ខេត្តពោធិ៍សាត់ ៖ ក្មេងប្រុសអាយុ៧ឆ្នាំម្នាក់បានស្លាប់ ក្រោយពេលបញ្ជូនដល់មណ្ឌលសុខភាព បន្ទាប់ពីជួបគ្រោះថ្នាក់ចរាចរគោយន្ដកែច្នៃក្រឡាប់ធ្លាក់ចូលប្រឡាយគ្មានទឹក ។ ហេតុការណ៍គ្រោះថ្នាក់ចរាចរនេះបានកើតឡើងលើកំណាត់ផ្លូវជាតិលេខ៥៥ នៅភូមិចំការជ្រៃខាងត្បូង ឃុំអន្លង់រាប ស្រុកវាលវែង កាលពីវេលាម៉ោង១២និង៣០នាទីថ្ងៃត្រង់ ថ្ងៃទី១៩ ខែមករា ឆ្នាំ២០១៨ ។
តាមការផ្ដល់ព័ត៌មានពីនគរបាលស្រុកវាលវែងឲ្យដឹងថា នៅថ្ងៃនោះមានគោយន្តកែច្នៃមួយគ្រឿងដឹកឈើ ហើយនៅលើគោយន្ដនោះមានអ្នកជិះចំនួន៣នាក់ គឺប្ដីប្រពន្ធ និងកូនប្រុសអាយុ៧ឆ្នាំម្នាក់ទៀត ។
គោយន្ដបានធ្វើដំណើរមកដល់ចំណុចកើតហេតុ ស្រាប់តែគាំងចង្កូតបត់មិនកើត ក៏ជ្រុលទៅមុខធ្លាក់ចូលក្នុងប្រឡាយ បណ្ដាលឲ្យក្រឡាប់សង្កត់របួសធ្ងន់ស្រាលទាំង៣នាក់យ៉ាងអាណោចអាធ័ម ។ ពេលបញ្ជូនទៅសង្គ្រោះនៅមណ្ឌលសុខភាពស្រុក បានប៉ុន្មានម៉ោងក្រោយមក កូនប្រុសក៏ដាច់ខ្យល់ស្លាប់បាត់ទៅ ។
ជនរងគ្រោះទី១.ឈ្មោះ ទន់ ប៊ុនទី ភេទប្រុស អាយុ៤៥ឆ្នាំ ជាប្ដី(របួសស្រាល) ទី២.ឈ្មោះ មុំ ថារី ភេទស្រី អាយុ៣៤ឆ្នាំ ជាប្រពន្ធ(របួសធ្ងន់) និងទី៣.ឈ្មោះ ប៊ុន កុម្ភៈ ភេទប្រុស អាយុ៧ឆ្នាំ ត្រូវជាកូន(ស្លាប់) ។ ក្រុមគ្រួសារជនរងគ្រោះខាងលើរស់នៅភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់ ។
សាកសពកូនប្រុសបានធ្វើបុណ្យនៅគេហដ្ឋាននៃសព ក្រោមការចូលរួមពីសាច់ញាតិបងប្អូន និងអ្នកស្រុកអ្នកភូមិនៅក្បែរគ្នានោះ ខណៈពេលដែលឪពុកម្ដាយកំពុងសម្រាកព្យាបាលនៅមន្ទីរពេទ្យបង្អែកខេត្តពោធិ៍សាត់ គួរឲ្យសង្វេគចិត្តណាស់ ៕
ចែករំលែកព័តមាននេះ