រាជធានីភ្នំពេញ ៖ ភាពរឹងមាំនៃកំណើនសេដ្ឋកិច្ចក្នុងរង្វង់៧%ជាច្រើនឆ្នាំមកនេះ បានធ្វើឲ្យកម្ពុជាមានលទ្ធភាពក្នុងការអភិវឌ្ឍប្រទេសដោយខ្លួនឯង និងមិនបារម្ភពីការគំរាមកំហែងកាត់ជំនួយ ឬទណ្ឌកម្មសេដ្ឋកិច្ចណាមួយពីបរទេសឡើយ ។ នេះបើតាមការអះអាងពីមន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ ហើយការលើកឡើងនេះ ក៏ធ្វើឲ្យមហាជន ពិសេសវិនិយោគិនទាំងក្នុងនិងក្រៅស្រុក ដែលកំពុងបោះទុនវិនិយោគនៅកម្ពុជាមានទំនុកចិត្ត និងអស់ក្ដីបារម្ភផងដែរ ។
ថ្លែងក្នុងវេទិកាសាធារណៈស្ដីពី «ថវិកាឆ្នាំ២០១៨» ដែលបានរៀបចំឡើងនៅក្រសួងសេដ្ឋកិច្ច និងហិរញ្ញវត្ថុ នាព្រឹកថ្ងៃទី១៥ មករា ម្សិលមិញ លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងថា ដោយសារគោលនយោបាយគ្រប់គ្រងថវិកាជាតិបានល្អ និងមានប្រសិទ្ធភាពខ្ពស់ ធ្វើឲ្យការប្រមូលចំណូលថវិកាជាតិក្នុងរយៈពេល៥ឆ្នាំចុងក្រោយនេះបានកើនឡើងយ៉ាងច្រើន ដែលអាចកត់ត្រាបានថា ជាសមិទ្ធកម្មមួយដ៏ល្អក្នុងប្រវត្តិសាស្ត្រនៃការកើនចំណូល បើធៀបនឹងប្រទេសផ្សេងៗ ក្នុងតំបន់ ។ ចំណែកការចំណាយរបស់រដ្ឋក្នុងរយៈពេល៥ឆ្នាំនេះ ក៏ទាបជាងចំណូលដែរ ដែលធ្វើឲ្យរាជរដ្ឋាភិបាលសល់អតិរេកច្រើន (ផលលើស) ដែលជាកម្លាំងមួយយ៉ាងខ្លាំងសម្រាប់ការពារសេដ្ឋកិច្ចជាតិក្នុងករណីមានវិបត្តិណាមួយកើតឡើង ។
លោករដ្ឋលេខាធិការថ្លែងថា ៖« ប្រទេសយើង បើធៀបនឹងឆ្នាំ១៩៩៨ ឬឆ្នាំ២០០៨ យើងបានដើរមកដល់ឆ្ងាយហើយ ថ្វីដ្បិតតែយើងត្រូវធ្វើដំណើរវែងឆ្ងាយបន្ដទៀត ប៉ុន្ដែយើងបានដើរឆ្ងាយហើយ » ។ លោកថា ៖« ទាំងមូលដ្ឋានសេដ្ឋកិច្ច និងភាពរឹងមាំនៃសមត្ថភាព យើងឃើញថា មានភាពរឹងមាំច្រើន ។ ទី២ យើងមានការត្រៀមខ្លួន ព្រោះថា ការគំរាមកំហែងណាមួយ វាជាឱកាសដែលធ្វើឲ្យយើងខ្លាំងខ្លួនឯងទៅវិញទេ ។ ទោះបីយ៉ាងណា យើងនៅតែទ្រទ្រង់ខ្លួនឯងបាន ហើយក៏វាអាចជាយន្ដការក្នុងការកែទម្រង់សេដ្ឋកិច្ចរបស់យើងឲ្យខ្លាំងថែមទៀត ។ ចំណែកជំនួយ វាហាក់ដូចជាគ្មានប្រសិទ្ធភាពទេ ។ ដូចអស់លោកឃើញស្រាប់ហើយពីចំណូលចំណាយថវិកាជាតិ និងផលលើសសម្រាប់គ្រប់គ្រងហានិភ័យ គឺយើងមានលទ្ធភាពគ្រប់គ្រងបាន ហើយក៏គ្មានប្រទេសណាធ្វើទណ្ឌកម្មសេដ្ឋកិច្ចមានប្រសិទ្ធភាពលើនយោបាយដែរ » ។
លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ និងជាអ្នកស្រាវជ្រាវសេដ្ឋកិច្ច បានយល់ស្របនឹងការលើកឡើងនេះដោយសារតែរាជរដ្ឋាភិបាលមានព័ត៌មានច្រើនដែលអាចធ្វើការវិភាគបានស៊ីជម្រៅ និងច្បាស់លាស់ ។
ថ្លែងក្នុងបទសម្ភាសន៍ជាមួយអ្នកសារព័ត៌មាននាឱកាសនោះដែរ លោក ច័ន្ទ សុផល បានមានប្រសាសន៍ថា ៖« ចំពោះការយល់ឃើញរបស់ខ្ញុំផ្ទាល់ ក៏ដូចជាទទួលបានព័ត៌មានផ្សេងៗ ក៏មិនសូវជាបារម្ភអ្វីដែរលើបញ្ហាដាក់ទណ្ឌកម្មសេដ្ឋកិច្ចមកលើប្រទេសកម្ពុជាយើង » ។
« ខ្ញុំយល់ថា គេប្រហែលជាមិនដាក់ផងទេ ហើយប្រសិនគេដាក់ ក៏ប្រទេសកម្ពុជាយើងមានសមត្ថភាពក្នុងការគ្រប់គ្រងហានិភ័យនេះបានដែរ » ។ នេះបើតាមលោក ច័ន្ទ សុផល ។
យោងតាមឯកសារស្ដីពីច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០១៨ ផលិតផលពិតក្នុងស្រុកសរុបសម្រាប់ឆ្នាំ២០១៨ ត្រូវបានព្យាករណ៍មានកំណើន៦,៩%ដូចការប៉ាន់ប្រមាណក្នុងឆ្នាំ២០១៧ដែរ ដែលគាំទ្រដោយវិស័យសំខាន់៣ គឺកសិកម្ម នឹងមានកំណើន២%, ឧស្សាហកម្ម៨,៦% និងសេវាកម្ម៧,៦% ។ ចំណែកចំណូលសម្រាប់មនុស្សម្នាក់ក្នុងឆ្នាំ២០១៨ ត្រូវបានព្យាករណ៍ថា នឹងកើនដល់១.៥៦៨ដុល្លារអាមេរិក ខណៈឆ្នាំ២០១៧ កន្លងទៅ ស្មើនឹងប្រមាណ១.៤៣៥ដុល្លារ។ ដោយឡែក ទុនបម្រុងអន្តរជាតិត្រូវបានព្យាករណ៍ស្មើនឹង១០.៥១៨លានដុល្លារ ហើយទុនបម្រុងនេះ អាចគ្រប់គ្រងនាំចូលទំនិញ និងសេវាកម្ម ស្មើនឹង៦ខែកន្លះ (៦,៥) ខែ ។
រាជរដ្ឋាភិបាលមិនត្រឹមតែមានលទ្ធភាពក្នុងការគ្រប់គ្រងចំណូល-ចំណាយ និងសល់អតិរេកសម្រាប់ដោះស្រាយហានិភ័យប៉ុណ្ណោះទេ ថែមទាំងបាននិងកំពុងខិតខំកាត់បន្ថយ ឬលុបពន្ធមួយចំនួនដែលពាក់ព័ន្ធនឹងការចំណាយរបស់ប្រជាពលរដ្ឋទូទៅ ហើយចំណាយពាក់ព័ន្ធនឹងសេវាសាធារណៈមួយចំនួនក៏បានកាត់បន្ថយ ឬលុបបំបាត់ផងដែរដូចជា ភាស៊ីផ្សារ និងការបង់ពន្ធផ្លូវ ជាដើម ។ ចំណែកថ្មីៗនេះ រាជរដ្ឋាភិបាលបានបង្កើនការចំណាយទៅលើសេវាសាធារណៈ ថ្មីៗ ជាពិសេសទៅលើសេវាថែទាំសង្គម និងវិនិយោគសាធារណៈផ្សេងៗទៀត ។
បើទោះបីជាកម្ពុជាមានជំហររឹងមាំ តែយ៉ាងណាក៏ដោយ ក៏មានបញ្ហាប្រឈម និងហានិភ័យមួយចំនួនពីកត្តាខាងក្នុង និងខាងក្រៅផងដែរដូចជា សម្ពាធចំណាយថវិកា, បន្ទុកបុគ្គលិក ក្នុងខណៈដែលចំណូលថវិកាកៀកនឹងពិដាននៃសក្ដានុពល ។ និនា្នការកើនឡើងនៃថ្លៃប្រេង និងសម្ពាធនៃថ្លៃម្ហូបអាហារ ព្រមទាំងបញ្ហាប្រឈមផ្សេងៗទៀតដូចជា ថ្លៃអគ្គិសនីខ្ពស់, ប្រព័ន្ធដឹកជញ្ជូន និងឡូជីស្ទីកនៅទន់ខ្សោយ,កំណើនប្រាក់ឈ្នួលអប្បបរមា,ផលិតភាពទាប និងកង្វះជំនាញ ជាដើម ។
ចំណែកកត្តាខាងក្រៅមានដូចជា កំណើនសេដ្ឋកិច្ចប្រទេសអភិវឌ្ឍន៍មានកម្រិតទាប, និន្នាការនៃគោលនយោបាយគាំពារនិយមនៅតែបន្ដ,ភាពប្រកួតប្រជែងខ្លាំងក្នុងតំបន់ និងការដាក់ឲ្យអនុវត្តកិច្ចព្រមព្រៀងពាណិជ្ជកម្មសេរី(FTA)រវាងសហភាពអឺរ៉ុប និងវៀតណាម,ការថមថយកំណើនសេដ្ឋកិច្ចចិន និងបញ្ហាភូមិសាស្ត្រនយោបាយ និងភូមិសាស្ត្រសេដ្ឋកិច្ចក្នុងពិភពលោក ៕
ចែករំលែកព័តមាននេះ