ខេត្តបាត់ដំបង ៖ អ្នកផ្ទុកមេរោគអេដស៍នៅក្នុងឃុំរកា ស្រុកសង្កែម្នាក់ទៀតហើយបានស្លាប់ កាលពីល្ងាចថ្ងៃទី៨ មករា គឺក្រោយមួយថ្ងៃដែលអគារមន្ទីរពេទ្យបង្អែករកា នៅក្នុងឃុំរកា ដែលជាទីតាំងរក្សាទុកនូវឯកសារ សម្ភារពេទ្យ…
ខេត្តបាត់ដំបង ៖ អ្នកផ្ទុកមេរោគអេដស៍នៅក្នុងឃុំរកា ស្រុកសង្កែម្នាក់ទៀតហើយបានស្លាប់ កាលពីល្ងាចថ្ងៃទី៨ មករា គឺក្រោយមួយថ្ងៃដែលអគារមន្ទីរពេទ្យបង្អែករកា នៅក្នុងឃុំរកា ដែលជាទីតាំងរក្សាទុកនូវឯកសារ សម្ភារពេទ្យ និងថ្នាំវ៉ាក់សាំងសម្រាប់ថែទាំអ្នកជំងឺ ត្រូវអគ្គិភ័យឆាបឆេះគ្មានសល់នាវេលាពាក់កណ្ដាលអធ្រាត្រ ។សមាជិកក្រុមប្រឹក្សាឃុំរកាបានឱ្យដឹងថា ជនរងគ្រោះដែលស្លាប់ដោយជំងឺអេដស៍ចុងក្រោយឈ្មោះ ឈឿន ឈុក ភេទស្រី អាយុ៦៦ឆ្នាំ ។ ស្ត្រីរងគ្រោះរូបនេះគឺជាជនរងគ្រោះទី២៧ដែលបានស្លាប់ដោយសារជំងឺអេដស៍ ក្នុងចំណោមអ្នកផ្ទុកជំងឺអេដស៍នៅក្នុងឃុំរកាសរុបចំនួន២៩៤នាក់ ។ បើតាមមន្ត្រីក្រុមប្រឹក្សាឃុំដដែលបានបញ្ជាក់ថា ក្នុងចំណោមជនរងគ្រោះដែលបានស្លាប់ដោយសាររោគសង្គមនេះ ភាគច្រើនជាមនុស្សចាស់ជរា ដែលឈឺធ្ងន់ធ្ងរដាច់បាយ ដាច់ទឹក បាក់កម្លាំងបើទោះជាក្រុមគ្រូពេទ្យបានប្រឹងប្រែងជួយព្យាបាលយ៉ាងណាក្ដី ។
សូមបញ្ជាក់ដែរថា មុនពេលស្ត្រីរងគ្រោះខាងលើនេះស្លាប់មួយថ្ងៃ គឺនៅវេលាម៉ោងជាង១១យប់ ថ្ងៃទី៧ មករា អគារមន្ទីរពេទ្យបង្អែករកា ស្ថិតក្នុងឃុំរកា ស្រុកសង្កែ ដែលជាអគារសម្រាប់រក្សាទុកនូវឯកសារ សម្ភារពេទ្យ និងជាកន្លែងរក្សាទុកនូវថ្នាំសង្កូវ។ ពិសេសរក្សាទុកថ្នាំវ៉ាក់សាំងសម្រាប់ថែទាំអ្នកជំងឺ បានត្រូវអគ្គិភ័យឆាបឆេះអស់គ្មានសល់ ។ បើតាមរបាយការណ៍របស់សមត្ថកិច្ចជំនាញបានធ្វើការសន្និដ្ឋានជំហានដំបូងថា អគ្គិភ័យនោះអាចបណ្ដាលមកពីការទុស្សេខ្សែរភ្លើង ដែលតភ្ជាប់ជាមួយទូរក្សាស៊ីតុណ្ហភាពថ្នាំពេទ្យ ។
បើតាមការប៉ាន់ស្មានជាបឋមនៃការខូចខាតដែលក្រុមគ្រូពេទ្យបានរាយការណ៍ប្រាប់សមត្ថកិច្ច គិតជាទឹកប្រាក់ប្រមាណពី៥ទៅ៦ម៉ឺនដុល្លារ ហើយរហូតដល់ពេលនេះមិនទាន់មានការរុះរើអគារនេះនៅឡើយទេ ដោយមន្ត្រីពេទ្យអះអាងថា ទុកឱ្យខាងក្រសួងចុះមកពិនិត្យនិងវាយតម្លៃ ។គួរំលឹកដែរថា អ្នកផ្ទុកមេរោគអេដស៍នៅក្នុងឃុំរកា ត្រូវបានគ្រូពេទ្យរកឃើញតាមរយៈការធ្វើតេស្ដឈាមក្នុងអំឡុងឆ្នាំ២០១៤ មានសរុបចំនួន២៩៤នាក់ ហើយរហូតមកដល់ត្រឹមថ្ងៃទី៨ មករា ២០១៨នេះ មានអ្នកស្លាប់ចំនួន២៧នាក់ហើយ ក្រោមស្នាដៃគ្រូពេទ្យគ្មានក្របខ័ណ្ឌនិងគ្មានវិជ្ជាជីវៈម្នាក់ឈ្មោះ យ៉ែម ជ្រិន ដែលជាអ្នកចម្លងមេរោគនេះដល់ជនរងគ្រោះតាមរយៈការប្រើម្ជុលចាក់ថ្នាំព្យាបាល ។ នេះបើយោងតាមរបាយការណ៍របស់ក្រុមប្រឹក្សាឃុំរកា ស្រុកសង្កែ ដែលបានឱ្យដឹងកាលពីថ្ងៃទី៩ មករានេះ ។
គ្រូពេទ្យ យ៉ែម ជ្រិន អាយុ៥៦ឆ្នាំ ដែលមជ្ឍដ្ឋាននានាផ្ដល់រហ័ស្សនាមថាជា«គ្រូពេទ្យមច្ចុរាជ»ត្រូវសមត្ថកិច្ចចាប់ខ្លួន ក្រោយពីផ្ទុះនូវសំណុំរឿងសម្លាប់មនុស្សដោយវិធីព្យាបាលជំងឺនេះ ។ ទណ្ឌិតរូបនេះត្រូវតុលាការខេត្តបាត់ដំបង ប្រកាសទោសជាសាធារណៈកាលថ្ងៃទី៣ ធ្នូ ២០១៥កន្លងទៅ ដោយផ្តន្ទាទោសឱ្យជាប់គុកចំនួន២៥ឆ្នាំ ពិន័យជាប្រាក់ចំនួន៥លានរៀលចូលថវិការដ្ឋ និងបង់សំណងរដ្ឋប្បវេណីជូនជនរងគ្រោះចំនួន១២០នាក់ ក្នុងម្នាក់ៗចាប់ពី២លានរៀលដល់១២លានរៀល ។
ស្ថាប័នអយ្យការបានសម្រេចចោទប្រកាន់ជននេះចំនួន៣ករណី តែត្រូវប្ដូរបទចោទ១វិញគឺពីបទ«ឃាតកម្មដោយអំពើឃោរឃៅ»តាមបញ្ញត្តិមាត្រា២០៥ នៃក្រមព្រហ្មទណ្ឌ មកជាបទ«ទារុណកម្មដែលមានស្ថានទម្ងន់ទោសដោយសារតែមរណភាពនៃជនរងគ្រោះ»តាមបញ្ញត្តិមាត្រា២១៥នៃក្រមព្រហ្មទណ្ឌវិញ ។ ប៉ុន្តែបទចោទចំនួន២ទៀតនៅរក្សាដដែល គឺពីបទ«បើកកន្លែងពិគ្រោះព្យាបាលជំងឺដោយគ្មានការអនុញ្ញាតិពីក្រសួងសុខាភិបាល» និងពីបទ«ប្រព្រឹត្តដោយចេតនាចម្លងមេរោគអេដស៍ដល់អ្នកដទៃ» ។
ទណ្ឌិត យ៉ែម ជ្រិន ដែលជាអតីតគ្រូពេទ្យប្រចាំភូមិរកា ត្រូវគេរកឃើញកំហុសថា បានធ្វើឱ្យមនុស្សជិត៣០០នាក់ នៅក្នុងឃុំរកា ស្រុកសង្កែ «ឆ្លងមេរោគអេដស៍» តាមរយៈការប្រកបវិជ្ជាពេទ្យដោយគ្មានវិជ្ជាជីវៈ ដែលប្រព្រឹត្តចាប់តាំងពីអំឡុងឆ្នាំ១៩៩៦រហូតដល់ឆ្នាំ២០១៤ ។ មកដល់ពេលនេះក្នុងចំណោមអ្នកឆ្លងមេរោគអេដស៍ទាំងអស់ក្រោមស្នាដៃគ្រូពេទ្យមច្ចុរាជ យ៉ែម ជ្រិន បានស្លាប់ជាបន្តបន្ទាប់អស់ចំនួន២៧នាក់ហើយ។ ភាគច្រើននៃជនរងគ្រោះដែលស្លាប់គឺជាមនុស្សចាស់ជរា រីឯមួយចំនួនទៀតកំពុងស្ថិតក្នុងការជួយថែទាំ ព្យាបាល និងឧបត្ថម្ភពីអាជ្ញាធរ មន្ទីរសុខាភិបាល និងអង្គការជាដៃគូមួយចំនួនទៀតផងដែរ ៕
ចែករំលែកព័តមាននេះ