ខេត្តសៀមរាប ៖ រយៈពេល២ថ្ងៃ នៅទីតាំងផ្សេងគ្នា កម្លាំងការិយាល័យប្រឆាំងគ្រឿងញៀន បានការចូលរួមសហការជាមួយកម្លាំងចម្រុះ នៃស្នងការដ្ឋានខេត្តសៀមរាប ចុះបង្ក្រាប ករណីរក្សាទុក និងប្រើប្រាស់ដោយខុសច្បាប់នូវសារធាតុញៀន ឈានដល់ធ្វើការឃាត់ខ្លួនបានជនសង្ស័យ ប្រុស ស្រី ចំនួន៤នាក់ រួចបញ្ជូនយកមកសួរនាំនៅការិយាល័យជំនាញ ដើម្បីរៀបចំកសាងសំណុំរឿងបញ្ជូនបន្ត ទៅតុលាការខេត្តចាត់ការទៅតាមនីតិវិធីច្បាប់។ ហេតុការណ៍ឃាត់ខ្លួនជនសង្ស័យប្រុស ស្រីញៀនថ្នាំ ទាំង៤នាក់នោះគឺធ្វើឡើងនៅរយៈពេល២ថ្ងៃ នៅទីតាំងផ្សេងគ្នា គឺថ្ងៃទី៣១ ខែមករា និងថ្ងៃទី១ ខែកុម្ភៈ ឆ្នាំ២០១៨ ស្ថិតនៅក្នុងបន្ទប់ជួលភូមិគ្រួស ភូមិស្វាយដង្គំ សង្កាត់ស្វាយដង្គំ ក្រុង/ខេត្តសៀមរាប។
តាមប្រភពពីសមត្ថកិច្ចជំនាញខេត្តបានប្រាប់ថា ជនសង្ស័យប្រុស ស្រី ទាំង៣នាក់មាន៖ ទី១/ឈ្មោះ ចាន់ ស៊ីវលិញ ហៅសីហា ភេទស្រី អាយុ១៥ឆ្នាំ មុខរបរគ្មាន ទីលំនៅភូមិក្រួស សង្កាត់ស្វាយដង្គំ ក្រុង/ខេត្តសៀមរាប (រក្សាទុក និងប្រើប្រាស់) មានសារធាតុញៀនក្នុងខ្លួន ទី២/ឈ្មោះ អ៊ាក់ ចាន់ណា ភេទប្រុស អាយុ១៩ឆ្នាំ មុខរបរគ្មាន ទីលំនៅភូមិក្រួសសង្កាត់ ស្វាយដង្គំ ក្រុង/ខេត្តសៀមរាប (ចាត់ចែង) មានសារធាតុញៀនក្នុងខ្លួន ទី៣/ឈ្មោះ ប្រាក់ ល័ក្ខ ភេទប្រុស អាយុ១៩ឆ្នាំ មុខរបរគ្មាន ទីលំនៅភូមិក្រួស សង្កាត់ស្វាយដង្គំ ក្រុង/ខេត្តសៀមរាប(ចាត់ចែង) មានសារធាតុញៀនក្នុងខ្លួន និង ទី៤/ឈ្មោះ ហាំ ហុន ហៅរ៉ា ភេទប្រុស កើតឆ្នាំ១៩៩០ មុខរបរគ្មាន រស់នៅភូមិគោកដូង សង្កាត់ក្របីរៀល ក្រុងសៀមរាប(រក្សាទុក និងប្រើប្រាស់)។
ក្រោយកម្លាំងជំនាញឃាត់ខ្លួនក្នុងនោះ ដកហូតបានវត្ថុតាងរួម មាន៖ ម្សៅមេតំហ្វេតាមីនប្រភេទទឹកកកចំនួន០២កញ្ចប់ ស្មើនឹងទម្ងន់០,២ក្រាមទាំងសំបក និងឧបករណ៍ប្រើប្រាស់ថ្នាំញៀនមួយចំនួន និងទូរស័ព្ឌចំនួន២គ្រឿង។ បច្ចុប្បន្នជនសង្ស័យប្រុស ស្រី ទាំង៤នាក់ ត្រូវបានកម្លាំងជំនាញរៀបចំកសាងសុំណុំរឿងបញ្ជូនទៅសាលាដំបូង ដើម្បីចាត់ការទៅតាមនីតិវិធី៕
ចែករំលែកព័តមាននេះ