រាជធានីភ្នំពេញ ៖ បុរសជាជាងជួសជុលម៉ាស៊ីនត្រជាក់ម្នាក់ ត្រូវបានអ្នកជិតខាងចាប់វ៉ៃប៉ោងមុខផ្តើមចេញពីការលេងសើច ដោយបើកឡានដេញបុកលេង លុះជនរងគ្រោះភ័យស្តីបន្ទោសត្រូវបានជនបង្កចុះមកចាប់វ៉ៃតែម្តង កាលពីវេលាម៉ោង១០យប់ថ្ងៃទី០១ ខែមករា ឆ្នាំ២០១៨ នៅភូមិប៉ប្រ៉កជើង សង្កាត់កាកាប១ ខណ្ឌពោធិសែនជ័យ លុះដល់ព្រឹកថ្ងៃទី០២ ខែមករា នេះទើបជនរងគ្រោះទៅប្តឹងប៉ូលិស ។
ជនរងគ្រោះឈ្មោះ ព្រុំ សំអុល ភេទប្រុស អាយុ៣៦ឆ្នាំ មុខរបរជាងជួសជុលម៉ាស៊ីនត្រជាក់ ស្នាក់នៅផ្ទះជួលលេខ២៤០ ផ្លូវលំកន្លែងកើតហេតុ មានស្រុកកំណើតផ្ទះលេខ១៥៨ ផ្លូវ២១ ភូមិចុងព្រែក ឃុំព្រែកស្តី ស្រុកកោះធំ ខេត្តកណ្តាល ។
សម្តីជនរងគ្រោះបានឲ្យដឹងថា កាលពីវេលាម៉ោង១០យប់ថ្ងៃទី០១ ខែមករា ជនដៃដល់ជាអ្នកស្គាល់រាប់អានគ្នា រស់នៅក្នុងភូមិផ្ទះជាប់គ្នា មិនដឹងថា បើកឡានមកពីណានោះទេ ។ លុះមកដល់ផ្ទះហើយឃើញខ្លួនកំពុងឈរមុខផ្ទះ បែរជាបើករថយន្តដេញបុកធ្វើជាល្បែងលេងសើច ម្តងហើយម្តងទៀត ។
លុះថា ស្តីឲ្យរឿងលេងសើចបែបប្រឈមគ្រោះថ្នាក់ពេក បែរជាខឹងចុះមកចាប់វ៉ៃ បណ្តាលឲ្យរងរបួស លុះទៅប្រាប់ដល់ឪពុកជនដៃដល់ បែរជាមិនសួរនាំមកគម្រាមវ៉ៃបន្ថែមទៀត ទើបភ័យខ្លាចរឿងកាន់តែធ្ងន់ធ្ងរ ទើបរត់គេចទៅដេកសម្រាកផ្ទះសាច់ញាតិ លុះមកដល់ព្រឹកថ្ងៃទី០២ ខែមករា នេះ ទៅប្តឹងនគរបាលប៉ុស្តិ៍កាកាប១ ឲ្យជួយរកយុត្តិធម៌ ៕
ចែករំលែកព័តមាននេះ