ខេត្តស្ទឹងត្រែង ៖ ជនសង្ស័យប្រុសស្រីចំនួន ២នាក់រងការចាប់ខ្លួនដោយកម្លាំងនគរបាលស្រុកឆែប ខេត្តព្រះវិហាក្រោយពីធ្វើសកម្មភាពលួចម៉ូតូមួយគ្រឿងនៅខេត្តស្ទឹងត្រែងបានសម្រេច ហើយមានបំណង គេចខ្លួនទៅខេត្តព្រះវិហារ កាលពីវេលាម៉ោង១០ និង៣០ នាទីយប់…
ខេត្តស្ទឹងត្រែង ៖ ជនសង្ស័យប្រុសស្រីចំនួន ២នាក់រងការចាប់ខ្លួនដោយកម្លាំងនគរបាលស្រុកឆែប ខេត្តព្រះវិហាក្រោយពីធ្វើសកម្មភាពលួចម៉ូតូមួយគ្រឿងនៅខេត្តស្ទឹងត្រែងបានសម្រេច ហើយមានបំណង គេចខ្លួនទៅខេត្តព្រះវិហារ កាលពីវេលាម៉ោង១០ និង៣០ នាទីយប់ ថ្ងៃទី៣១ ខែមករា ឆ្នាំ២០១៨ ស្ថិតនៅភូមិសំអាង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។ តាមប្រភពព័ត៌មានឲ្យដឹងថា ជន សង្ស័យប្រុសស្រីទាំង២នាក់បានប្រព្រឹត្តបទល្មើសក្នុងសកម្មភាពលួចម៉ូតូម៉ាកហុងដា សេ១២៥ មួយគ្រឿង ពណ៌ខ្មៅ ពាក់ស្លាកលេខ ១C-០៥៧៣ ជាកម្មសិទ្ធិរបស់ប្រជាពលរដ្ឋម្នាក់រស់នៅភូមិសំអាង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។ ប្រភពដដែលបន្តថា ជនសង្ស័យក្រោយប្រព្រឹត្តសកម្មភាព លួចម៉ូតូខាងលើបានសម្រេចជិះគេចខ្លួន ហើយត្រូវបានកម្លាំងនគរបាលស្រុកឆែបឆ្ពោះទៅកាន់ ខេត្តព្រះវិហារ តែត្រូវបានកម្លាំងនគរបាលស្រុកឆែប ខេត្តព្រះវិហារស្ទាក់ផ្លូវចាប់ខ្លួនក្រោយទទួលព័ត៌មាន ពីជនរងគ្រោះនាយប់កើតហេតុខាងលើនោះដែរ។
ប្រភពបន្តថា ក្រោយចាប់ខ្លួនជនសង្ស័យ រួមវត្ថុតាងជាក់ស្តែង កម្លាំងនគរបាលស្រុកឆែប ខេត្តព្រះវិហារបានធ្វើកំណត់ពាក់ព័ន្ធសកម្មភាពលួច លុះរសៀលថ្ងៃទី១ ខែកុម្ភៈ២០១៨នេះ កម្លាំងនគរបាលស្រុកឆែបខេត្តព្រះវិហារធ្វើការប្រគល់ ជនសង្ស័យរួមវត្ថុតាងឲ្យទៅកម្លាំងនគរបាលព្រហ្មទណ្ឌស្រុកថាឡាបរិវ៉ាត់ចាត់ការបន្តដោយសារបទល្មើសកើតឡើងនៅដែនដីខេត្តស្ទឹងត្រែង។ លោក ហោ វុទ្ធី នាយការិយាល័យព្រហ្ម ទណ្ឌកម្រិតស្រាល ស្នងការដ្ឋាននគរបាលខេត្ត ស្ទឹងត្រែង បានថ្លែងប្រាប់កោះសន្តិភាពកាលពីល្ងាច ម៉ោង៥និង១៥នាទី ថ្ងៃទី១ ខែកុម្ភៈ ឆ្នាំ២០១៨នេះថា ជនសង្ស័យត្រូវបានបញ្ជូនមកដល់ស្នងការដ្ឋាននគរបាលខេត្តស្ទឹងត្រែង នៅរសៀងម៉ោងជិត៤ល្ងាច ថ្ងៃទី១ ខែកុម្ភៈ ឆ្នាំ២០១៨ បន្ទាប់កិច្ចប្រគល់ក្រោមការសហការណ៍ នៃកងកម្លាំងរវាងខេត្តស្ទឹងត្រែង និងខេត្តព្រះវិហារ។
លោកនាយការិយាល័យព្រហ្មទណ្ឌក ម្រិតស្រាល បានបន្តឲ្យដឹងថា ជនសង្ស័យចំនួន២នាក់ត្រូវជាប្តីប្រពន្ធ ក្នុងនោះឈ្មោះ ដែង ដា ភេទប្រុស អាយុ ១៨ឆ្នាំ សញ្ជាតិខ្មែរ មុខរបរកសិករ រស់នៅភូមិសំអាង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង ជាប្តី និងជនសង្ស័យឈ្មោះ ភាន់ ស្រីរ៉ាច់ ភេទស្រី អាយុ ១៨ឆ្នាំ សញ្ជាតិខ្មែរ មុខរបរកសិករ រស់នៅភូមិឃុំជាមួយគ្នា ហើយស្ត្រីជាប្រពន្ធព្រមទាំមានផ្ទៃពោះជិត៣ខែផងដែរ។ លោកបញ្ជាក់ថា កម្លាំងជំនាញបានធ្វើការសាកសួរជនសង្ស័យទាំ២នាក់នៅស្នងការដ្ឋាននគរបាលខេត្តស្ទឹងត្រែងដោយ ក្នុងនោះលោកកំពុងសាកសួលម្អិតទៅលើនារី សង្ស័យជាប្រពន្ធ ប្រសិនមានបទល្មើសរួម លោកនឹងកសាងសំណុំរឿងបញ្ជូនទៅតុលាការតាមនីតិវិធី តែប្រសិននារីខាងលើមិនបានរួមផ្សំក្នុងបទល្មើសទេ លោកនឹងព្យាយាមសុំគោលការណ៍ថ្នាក់លើដើម្បីដោះបន្ទុកដោយសារឃើញនាងមានផ្ទៃពោះជាប់ខ្លួន៕
ចែករំលែកព័តមាននេះ