ខេត្តស្ទឹងត្រែង ៖ «ប៉ាសេអុី» ជាឈ្មោះត្រីមួយប្រភេទត្រីដ៏ពិសេស ប្រចាំតំបន់ភូមិភាគឦសាន ដោយសារតែវាសម្បូរតែនៅខេត្តស្ទឹងត្រែងប៉ុណ្ណោះ ។ អំបូរត្រីប៉ាសេអុី មានបីប្រភេទ គឺប៉ាសេអុី…
ខេត្តស្ទឹងត្រែង ៖ «ប៉ាសេអុី» ជាឈ្មោះត្រីមួយប្រភេទត្រីដ៏ពិសេស ប្រចាំតំបន់ភូមិភាគឦសាន ដោយសារតែវាសម្បូរតែនៅខេត្តស្ទឹងត្រែងប៉ុណ្ណោះ ។ អំបូរត្រីប៉ាសេអុី មានបីប្រភេទ គឺប៉ាសេអុី ប៉ាវ៉ាមុខពីរ និងប៉ាវ៉ា តែងតែប្រទះឃើញនៅ២រដូវក្នុងមួយឆ្នាំ គឺនៅរដូវទឹកដំឡើងចាប់ពីដើមខែឧសភា រហូតដល់ចុងខែកក្កដា និងរដូវរំហើយចាប់ពីដើមខែវិច្ឆិកា រហូតដល់ចុងខែមករា ។
ត្រីទាំងបីប្រភេទនេះ មានរសជាតិប្រហាក់ប្រហែលគ្នា តែត្រីប៉ាសេអុី រសជាតិលេចធ្លោជាងគេ ។ ត្រីប៉ាសេអុីរសជាតិរបស់វា គឺស្ថិតនៅលើខ្លាញ់ មានរសជាតិឆ្ងាញ់លើសបង្កងទៅទៀត ។ ចំណែកត្រីប៉ាវ៉ាមុខ២ និងត្រីប៉ាវ៉ា រសជាតិរបស់វាបង្កប់នៅក្នុងសាច់ បើកាលណាត្រីកាន់តែធំ សាច់របស់វាកាន់តែស្វិតល្អ ហើយមានរសជាតិលើសពីសាច់មាន់ស្ងោរទៅទៀត ។ ដូច្នេះហើយ ទើបត្រីប៉ាសេអុីត្រូវគេឱ្យតម្លៃក្លាយជានិមិត្តរូបខេត្តស្ទឹងត្រែង ហើយបានសាងសង់ជាចម្លាក់ថ្មដ៏ធំតាំងនៅចំកណ្តាលសួនច្បារតាមបណ្តោយមាត់ទន្លេ ។
អ្នកដែលឈានចូលដល់ខេត្តស្ទឹងត្រែងតែងតែមិនភ្លេចត្រីប៉ាសេអុីទេ ហើយគេអាចរកទទួលទានបានតែនៅចន្លោះរដូវទឹកឡើង និងរដូវរំហើយប៉ុណ្ណោះ ។
ប្រជានេសាទឱ្យដឹងកាលពីពេល ថ្មីៗកន្លងមកថា ពីមួយថ្ងៃទៅមួយថ្ងៃពួកគាត់ទន្ទឹងរង់ចាំឈានចូលដល់រដូវរបស់ត្រីបា៉សេអុីចេញពីជម្រក ។ គ្រានោះទូកនេសាទខ្វាត់ខ្វែងលើដងទន្លេដើម្បីរាយមងចាប់ត្រីប៉ាសេអុី បើមានសំណាងនេសាទបានត្រីធំដែលជាត្រីត្រូវខ្នាតនោះ អ្នកនេសាទអរខ្លាំងណាស់ ព្រោះយកទៅទីផ្សារលក់បានថ្លៃខ្ពស់ ។ នារីម្នាក់ប្រកបរបរនេសាទត្រីជាលក្ខណៈគ្រួសារ ហើយជារៀងរាល់ព្រឹកតែងតែយកត្រីទៅកាន់ទីផ្សារ ។ ក្នុងទឹកមុខញញឹមញញែមនាងរៀបរាប់ថា ដល់រដូវរំហើយ ការនេសាទត្រីមានការមមាញឹក ព្រោះជារដូវត្រីប៉ាសេអុី ។ នាងនិយាយថា «នៅលើទីផ្សារត្រីប៉ាសេអុីមានតម្លៃជាងត្រីដទៃ ហើយត្រីប៉ាសេអុីគេបែងចែកតម្លៃតាមខ្នាតត្រីជាបីលក្ខណៈ ។ លក្ខណៈទីមួយត្រីតូចត្រឹមមួយក្បាលទម្ងន់៥ខាំចុះតម្លៃចាប់ពី៦ម៉ឺនរៀលដល់១០ម៉ឺនរៀល ។
លក្ខណៈទី២ត្រីមានទម្ងន់ចាប់ពី១គីឡូក្រាមឡើងរហូតដល់ជិត២គីឡូតម្លៃពី២០ម៉ឺនរៀលរហូតដល់៣០ម៉ឺនរៀល ។ ចំណែកលក្ខណៈទី៣ ជាប្រភេទត្រីខ្នាតទម្ងន់២គីឡូក្រាមកន្លះឡើងទៅ គឺមួយគីឡូក្រាមតម្លៃ៥០ម៉ឺនរៀល ។ តម្លៃទាំងនេះពិតថាវាខ្ពស់ពិតមែន តែប្រភេទត្រីនេះឱ្យតែមានមិនថាច្រើន ឬតិច តូចឬធំនោះឡើយ មានអ្នកប្រមូលទិញគ្មានសេសសល់ឡើយ ។ ប្រសិនជាត្រីចូលខ្នាតនោះទោះបីតម្លៃខ្ពស់យ៉ាងណាក៏ដោយ នៅតែមានអ្នកទទួលយកដែរគ្មានសល់ទេ» ។
ទាក់ទិនតម្លៃត្រីខ្ពស់រហូតដល់មួយគីឡូក្រាម១២៥ដុល្លារ ដែលមហាជនទូទៅមិនអាចទិញយកទៅបរិភោគ តែសម្រាប់អ្នកដែលមានធនធាន គេមិនគិតទៅលើតម្លៃទេ ព្រោះគេយល់ច្បាស់ថាវាមានរសជាតិឆ្ងាញ់ ៕
ចែករំលែកព័តមាននេះ