ខេត្តកោះកុង ៖ សកម្មភាពលួចបូមខ្សាច់ចាក់លប់រំលោភយកដីព្រៃកោងកាងដែលស្ថិតនៅក្នុងសង្កាត់ស្ទឹងវែង ក្រុងខេមរះភូមិន្ទខេត្តកោះកុង ជាតំបន់ការពារដោយក្រសួងបរិស្ថានរាប់សិបហិកតាដែល កោះសន្តិភាព បានចុះផ្សាយកាលពីចុងខែធ្នូ ឆ្នាំ២០១៧ កន្លងទៅថ្មីៗនេះបានបែកធ្លាយរឿងអាស្រូវហើយ ព្រោះដំរីងាប់មិនអាចយកចង្អេរបាំងជិតឡើយ ។
តាមប្រភពពីមន្ត្រីសាលាខេត្តកោះកុងបានទម្លាយឱ្យដឹងថា ករណីលួចបូមខ្សាច់ចាក់លប់រំលោភយកដីក្នុងតំបន់ព្រៃការពារនេះមានបទល្មើស២ផ្សេងគ្នា ។ ទី១- បទល្មើសលួចធ្វើអាជីវកម្មរ៉ែ(បូមខ្សាច់)ដោយគ្មានច្បាប់អនុញ្ញាតិ និងទី២-បទល្មើសរំលោភយកដីក្នុងតំបន់ការពារនិងគ្រប់គ្រងដោយក្រសួងបរិស្ថាន ។
ប្រភពដដែលបានបញ្ជាក់ច្បាស់ថា រឿងនេះស្ថាប័នពាក់ព័ន្ឋនានាក្នុងខេត្តដូចជាប្រធានការិយាល័យភូមិបាលក្រុង ប្រធានមន្ទីរសុរិយោដីខេត្ត ប្រធានមន្ទីររ៉ែនិងថាមពលខេត្ត ការិយាល័យរ៉ែខ្សាច់ ប្រធានមន្ទីរបរិស្ថាន និងអភិបាលរងខេត្តមួយចំនួន បានដឹងយ៉ាងច្បាស់ ប៉ុន្តែខណៈពេលដែលភ្នាក់ងារកាសែតកោះសន្តិភាពខលសួរស្ថាប័នពាក់ព័ន្ឋទាំងនោះតាមទូរស័ព្ទចម្លើយមានតែមួយគត់គឺអត់ដឹង និងចាំចាត់មន្ត្រីឱ្យចុះទៅពិនិត្យមើល (sic) ។
បន្ទាប់មកមន្ត្រីជើងដប់ទាំងនោះបានខលប្រាប់ទៅជនល្មើសលួចបូមខ្សាច់ដែលគេបានឃុបឃឹតគ្នាជាប្រព័ន្ឋរួចជាស្រេចហើយនោះ ឱ្យអូសយកម៉ាស៊ីនបូមខ្សាច់ទៅលាក់ទុករួចប្រាប់មកភ្នាក់ងារ កោះសន្តិភាព វិញម្តងទៀតថា ចុះទៅមើលហើយតែអត់ឃើញសកម្មភាពបូមទេឃើញតែខ្សាច់បូមរួច ។
មន្ត្រីខាងលើបញ្ជាក់ទៀតថា ដោយសារតែចង្អេរមិនអាចបាំងដំរីងាប់បាននៅអំឡុងមួយសប្តាហ៍ដើមខែកុម្ភៈនេះគេឃើញ ម៉ាស៊ីនលួចបូមខ្សាច់ដដែលបានបណ្តែតខ្លួនមកដាក់នៅលើទីតាំងចាស់ធ្វើសកម្មភាពបូមទៀតហើយ ។
មន្ត្រីការិយាល័យរ៉ែ២រូបបានប្រាប់ កោះសន្តិភាព ថា បន្ទាប់ពីការចុះផ្សាយរបស់ កោះសន្តិភាព ភ្លាមលោក ស្រេង ហុង អភិបាលរងខេត្តបានបញ្ជាឱ្យមន្ទីររ៉ែនិងថាមពលធ្វើរបាយការណ៍ពាក់ព័ន្ធនឹងបទល្មើសបូមខ្សាច់នេះ ។ ហើយជំនាញបានររកឃើញថា បរិមាណខ្សាច់ដែលបានលួចបូមនាពេលកន្លងមកមានចំនួនប្រមាណ១២០០០ម៉ែត្រគូបដែលលួចបូមដោយអត់ច្បាប់ និងត្រូវបង់សួយសារចូលរដ្ឋតែជនល្មើសមិនទាន់ចូលខ្លួនបង់នៅឡើយទេ ។
កោះសន្តិភាព បានទាក់ទងទូរស័ព្ទសួរទៅលោក ស្រេង ហុង អភិបាលរងខេត្តពាក់ព័ន្ធនឹងចំណាត់ការតាមផ្លូវច្បាប់ចំពោះបទល្មើសនេះកាលពីព្រឹកថ្ងៃទី៣០ ខែមករា ឆ្នាំ២០១៨ តែបែរជាលោកឆ្លើយត្រលប់ត្រលឹនម្តងឱ្យទៅសួរមន្ទីររ៉ែ ម្តងឱ្យទៅសួរអ្នកលួចបូមទៅវិញ ហាក់ដូចជាគ្មានភាពទទួលខុសត្រូវរួចក៏បិទទូរស័ព្ទតែម្តង ។
នៅព្រឹកថ្ងៃទី៦ ខែកុម្ភៈ ឆ្នាំ២០១៨ លោក សុខ សុទ្ឋី អភិបាលរងខេត្តបានធ្វើការកោះអញ្ជើញស្ថាប័នពាក់ព័ន្ធមកប្រជុំរកដំណោះស្រាយរឿងអាស្រូវខាងលើនេះហើយអ្នកកាសែត និងទូរទស្សន៍ជាច្រើននាក់នៅរង់ចាំស្តាប់លទ្ធផលចំណាត់ការករណីនេះខាងក្រៅសាលប្រជុំរហូតដល់ម៉ោង១២ថ្ងៃត្រង់តែពេលដើរចេញពីសាលប្រជុំភ្លាមលោកអភិបាលរង សុខ សុទ្ឋី បានឆ្លើយសំនួររបស់អ្នកសារព័ត៌មានយ៉ាងខ្លីថា អាជ្ញារខេត្តបានបញ្ជាឱ្យផ្អាកសកម្មភាពបូមហើយតែពាក់ព័ន្ធនឹងរឿងដីព្រៃកោងកាងដែលគេរំលោភយកនោះលោកអភិបាលរងខេត្តរូបនេះឆ្លើយថា មានម្ចាស់តែអត់ស្គាល់ឈ្មោះម្ចាស់ទៅវិញ ។
ប៉ុន្តែមន្ត្រីសាលាខេត្តផ្សេងទៀតបានបង្ហើបថា មានមន្ត្រីក្រសួងមហាផ្ទៃម្នាក់ឈ្មោះ ជា លាងហុង បានមកទិញដីក្នុងតំបន់ខាងលើនេះហើយប្រើមនុស្សរបស់ខ្លួនមួយក្រុមឱ្យលួចបូមខ្សាច់ចាក់បំពេញតែម្តង ។
ប៉ុន្តែនេះគ្រាន់តែជាប្រភពក្រៅផ្លូវការតែប៉ុណ្ណោះ ។ ទោះបីជាលោកអភបាលរងខេត្ត សុខ សុទ្ឋី ថាបានបញ្ជាឱ្យផ្អាកសកម្មភាពបូមខ្សាច់តែនៅត្រឹមរសៀលថ្ងៃទី៧ ខែកុម្ភៈ ឆ្នាំ២០១៨នេះម៉ាស៊ីនបូមខ្សាច់នៅបន្តសកម្មភាពរបស់ខ្លួននៅឡើយទេ ៕
ចែករំលែកព័តមាននេះ