ខេត្តកំពង់ស្ពឺ ៖ មនុស្ស២នាក់បានរងរបួសធ្ងន់ធ្ងរ ហើយត្រូវបានរថយន្តសង្គ្រោះដឹកយកមកសង្គ្រោះនៅក្នុងគ្លីនិកឯកជនមួយកន្លែង ដោយសារតែរបួសធ្ងន់ធ្ងរពេកបញ្ជូនមកកាន់មន្ទីរព្យេបង្អែកខេត្តដើម្បីសង្គ្រោះ ប៉ុន្តែរបួសធ្ងន់ធ្ងរពេកស្លាប់ម្នាក់ទៅហើយ ដោយសារតែម៉ូតូសង់ជិះលឿនមកបុកម៉ូតូគូបមូលពីក្រោយយ៉ាងពេញទំហឹង ។
ហេតុការណ៍គ្រោះថ្នាក់ចរាចរណ៍ខាងលើបានកើតឡើង កាលពីវេលាម៉ោង០៨និង១០នាទីយប់ ថ្ងៃទី០៤ ខែកុម្ភៈ ឆ្នាំ២០១៨ នៅលើកំណាត់ផ្លូវលេខ៤៤ ត្រង់ចន្លោះគីឡូម៉ែត្រលេខ៣១ទៅលេខ-៣២ ចំណុភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ។
តាមសម្តីរបស់នគរបាលចរាចរណ៍ស្រុកឱរ៉ាល់ បាននិយាយឲ្យដឹងថា នៅមុនពេលកើតហេតុ មានករណីគ្រោះថ្នាក់ចរាចរណ៍រវាងម៉ូតូបុកជាមួយម៉ូតូ បណ្តាលឲ្យរងរបួសធ្ងន់ធ្ងរចំនួន២នាក់ ។ នគរបាលជំនាញបានបន្តទៀតថា នៅមុនពេលកើតហេតុ មានម៉ូតូ១គ្រឿងម៉ាកហុងដា Cub មូល ពណ៌បៃតងចាស់ ពាក់ស្លាកលេខ ភ្នំពេញ ១A-៨០២៤ បើកបរក្នុងទិសដៅពីកើតទៅលិចតែម្នាក់ឯង ដោយជនមិនទាន់ស្គាល់អត្តសញ្ញាណ ភេទប្រុស រងរបួសបាក់ជើងឆ្វេង និងបែកក្បាល (គ្មានមួកសុវត្ថិភាព) លុះដល់ចំណុចកើតហេតុខាងលើ ស្រាប់តែមានម៉ូតូ១គ្រឿងទៀតម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ ១BV-៧៦១៥ បើកបរមកពីក្រោយស្របទិសគ្នាដោយឈ្មោះ សាក់ ចាន់ធៀប ភេទប្រុស អាយុ២០ឆ្នាំ (ពាក់មួកសុវត្ថិភាព) រស់នៅភូមិដីឆ្នាំង ឃុំហោងសំណំ ស្រុកឱរ៉ាល់ ខេត្តកំពង់ស្ពឺ បានបើកបរក្នុងល្បឿនលឿនជ្រុលទៅបុកម៉ូតូ Cub ចំពីក្រោយ បណ្តាលឲ្យដួលរងរបួសធ្ងន់ទាំងសងខាង (២នាក់) ផងដែរ ។
ក្រោយកើតហេតុ នគរបាលបានហៅរថយន្តសង្គ្រោះដឹកយកទៅសង្គ្រោះ ចំណែកម៉ូតូទាំង២គ្រឿងត្រូវបានយកមករក្សាទុកនៅអធិការដ្ឋាននគរបាលស្រុក និងកំពុងកសាងសំណុំរឿងតាមនីតិវិធី ឬឯជនរងគ្រោះឈ្មោះ សាក់ ចាន់ធៀប ត្រូវបានសាច់ញាតិបញ្ជូនទៅមន្ទីពេទ្យឯកជន កំពង់ស្ពឺ និងម្នាក់ទៀតសមត្ថកិច្ចបញ្ជូនទៅសង្គ្រោះនៅមន្ទីពេទ្យបង្អែកខេត្តកំពង់ស្ពឺ បានស្លាប់ គ្រូពេទ្យបានយកសពទៅតម្កល់នៅក្នុងសាលរង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ