រាជធានីភ្នំពេញ ៖ សក្ដានុពលវិនិយោគក្នុងតំបន់ភាគខាងជើងនៃរាជធានីភ្នំពេញ នៅរយៈពេលចុងក្រោយនេះ ហាក់មានសន្ទុះងើបខ្លាំង និងបានក្លាយជាចំណាប់អារម្មណ៍របស់វិនិយោគិន ក្នុង និងក្រៅស្រុកសម្រាប់អភិវឌ្ឍន៍ជាតំបន់លំនៅឋាន និងពាណិជ្ជកម្មដ៏មានសក្ដានុពល ។ ជាក់ស្ដែងគម្រោងអភិវឌ្ឍន៍ផ្ទះពាណិជ្ជកម្មថ្មីមួយរបស់វិនិយោគិនក្នុងស្រុក បានចាប់ផ្ដើមប្រកាសសាងសង់ជាផ្លូវការជាប់នឹងផ្សារទំនើបអ៊ីអនទី២ ក្នុងសង្កាត់ភ្នំពេញ ខណ្ឌសែនសុខ ។
លោកឧកញ៉ា សេង ញ៉ក់ នាយកគ្រប់គ្រងគម្រោង ដឹង ព្រេមៀ ដែលជាគម្រោងផ្ទះពាណិជ្ជកម្មថ្មី បានអោយដឹងថា មូលហេតុដែលក្រុមហ៊ុនសម្រេចវិនិយោគនៅតំបន់នេះ ដោយមើលឃើញថា ភ្នំពេញថ្មីបច្ចុប្បន្នខុសពីអតីតកាល ។ បច្ចុប្បន្នតំបន់ភ្នំពេញ មានផ្សារទំនើបធំៗ មានបុរី មានមជ្ឈមណ្ឌលសន្និបាត និងជាពិសេសមានផ្សារបោះដុំធំដំបូងគេទៀតផង ។ លោកឧកញ៉ាថា ៖ «ខ្ញុំជឿជាក់ថា នៅថ្ងៃអនាគត ការអភិវឌ្ឍន៍នៅក្នុងតំបន់មួយនេះកាន់តែមានសន្ទុះបន្ថែមទៀត ទាំងការរស់នៅ និងធ្វើអាជីវកម្ម » ។
លោកឧកញ៉ាបន្តថា គម្រោងអាជីវកម្ម និងលំនៅឋានប្រណីតថ្មីនេះ នឹងចូលរួមជាផ្នែកមួយទៀតនៃភាពរីកមច្រើននៃវិស័យអចលនទ្រព្យ តាមរយៈការបង្កើតតំបន់សេដ្ឋកិច្ច ជាពិសេសធ្វើអោយរាជធានីភ្នំពេញ កាន់តែមានភាពទាន់សម័យបន្ថែមទៀត ។លោកឧកញ៉ានិយាយថា៖ «យើងនឹងជំរុញអោយមានការធ្វើអាជីវកម្មកាន់តែផុសផុលឡើង ក្រោយពេលដែលគម្រោងរបស់យើងបានសាងសង់រួចរាល់ ដោយមិនទុកអោយអតិថិជនរបស់យើងទិញ ហើយទុកចោលនោះទេ គឺយើងចង់ឃើញសកម្មភាពពាណិជ្ជកម្ម នៅតំបន់ភ្នំពេញថ្មីកាន់តែខ្លាំងឡើងនៅពេលខាងមុខនេះ » ។
លោក អៀង អូននី អភិបាលរងរាជធានីភ្នំពេញ បានមានប្រសាសន៍ថា ក្នុងរយៈពេលជាងមួយទស្សវត្ស៍ចុងក្រោយនេះ ការអភិវឌ្ឍន៍នៅរាជធានីភ្នំពេញ បានកើនឡើងជាបន្តបន្ទាប់ ទាំងសំណង់អគារ សំណង់លំនៅឋាន ផ្សារទំនើបធំជាង ។ គិតត្រឹមឆ្នាំ ២០១៧ កន្លងទៅថ្មីៗនេះ រាជធានីភ្នំពេញមានអគារខ្ពស់ចំនួន ៩៧៩អគារ ក្នុងនោះពីកម្ពស់៥ជាន់ដល់ ៩ជាន់ មាន ៥៧៩អគារ កម្ពស់១០ជាន់ ដល់១៩ជាន់ មាន២៩០អគារ កម្ពស់២០ជាន់ដល់២៩ជាន់ មាន៧០អគារ កម្ពស់៣០ជាន់ដល់៣៩ជាន់ មាន២៩ជាន់ និងកម្ពស់ចាប់ពី៤០ជាន់ឡើងទៅមានចំនួន១១អគារ ។ ម្យ៉ាងវិញទៀតសំណង់បុរីដែលសាលារាជធានីភ្នំពេញអនុញ្ញាតិអោយសាងសង់មានចំនួន១៨០បុរី ។
លោកបន្តថា ទន្ទឹមនឹងមានការរីកចម្រើននៃវិស័យសំណង់នេះ នៅក្នុងឆ្នាំ ២០១៧កន្លងទៅនេះ លិខិតស្នើសុំបើកការដ្ឋានសាងសង់ មានចំនួន៧៣ការដ្ឋាន កើនឡើងប្រមាណ១៧ភាគរយធៀបនឹងឆ្នាំ ២០១៦ ។ បើទោះបីជាមានការរីកចម្រើនយ៉ាងណាក្តី ក៏វិស័យសំណង់នេះ ជួបបញ្ហាមួយចំនួន ជាក់ស្ដែងគម្រោងខ្លះទទួលបានលិខិតសាងសង់រួចហើយ តែមិនសាងសង់ ហើយគម្រោងខ្លះទៀតសាងសង់ខុសពីប្លង់ដែលបានដាក់ស្នើសុំទៅក្រសួងជាដើម ។
គួរបញ្ជាក់ថា បើតាមការវាយតម្លៃពីអ្នកជំនាញវិស័យអចលនទ្រព្យ បានអោយដឹងថា តំបន់ភាគខាងជើងនៃរាជធានីភ្នំពេញ ហាក់មានសកម្មភាពវិនិយោគខ្លាំងនៅក្រោយកម្ពុជា ជួបវិបត្តិកាលពីឆ្នាំ ២០០៨កន្លងមក ហើយសន្ទុះនេះវិស័យសំណង់ និងអចលនទ្រព្យនេះទៀតសោត ក៏បានរួមចំណែកយ៉ាងសំខាន់នៅក្នុងកំណើនសេដ្ឋកិច្ចរបស់កម្ពុជា តួយ៉ាងក្នុងឆ្នាំ ២០១៧ សេដ្ឋកិច្ចកម្ពុជា សម្រេចបាន៦,៩ភាគរយ ដោយក្នុងនោះ វិស័យសំណង់ និងអចលនទ្រព្យក៏មានចំណែកធំមួយនៅក្នុងកំណើននេះដែរ ៕
ចែករំលែកព័តមាននេះ