ខេត្ដព្រះសីហនុ ៖ ជ្រូកចំនួន៣០ក្បាល ដឹកតាមរថយន្ដមួយគ្រឿងមកពីខេត្ដកំពត ត្រូវបានមន្ដ្រីបសុពេទ្យប្រចាំការនៅការិយាល័យព្រៃនប់ធ្វើការឃាត់ទុក បន្ទាប់ពីសត្វជ្រូកទាំង៣០ក្បាលនេះពិនិត្យឃើញថា ពុំមានច្បាប់អនុញ្ញាតត្រឹមត្រូវទៅតាមផ្លូវច្បាប់ ។ ហេតុការណ៍នេះកើតមានឡើងកាល ពីថ្ងៃទី១១ កក្កដា វេលាម៉ោង៤ និង៥៥នាទី រសៀល នៅតាមបណ្ដោយផ្លូវជាតិលេខ៣ ស្ថិតក្នុងភូមិបឹងវែង ឃុំវាលរេញ ស្រុកព្រៃនប់ ។
តាមមន្ដ្រីបសុពេទ្យស្រុកដែលចុះទៅ កន្លែងកើតហេតុបានឱ្យដឹងថា ការឃាត់សត្វជ្រូកទាំងនេះ គឺធ្វើឡើងតាមគោលការណ៍ របស់ថ្នាក់លើដែលតំរូវឱ្យមន្ដ្រីបសុពេទ្យទាំងអស់ចុះអនុវត្ដត្រួតពិនិត្យឱ្យបានម៉ត់ចត់រាល់ការធ្វើចរាចរនាំចូលសត្វគ្រប់ប្រភេទមិនថា សត្វទាំងនោះចិញ្ចឹមក្នុងស្រុក ឬនាំចូលពីប្រទេសគេឡើយ ត្រូវតែត្រួតពិនិត្យរកលិខិតអនុញ្ញាតធ្វើអាជីវកម្មនាំចូលឱ្យបានត្រឹមត្រូវ និងស្របច្បាប់ ជាពិសេសត្រូវពិនិត្យ និងតាមដានសត្វទាំងនោះឱ្យដឹងច្បាស់ថា តើសត្វទាំងនោះមានជំងឺ ដែរឬទេ បន្ទាប់ពីមន្ដ្រីជំនាញពិនិត្យទៅឃើញថា ការនាំចូលសត្វទាំងនោះ គឺពុំមានលិខិតអនុញ្ញាតត្រឹមត្រូវតាមច្បាប់នោះ គឺល្មើសទៅនឹងអនុក្រិត្យលេខ១៦ ផ្នែកច្បាប់នាយក ដ្ឋានផលិតកម្មបសុព្យាបាលនៃក្រសួងកសិកម្មរុក្ខាប្រមាញ់ និងនេសាទ ហើយត្រូវឃាត់ទុក និងរាយការណ៍ជូនថ្នាក់លើជាបន្ទាន់។
មន្ដ្រីនោះបានបន្ដទៀតថា សត្វជ្រូកទាំងនេះគឺដឹកតាមរថយន្ដ១គ្រឿង ម៉ាកហ៊ីយ៉ាន់ ដាយទំងន់២តោនកន្លះ ពណ៌ខៀវ ពាក់ស្លាក លេខកំពត ៣A ០២៤៧ ដឹកមកពីស្រុកឈូក ខេត្ដកំពត ។ ម្ចាស់ជ្រូកឈ្មោះអ៊ុក ថន ភេទប្រុស អាយុ៤០ឆ្នាំ រស់នៅភូមិកោះឫស្សី ឃុំត្រញំងបី ស្រុកឈូក ខេត្ដកំពត ។ ការរួមគ្នាពង្រឹងច្បាប់បសុពេទ្យមួយដែលមន្ដ្រីជំនាញទាំងអស់គួរតែយកចិត្ដទុកដាក់អនុវត្ដ និងត្រួតពិនិត្យឱ្យបានត្រឹមត្រូវ ស្របតាមអនុក្រឹត្យច្បាប់កុំឱ្យឈ្នួញចេះតែធ្វើផ្គរធ្វើភ្លៀងស្រេចតែចិត្ដ ដោយមិនគិត ពីផលប្រយោជន៍អ្នកដទៃ ក៏ដូចជាផលប្រយោជន៍ជាតិ ។ តាមព័ត៌មានចុងក្រោយ មន្ដ្រីរូបនោះបានបង្ហើបបន្ថែមថា បន្ទាប់ពីឃាត់សត្វជ្រូកនោះហើយ ឮដំណឹងថា មាន អ្នកធំខាងឈ្មួញគេមកសុំសំរួល តែត្រូវបានក្រុមមន្ដ្រីទាំងនោះបដិសេធដោយរង់ចាំថ្នាក់លើជាអ្នកសំរេច ៕
ចែករំលែកព័តមាននេះ