រាជធានីភ្នំពេញ ៖ នារីវ័យក្មេងម្នាក់បានសម្រេចចិត្តចង.កសម្លាប់ខ្លួន ក្នុងបន្ទប់បានបន្សល់លិខិតបណ្ដាំមួយសន្លឹករៀបរាប់ពីការពិបាកចិត្តរឿងជំពាក់លុយគេច្រើនពេក មិនដឹងថ្ងៃណាបានទៅរស់នៅជួបជុំឪពុកម្តាយវិញទេ នាងនឹករឭកឪពុកម្តាយខ្លាំងណាស់ហេតុការណ៍គួរឲ្យសោកស្តាយនេះ បានកើតឡើងកាលពីវេលាម៉ោង០៦និង៣០នាទីយប់ ថ្ងៃទី២៥ ខែមករា ឆ្នាំ២០១៨ ត្រង់ចំណុចផ្ទះលក់កាហ្វេ លេខ៩៥៤ ផ្លូវបេតុង ភូមិទ្រា២ សង្កាត់ស្ទឹងមានជ័យទី១ ខណ្ឌមានជ័យ ។ នារីដែលចង.កសម្លាប់ខ្លួនមានឈ្មោះ ឆន ស្រីរត្ន័ អាយុ១៥ឆ្នាំ ជាអ្នករត់តុនៅហាងកាហ្វេ ស្នាក់នៅផ្ទះកើតហេតុ មានស្រុកកំណើតនៅឃុំបឹងនិមុល ស្រុកឈូក ខេត្តកំពត ។
បើតាមសម្តីពីស្ត្រីមា្នក់សុំមិនបញ្ចេញឈ្មោះ ដែលជាម្ចាស់ហាងកាហ្វេបានបានរៀបរាប់ប្រាប់ឲ្យដឹងថា នៅមុនពេលកើតហេតុ នារីដែលចង.ករួមទាំងក្មេងៗប៉ុន្មាននាក់ទៀត ដែលធ្វើការនៅក្នុងហាងកាហ្វេបានធ្វើការលក់ដូរជាធម្មតា ។ លុះដល់ល្ងាចថ្ងៃកើតហេតុស្រាប់តែមានអ្នកទូរស័ព្ទមកនាង រួចហើយនាងក៏បានយកទូរស័ព្ទរត់ឡើងទៅនិយាយនៅខាងលើផ្ទះជាន់ទីមួយបាត់ទៅ ។ លុះដល់វេលាកើតហេតុដោយសារតែបាត់នាងយូរពេកមិនឃើញចុះមកវិញ គាត់ក៏បានឡើងទៅមើល ស្រាប់តែឃើញនាងចង.កនឹងកន្សែងពោះគោជាប់នឹងចម្រឹងបង្អួចសម្លាប់ខ្លួន ភ្លាមៗនោះ គាត់ក៏បានស្រែកឆោឡោ ហើយប្រញាប់ប្រញាល់ដឹកតាមរ៉ឺម៉កម៉ូតូយកទៅសង្គ្រោះនៅមន្ទីរពេទ្យព្រកុសុមៈ តែជាអកុសលខណៈពេលទៅដល់មន្ទីរពេទ្យគ្រូពេទ្យប្រាប់ថា យុវតីរងគ្រោះបានដាច់ខ្យលស្លាប់បាត់ទៅហើយ ។
ប្រភពដដែលបានបន្តទៀតថា នារីដែលចង.កសម្លាប់ខ្លួននេះ បានមកធ្វើការជាអ្នករត់តុកាហ្វេនៅផ្ទះកើតហេតុខាងលើអស់រយៈជិត២ឆ្នាំមកហើយ ។ នៅក្នុងអំឡុងរយៈពេលជិត២ឆ្នាំកន្លងមកនេះ នាងបានខ្ចីលុយពីគាត់ចំនួន១,០០០ដុល្លារ ដើម្បីយកទៅឲ្យម្តាយយកទៅសងគេ ។ រហូតមកដល់បច្ចុប្បន្ន សងគាត់នៅសល់តែចំនួន៣លាន១៥ម៉ឺនរៀលតែប៉ុណ្ណោះ ។ កន្លងមកនាងមិនដែលកើតទុក្ខ និងមានរឿងអ្វីជាមួយអ្នកណានោះទេ គ្រាន់តែកន្លងមកនាងបានសុំម្ចាស់ហាងទៅនៅផ្ទះវិញ ដោយប្រាប់ថា ចាំឲ្យម្តាយខ្ចីលុយអង្គការយកមកសង តែគាត់បានប្រាប់ទៅវិញថា ស្នាក់នៅនឹងសិនហើយ ទៅខ្ចីលុយគេនាំតែគេគិតការប្រាក់នោះទេ ។
លុះដល់វេលាកើតហេតុ មិនដឹងថាយុវតីខាងលើមានរឿងអ្វីស្រាប់តែឡើងទៅចង.កសម្លាប់ខ្លួនក្នុងបន្ទប់ជាន់ទី១ បន្សល់ទុកតែសំបុត្រមួយសន្លឹកសរសេររៀបរាប់ថា « ម៉ែពុក តើម៉ែពុកនឹកកូនទេ កូននឹកម៉ែពុក និងបង ក្មួយខ្ញុំម៉េចដែរ តើវាលែងឈឺនៅ ខ្ញុំនឹកក្មួយខ្លាំងណាស់ តើថ្ងៃណាខ្ញុំសងលុយគេរួចទៅ ខ្ញុំពិបាកចិត្តណាស់ សូមត្រឹមតែបានជួបជុំគ្រួសារតែប៉ុណ្ណោះ សុំប៉ុណ្ណឹងបានអត់ បើមិនបានទេ ខ្ញុំលែងនៅទីនេះ ។ នៅទីនេះកំពុងតែមានមនុស្សខូចចិត្ត មនុស្សធ្លាប់តែរីករាយ មនុស្សចូលចិត្តភាពក្អាកក្អាយ ឥឡូវប្រែក្លាយ ។ យប់ចប់នៅមានម៉ែពុក កូននឹកម៉ែពុកខ្លាំងណាស់ តើពុកម៉ែមានដឹងទេ ថាកូនពុកម៉ែខ្លាំងណាស់ ។»
បើតាមសម្តីម្តាយបង្កើតរបស់នារីដែលចង.កសម្លាប់ខ្លួនបានរាប់រៀបប្រាប់ឲ្យដឹងថា ដោយសារតែជីវភាពក្រីក្រគាត់ក៏បានឲ្យកូនស្រីទៅរស់នៅ និងធ្វើការជាមួយគេនៅឯផ្ទះកើតហេតុ ។ បន្ទាប់មកគាត់ក៏បានឲ្យកូនស្រីខ្ចីលុយពីម្ចាស់ហាងចំនួន១,០០០ដុល្លារ ដើម្បីយកទៅសងគេ ។ ពេលដែលជាកូនស្រីរបស់គាត់បើកប្រាក់ខែពីម្ចាស់ហាងក៏បានផ្ញើយកមកឲ្យគាត់ដើម្បីបង្វិលយកទៅសងម្ចាស់វិញជាបន្តបន្ទាប់ ។ កន្លងមកកូនស្រីរបស់គាត់តែងតែប្រាប់គាត់ថាចង់ទៅនៅផ្ទះវិញ ហើយគាត់អាណិតកូនក៏បានទៅខ្ចីលុយគេដើម្បីយកទៅសងម្ចាស់ហាង និងយកកូនត្រលប់មកផ្ទះនៅថ្ងៃទី២៦ ខែមករា ឆ្នាំ២០១៨ ខាងមុខនេះ ។ លុះដល់ល្ងាចថ្ងៃកើតហេតុ ស្រាប់តែកូនស្រីរបស់គាត់បានទូរស័ព្ទទៅគាត់ហើយបាននិយាយគ្នាលេងសើចសប្បាយរីករាយជាធម្មតា រួចកូនស្រីរបស់គាត់ក៏បានសួរគាត់ថា «ម៉ាក់ឯកាលមកយកខ្ញុំ» ហើយគាត់ក៏បានឆ្លើយថា «ម៉ាក់ខ្ចីលុយគេបានហើយ ស្អែកដែលជាថ្ងៃទី២៦ ម៉ាក់នឹងទៅយក» បន្ទាប់មកក៏ស្ងាត់មិនឮកូនស្រីនិយាយទៀតសោះ ហើយគាត់ក៏បានបិទទូរស័ព្ទទៅ ។ ស្រាប់តែដល់វេលាកើតហេតុ ក៏មានទូរស័ព្ទមកប្រាប់ថា កូនស្រីរបស់គាត់បានចង.កសម្លាប់ខ្លួនបាត់ទៅហើយ ។
ក្រោយពេលសមត្ថកិច្ចមូលដ្ឋាន និងសមត្ថកិច្ចជំនាញបានចុះមកត្រួតពិនិត្យ និងធ្វើកោសល្យវិច្ច័យ ឃើញថា ពិតជាស្លាប់ដោយការចង.កសម្លាប់ខ្លួនពិតប្រាកដមែន ។ សពត្រូវបានសមត្ថកិច្ចប្រគល់ទៅក្រុមគ្រួសារដឹកយកទៅធ្វើបុណ្យទៅតាមប្រៃណីនៅឯខេត្តកំពត ដែលជាស្រុកកំណើត ៕
ចែករំលែកព័តមាននេះ