ខេត្តកំពត ៖ បុរសពីរនាក់ ម្នាក់ស្លាប់ និងម្នាក់រងរបួសធ្ងន់ ដោយជួបឧប្បត្តិហេតុម៉ូតូ និងម៉ូតូបុកគ្នាលើកំណាត់ផ្លូវជាតិលេខ៣ កំពត-ខេត្តព្រះស៊ីហនុ ស្ថិតក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពតកាលពីល្ងាចថ្ងៃទី១៦ ខែមករា ដែលបើកក្នុងទិសដៅបញ្ជ្រាសគ្នា ។
មន្ត្រីនគរបាលចរាចរណ៍ខេត្តកំពតបានឲ្យដឹងថា ជនរងគ្រោះដែលស្លាប់បាត់បង់ជីវិតមានឈ្មោះលី សុប ភេទប្រុស អាយុ២៩ឆ្នាំ មានទីលំនៅភូមិបឹងតារោង ឃុំព្រៃឃ្មុំ ស្រុកទឹកឈូ ខេត្តកំពត ។
ចំណែកភាគីម្ខាងទៀតដែលរងរបួសធ្ងន់ឈ្មោះ អ៊ិន បុត្រា ភេទប្រុស អាយុ៣១ឆ្នាំ មានទីលំនៅភូមិសុវណ្ណសាគរ សង្កាត់កំពង់កណ្តាល ក្រុងកំពត ខេត្តកំពត ។ ប្រភពពីនគរបាលចរាចរណ៍ខេត្តឲ្យដឹងថា មុនពេលកើតហេតុគេឃើញបុរសម្នាក់ជិះម៉ូតូស្កូបពីក្នុងទិសដៅពីជើងទៅត្បូងលុះដល់ចំណុចកើតហេតុស្រាប់តែមានបុរសម្នាក់ទៀតជិះម៉ូតូម៉ាក សេ១២៥ មកពីត្បូងដល់ចំណុចកើតហេតុក៏បុកគ្នាពេញទំហឹងបណ្តាលឲ្យម៉ូតូដួលរៀងៗខ្លួន ។
ភ្លាមៗនោះក៏មានអ្នកនៅក្បែរកន្លែងកើតហេតុបានចូលទៅជួយលើកម៉ូតូ និងជនរងគ្រោះ ស្រាប់តែឃើញភាគីខាងម៉ូតូសេ១២៥ ដេកសន្លប់ផ្កាប់មុខ និងមានឈាមហូរចេញពីថ្ងាស ព្រមទាំងដិតដាមលើផ្លូវជាច្រើន ។ ចំណែកភាគីខាងម៉ូតូស្កុបពី ស្ថិតក្នុងស្ថានភាពរបួសធ្ងន់ដោយវង្វេងវង្វាន់ស្មារតីមិនអាចសួរនាំអ្វីបានឡើយ ។
មន្ត្រីនគរបាលចរាចរណ៍បានបញ្ជាក់ថា គ្រាដែលសមត្ថកិច្ចជួយជ្រោមជ្រែងបញ្ជូនទៅសង្គ្រោះនោះ ក្រុមគ្រូពេទ្យបានប្រាប់ថា ភាគីខាងម៉ូតូសេ១២៥បានបាត់បង់ជីវិតទៅហើយ ៕
ចែករំលែកព័តមាននេះ