ខេត្តកំពង់ស្ពឺ ៖ ម៉ូតូ១គ្រឿងជិះ២នាក់ (ប្តី-ប្រពន្ឋ) ខណៈបត់ឆ្លងថ្នល់ ក៏ត្រូវរថយន្ត១គ្រឿងមានដឹកកុងតឺន័រ បើកជែងរថយន្តផ្សេងបានជ្រុលចង្កូតមកបុកចំពីមុខពេញទំហឹង បណ្តាលឱ្យប៉ើងខ្ទាតទាំងមនុស្សនិងម៉ូតូ ក្នុងបុរសជាប្តីស្លាប់នៅកន្លែងកើតហេតុ ចំណែកប្រពន្្ធរងរបួសធ្ងន់ កើតឡើងកាលពីវេលាម៉ោង១១ និង២០នាទីព្រឹកថ្ងៃទី២៤ ធ្នូ ស្ថិតនៅលើផ្លូវជាតិលេខ៤ ចន្លោះគីឡូម៉ែត្រលេខ(៣៤-៣៥) ត្រង់ចំណុចភូមិព្រៃសុភី ឃុំត្រពាំងគង ស្រុកសំរោងទង ខេត្តកំពង់ស្ពឺ ។
ប្រភពសមត្ថកិច្ចឱ្យដឹងថា ម៉ូតូខាងលើ មានពណ៌ខ្មៅ ពាក់ផ្លាកលេខភ្នំពេញ ១AY ៨៥០២ បើកបរដោយឈ្មោះចក់ ខ្ចី អាយុ៣៨ឆ្នាំ (ជាប្តីស្លាប់) រស់នៅភូមិប្រស្រែ ឃុំបឹងព្រះ ស្រុកបាភ្នំ ខេត្តព្រៃវែង និងប្រពន្ធ ឈ្មោះយុទ្ធ សាមី អាយុ៣៩ឆ្នាំ នៅភូមិជាមួយគ្នា ធ្វើដំណើរមកពីទិសខាងកើត ទៅទិសខាងលិច។
ប្រភពបន្តថា នៅពេលម៉ូតូជិះមកដល់ចំណុចខាងលើ បានបត់ឆ្លងថ្នល់ពីជើងទៅត្បូង ត្រូវរថយន្ត ០១គ្រឿង ម៉ាកហ៊ីយ៉ាន់ ពណ៌.សឆ្នូតក្រហមសណ្តោងរ៉ឺម៉ក ពាក់ស្លាកលេខភ្នំពេញ ៣A-០៥២៦ រ៉ឺម៉កមានស្លាកលេខភ្នំពេញ ៤A ៤២៩៣ បើកបរពីទិសខាងលិចទៅកើតមកដល់ត្រងចំណុចខាងលើ ជាន់ហ្វ្រាំងមិនទាន់ជ្រុលបុកម៉ូតូពេញទំហឹង បណ្តាលឱ្យអ្នកបើកបរម៉ូតូស្លាប់នៅនឹងកន្លែងកើតហេតុ និងអ្នកជិះពីក្រោយរងរបួសធ្ងន់។
បច្ចុប្បន្ន សាកសពបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។
ចែករំលែកព័តមាននេះ