងនោះដែរប្រមាណ៩៩%នៃចំនួននេះ មានវត្តមានរស់នៅក្នុងកម្ពុជាដែលនាំឱ្យកម្ពុជាក្លាយជាប្រទេសដ៏សំខាន់បំផុតនៅលើពិភពលោក ដើម្បីអភិរក្សប្រភេទសត្វដ៏កម្រនេះ។ ហើយសត្វត្រយ៉ងយក្ស១ក្បាលត្រូវអ្នកនាំភ្ញៀវទេសចរប្រគល់ជូនអង្គការអភិរក្សសត្វព្រៃ ACCB ខណៈទិញពីអ្នកភូមិក្បែរព្រំដែនឡាវក្នុងតម្លៃ៤ម៉ឺនរៀល។
លោក ហួត វុទ្ធារ៉ា ជាអ្នកនាំភ្ញៀវទេសចរប្រចាំខេត្តឱ្យដឹងថា គ្រាដែលនាំភ្ញៀវទៅកាន់ឃុំអូរស្វាយ ស្រុកថាឡាបរិវ៉ាត់ កាលពីថ្ងៃទី០៧ កុម្ភៈ ក៏ប្រទះឃើញសត្វត្រយ៉ងយក្សមួយក្បាលគ្រុងនៅក្រោមផ្ទះអ្នកភូមិបំរុងកាប់ស៊ី ខណៈនោះក៏សុំទិញដើម្បីយកទៅលែងក្នុងព្រៃលិចទឹក។ បន្ទាប់ពីយកទៅលែងនៅតំបន់រាំសារតាមដងទន្លេមេគង្គ សត្វស្លាបដ៏កម្រនោះហើរមិនបាន១៥ម៉ែត្រផង ក៏ធ្លាក់ចូលទឹកទន្លេធ្វើឱ្យភ្ញៀវទេសចរ រួមនិងរូបគាត់ធ្វើការសង្គ្រោះទាន់ពេល។
ក្រោយមកលោកក៏រាយការណ៍ទៅប្រធានឧទ្យានុរក្សតំបន់រ៉ាមសារ ដើម្បីនាំយកសត្វត្រយ៉ងយក្សនេះមកកាន់ខេត្តស្ទឹងត្រែង។ ជាមួយគ្នានេះផងដែរ លោកក៏ជូនដំណឹងទៅអង្គការ WWF នៅខេត្តក្រចះ ហើយអង្គការក៏រាយការណ៍បន្តទៅកាន់អង្គការ ACCB ដែលមានវេជ្ជបណ្ឌិតផ្នែកសត្វមកជាមួយផងដែរ ដើម្បីទទួលយកសត្វត្រយ៉ងយក្សនេះទៅសង្គ្រោះនៅខេត្តសៀមរាមកាលពីវេលាម៉ោង១០យប់ ថ្ងៃទី០៩ កុម្ភៈ ។
ចំណែកឯវេជ្ជបណ្ឌិតបានឱ្យដឹងថា ក្រោយពីពិនិត្យសត្វត្រយ៉ងយក្សនោះរកឃើញថា បាក់ស្លាបឆ្វេង និងមសុខភាពមិនសូវល្អ ហើយត្រូវនាំទៅថត ពិនិត្យឈាមរកមូលហេតុ ដើម្បីធ្វើការព្យាបាលបន្ត ៕
ចែករំលែកព័តមាននេះ