ខេត្តក្រចេះ ៖ មន្ត្រីរដ្ឋបាលជលផលបានលើកឡើងថា កំណើនត្រីគ្រប់ប្រភេទនៅឆ្នាំនេះបានផ្តល់ទិន្នផលយ៉ាងប្រសើរដល់ប្រជាពលរដ្ឋ ទាំងសក្តានុពលត្រីធម្មជាតិ និងត្រីចិញ្ចឹម ក៏ដោយសារតែធម្មជាតិអំណោយផលល្អ ពិសេសស្ថានភាពទឹកដែលបានលិចស្រោចស្រពត្រឹមកម្រិតប្រសើរមានរយៈពេលយូរ ។ ប្រធានខណ្ឌរដ្ឋបាលជលផលខេត្ត…
ខេត្តក្រចេះ ៖ មន្ត្រីរដ្ឋបាលជលផលបានលើកឡើងថា កំណើនត្រីគ្រប់ប្រភេទនៅឆ្នាំនេះបានផ្តល់ទិន្នផលយ៉ាងប្រសើរដល់ប្រជាពលរដ្ឋ ទាំងសក្តានុពលត្រីធម្មជាតិ និងត្រីចិញ្ចឹម ក៏ដោយសារតែធម្មជាតិអំណោយផលល្អ ពិសេសស្ថានភាពទឹកដែលបានលិចស្រោចស្រពត្រឹមកម្រិតប្រសើរមានរយៈពេលយូរ ។
ប្រធានខណ្ឌរដ្ឋបាលជលផលខេត្ត លោក ស៊ៀន គិន បានឲ្យដឹងនៅថ្ងៃទី០២ ខែមករា ឆ្នាំ២០១៨ នេះថា ដោយលោកបានប្រៀបធៀបកំណើនផលត្រីគ្រប់ប្រភេទដែលបានមកពីការនេសាទរបស់ប្រជានេសាទគឺមានការកំណើនជាងរាល់ឆ្នាំ តែអ្វីដែលប្រឈមនោះ គឺការលួចនេសាទដោយប្រើឧបករណ៍ខុសច្បាប់គឺនៅតែកើតមាន ក៏ព្រោះការយល់ដឹងពីច្បាប់ ក៏ដូចជាបទដ្ឋានលិខិតកិត្តិយុត្តិស្តីពីច្បាប់ជលផលរបស់ពួកគាត់ គឺនៅមានកម្រិតនៅឡើយ ។ ពិសេសទៀតនោះ តំបន់នេសាទមួយចំនួនដែលមានភាពស្មុគស្មាញនៅប៉ែកខាងលើដងទន្លេមេគង្គ ក្នុងការងារចុះល្បាតពីមន្ត្រីជំនាញដូចជានៅតាមកោះ តាមតំបន់អន្លង់ជ្រៅៗ ដែលជនឆ្លៀតឱកាសនៅតែលួចធ្វើនេសាទខុសច្បាប់ពិសេសពេលយប់ ។
តាមរបាយការណ៍របស់ខណ្ឌរដ្ឋបាលជលផលខេត្តបានបង្ហាញថា កិច្ចការងារបង្ក្រាបបទល្មើសជលផលក្នុងឆ្នាំ២០១៧កន្លងទៅ ក្រុមការងារឆ្មាំទន្លេអភិរក្សផ្សោតទន្លេមេគង្គ បានរៀបចំផែនការចុះត្រួតពិនិត្យ និងបង្ក្រាបបទល្មើសនេសាទ ក្នុងដែនអភិរក្ស ក្នុងនោះដកហូតមង បាន៣៨៩ករណី ចំនួន១៨៩ត្បូងស្មរ និងប្រវែងជិត១០ម៉ឺនមែត្រ ដកហូតសន្ទូចរនងចំនួន២៧ខ្សែ ប្រវែងជាង២ពាន់មែត្រ ផ្លែសន្ទូជាង១ពាន់ផ្លែ ។
បង្ក្រាបធ្វើកិច្ចសន្យាចំនួន១២ករណី ដោយអប់រំផ្សព្វផ្សាយណែនាំដល់អ្នកនេសាទចំនួន២៣នាក់ កុំឲ្យប្រើមង និងនេសាទខុសច្បាប់ក្នុងតំបន់អភិរក្សសត្វផ្សោត ។ បង្ក្រាបបទល្មើសឆក់ត្រីចំនួន១៥ករណី ដកហូតទូក១២គ្រឿង សម្ភារឆក់ត្រី១២គ្រឿង ក្រៅពីនោះមានសម្ភារឆក់មួយចំនួនត្រូវបានជនសង្ស័យបោះចូលក្នុងទន្លេបាត់ ។ និងឃាត់ខ្លួនកសាងសំណុំរឿងទៅសាលាដំបូងដើម្បីចាត់វិធានការតាមផ្លូវច្បាប់ចំនួន២នាក់ ។
ក្រុមមន្ត្រីជំនាញជលផល បានលើកឡើងទៀតថា កំណើនទិន្នផលត្រីដែលសម្បូរនៅក្នុងឆ្នាំនេះ ជាប្រភេទត្រីធំៗដូចជា ត្រីក្អែក ត្រីឆ្លាំង ត្រីរស់ ត្រីក្តាំងហាយ ត្រីក្រាយ ត្រីក្អី ។ ល ។
ទន្ទឹមនឹងស្ថានភាពការលួចធ្វើនេសាទខុសច្បាប់ នៅតែជាបញ្ហាប្រឈម និងស្មុគស្មាញដែលកំពុងតែគំរាមកំហែងដល់ពពួកត្រីធម្មជាតិនោះ ប្រធានខណ្ឌរដ្ឋបាលជលផលខេត្ត លោក ស៊ៀន គិន បានអះអាងថា កម្លាំងខណ្ឌជលផលបានត្រៀមលក្ខណៈគ្រប់គ្រាន់ដោយសហការជាមួយនិងកម្លាំងប្រដាប់អាវុធទាំង៣ប្រភេទ និងមន្ត្រីអង្គការពាក់ព័ន្ធនានាលើ ចំណាត់ការបង្ក្រាបបទល្មើសនេសាទ ។
ពិសេសផែនការពង្រឹងសហគមនេសាទឲ្យមានការចូលរួមសហការ ក្នុងការត្រួពិនិត្យ និងល្បាតជាប់ជាប្រចាំ ។ ការអភិរក្ស និងថែទាំអន្លង់ផ្សោត និងអន្លង់មេពូជមួយចំនួនក្នុងដែននេសាទទាំង២៨ចំណុច និងស្រះជម្រកត្រី១០កន្លែង និងការរុករកបន្តស្រាវជ្រាវស្រះជម្រកត្រីថែមទៀត ដើម្បីកំណែទំរង់ទិន្ឋផលឲ្យកាន់តែកើនឡើង ។ ក្រៅពីនោះការជំរុញឲ្យកសិករផលិតេពូជ និងអ្នកចិញ្ចឹម ធ្វើការផ្សព្វផ្សាយ ឲ្យមានការផលិតពូជ និងចិញ្ចឹមត្រីបន្ថែមទៀត ដើម្បីបំពេញកង្វះខាតត្រីធម្មជាតិ ៕
ចែករំលែកព័តមាននេះ