រាជធានីភ្នំពេញ ៖ ប្តីប្រពន្ធ២នាក់បាននាំគ្នាជូនប្អូនជីដូនមួយឡើងយន្តហោះទៅប្រទេសកូរ៉េ លុះត្រលប់មកវិញមកដល់ជិតផ្ទះជួលជួបគ្រោះថ្នាក់ចរាចរ គឺរថយន្តបើកបញ្ច្រាសទិសចរាចរណ៍ បណ្ដាលឲ្យកៀរម៉ូតូដួល ចំណែករថយន្តបង្កបើកជ្រុះកាង ហើយបើករត់គេច តែសំណាងល្អសមត្ថកិច្ចឃាត់បានភ្លាមៗ បង្កឲ្យមានកាភ្ញាក់ផ្អើលកាលវេលាម៉ោង១០នឹង៤០នាទី ថ្ងៃទី០៥ ខែកុម្ភៈ ឆ្នាំ២០១៨ តាមបណ្តោយផ្លូវជាតិលេខ៤ កែងផ្លូវQMI ភូមិជម្ពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
រថយន្តបង្កម៉ាកគា ពណ៌ក្រហម ពាក់ស្លាកលេខ ភ្នំពេញ ២U-០៨៧១ បើកបរដោយបុរសស្ត្រី២នាក់ ក្នុងទិសដៅពីត្បូងទៅជើង ជិះនៅខាងឆ្វេងដៃបញ្ច្រាសទិសដៅចរាចរណ៍ ។ ចំណែកម៉ូតូរងគ្រោះម៉ាកហុងដាឌ្រីម ស៊េរី២០១៦ ពណ៌ខ្មៅ ពាក់ស្លាកលេខ កំពត ១L-៩៦៤៩ ជិះពីរនាក់ប្តីប្រពន្ធបើកបរក្នុងទិសដៅពីកើតទៅលិច ។
តាមប្រភពព័ត៌មានពីកន្លែងកើតហេតុ បាននិយាយថា នៅមុនពេលកើតហេតុ គេឃើញម៉ូតូរងគ្រោះម៉ាកហុងដាឌ្រីម ជិះគ្នា២នាក់ប្តីប្រពន្ធឌុបគ្នាមកពីជូនបងប្អូនជីដូនមួយឡើងយន្តហោះទៅប្រទេសកូរ៉េ បើកក្នុងទិសដៅពីកើតទៅលិច ស្រាប់តែមានរថយន្តបង្ក១គ្រឿង បើកក្នុងទិសដៅពីត្បូងទៅជើងជិះខាងឆ្វេងដៃបញ្ច្រាសទិសដៅចរាចរណ៍ខាងផ្លូវ ជាមួយម៉ូតូបត់ឆ្លងផ្លូវកៀរម៉ូតូរងគ្រោះ បណ្ដាលឱ្យដួលរងរបួសប្រពន្ធធ្ងន់ជាងប្តី ចំណែករថយន្តជ្រុះកាងផ្នែកខាងមុខជាប់ស្លាកលេខនៅកន្លែងកើតហេតុ ហើយរថយន្តបង្កមិនបានឈប់ទេបានព្យាយាមបើករត់គេច ត្រូវបានប្រជាពលរដ្ឋដេញតាមរថយន្តពីក្រោយរហូតដល់ចំណុច ភូមិត្រពាំងពោធិ៍ សង្កាត់ចោមចៅ៣ ជាកន្លែងដែលសមត្ថកិច្ចកំពុងតែដោះស្រាយករណីគ្រោះថ្នាក់ចរាចររវាងម៉ូតូ និងបុកគ្នាមិនទាន់ចប់ផងនោះ ឃើញបែបនេះប្រជាពលរដ្ឋដែលដេញតាមពីក្រោយបានស្រែកឲ្យសមត្ថកិច្ចឃាត់រថយន្តបង្កខាងលបានបុកម៉ូតូ ហើយរត់គេចខ្លួន ក៏ត្រូវកម្លាំងសមត្ថកិច្ចឃាត់បានហើយយករថយន្តបង្កទៅដោះស្រាយនៅកន្លែងកើតហេតុ ។
ក្រោយពេលកើតហេតុ ស្ត្រីជាប្រពន្ធរងរបួសធ្ងន់ត្រូវបានបងប្អូនដឹកតាមរ៉ឺម៉កម៉ូតូយកទៅព្យាបាលនៅមន្ទីរពេទ្យឯកជននៅជិតកន្លែងកើតហេតុផងដែរ ទើបភាគីទាំងសងខាងធ្វើការចរចាគ្នាដោយខាងជនរងគ្រោះបានទាមទារសំណងចំនួន៤០០ដុល្លារ តែភាគីខាងរថយន្តបង្កសុំសម្របសម្រួលសងចំនួន២០០ដុល្លារ បញ្ចប់នៅកន្លែងកើតហេតុ ៕
ចែករំលែកព័តមាននេះ