ប្រសិនបើអាចទៅរួច មុនពេលដែលអ្នកព្យាយាមបញ្ឈប់នូវការហូរឈាមខ្លាំង អ្នកត្រូវលាងសំអាតដៃរបស់អ្នកដើម្បីជៀសវាងនូវការចម្លងរោគ និងត្រូវពាក់ស្រោមដៃ ។ ប្រសិនបើមុខរបួសស្ថិតនៅត្រង់តំបន់ពោះ ហើយសរីរៈខាងក្នុងត្រូវបានស្ថិតនៅខុសទីតាំងនោះ អ្នកមិនត្រូវព្យាយាមរុញវាចូលទៅក្នុងទីតាំងដើមវិញនោះទេ អ្នកត្រូវគ្របតំបន់នោះជាមួយនឹងក្រណាត់ ឬស្បៃស្តេរីលស្អាត…
ប្រសិនបើអាចទៅរួច មុនពេលដែលអ្នកព្យាយាមបញ្ឈប់នូវការហូរឈាមខ្លាំង អ្នកត្រូវលាងសំអាតដៃរបស់អ្នកដើម្បីជៀសវាងនូវការចម្លងរោគ និងត្រូវពាក់ស្រោមដៃ ។
ប្រសិនបើមុខរបួសស្ថិតនៅត្រង់តំបន់ពោះ ហើយសរីរៈខាងក្នុងត្រូវបានស្ថិតនៅខុសទីតាំងនោះ អ្នកមិនត្រូវព្យាយាមរុញវាចូលទៅក្នុងទីតាំងដើមវិញនោះទេ អ្នកត្រូវគ្របតំបន់នោះជាមួយនឹងក្រណាត់ ឬស្បៃស្តេរីលស្អាត ។
សម្រាប់ករណីនៃការហូរឈាមខ្លាំងអ្នកត្រូវ ៖
•ដាក់ជនរងគ្រោះឲ្យដេក និងដណ្តប់ជនរងគ្រោះ ដើម្បីការពារកុំឲ្យបាត់បង់សីតុណ្ហភាពរាងកាយ ។ ប្រសិនបើអាចធ្វើបាន អ្នកត្រូវដាក់ក្បាលរបស់ជនរងគ្រោះឲ្យបានទាបជាងដងខ្លួនបន្តិច ឬកល់ជើង ឬកន្លែងដែលមានការហូរឈាមឲ្យបានខ្ពស់ជាង ។
•នៅពេលដែលអ្នកបានពាក់ស្រោមដៃហើយ អ្នកអាចយកចេញនូវធូលី ឬកម្ទេចកម្ទីដែលអាចមើលឃើញច្បាស់នៅលើមុខរបួស ។ តែអ្នកមិនត្រូវយកនូវវត្ថុអ្វីមួយដែលមានទំហំធំ និងចាក់ចូលជ្រៅទៅក្នុងមុខរបួសទេ ។ អ្វីដែលអ្នកចាំបាច់ត្រូវយកចិត្តទុកដាក់នោះ គឺអ្នកត្រូវបឈ្ឈប់នូវការហូរឈាមរបស់ជនរងគ្រោះ ។
•អ្នកអាចដាក់សម្ពាធដោយផ្ទាល់ទៅលើមុខរបួសតែម្តង រហូតដល់ការហូរឈាមត្រូវបានបញ្ឈប់ ។ អ្នកត្រូវប្រើបង់រុំដែលស្តេរីល ឬ ក្រណាត់ស្អាត រួចបន្តទប់សង្កត់សម្ពាធនេះឲ្យបានយ៉ាងហោចណាស់រយៈពេល២០នាទី ដោយមិនចាំបាច់ពិនិត្យមើលថា តើមុខរបួសនោះបានឈប់ហូរឈាមហើយ ឬនៅទេ? រក្សាសម្ពាធនេះដោយការរុំមុខរបួសឲ្យតឹងណែនជាមួយនឹងបង់រុំ ឬក្រណាត់ស្អាត និងស្កុតស្អិតបិទជាប់ ។ ប្រើដៃស្អាតរបស់អ្នក ប្រសិនបើអ្នកមិនមានរបស់ទាំងនេះជាប់ជាមួយ។ ប្រសិនបើអាចធ្វើបានអ្នកត្រូវពាក់ស្រោមដៃស្អាត ឬប្រើថង់ប្លាស្ទិកស្អាត ដើម្បីការពារការចម្លងរោគ ។
•អ្នកមិនត្រូវយកចេញនូវស្បៃរុំ ឬបង់រុំចេញពីមុខរបួសរបស់ជនរងគ្រោះនោះទេ ។ ប្រសិនបើមុខរបួសនៅតែបន្តមានការហូរឈាម និងជ្រាបចេញពីស្បៃរុំរបួស ឬវត្ថុអ្វីមួយដែលអ្នកបានប្រើក្នុងការចងរុំមុខរបួសនោះ អ្នកមិនត្រូវយកវាចេញទេ ។ ជំនួសមកវិញអ្នកត្រូវ យកវត្ថុ ឬក្រណាត់អ្វីដែលមានការបឺតស្រូបល្អ យកមកដាក់បន្ថែមលើវាទៀត ។
•កៀបសង្កត់សរសៃអាកទែដែលសំខាន់ ប្រសិនបើចាំបាច់ ។ ប្រសិនបើការហូរឈាមនេះ មិនត្រូវបានបញ្ឈប់ជាមួយនឹងការប្រើសម្ពាធដោយផ្ទាល់នោះ អ្នកត្រូវកៀបសង្កត់នៅលើសរសៃអាកទែ ដែលផ្តល់ឈាមមកកាន់តំបន់នៃមុខរបួស ។ កន្លែងដែលអ្នកត្រូវដាក់សម្ពាធនៅលើដៃ គឺស្ថិតនៅផ្នែកខាងក្នុងនៃដៃ គឺស្ថិតនៅខាងលើកែងដៃបន្តិច និងខាងក្រោមក្លៀកបន្តិច ។
កន្លែងដែលត្រូវដាក់សម្ពាធនៅលើជើង គឺនៅត្រង់ផ្នែកខាងក្រោយនៃជង្គង់ និងនៅត្រង់ក្រលៀន ។ សង្កត់សរសៃអាកទែដែលសំខាន់នៅត្រង់តំបន់ទាំងនេះឲ្យខ្ទប់ទៅនឹងឆ្អឹងដោយដាក់ម្រាមដៃអ្នកឲ្យរាបស្មើ។ ជាមួយនឹងដៃម្ខាងទៀត អ្នកត្រូវបន្តដាក់សម្ពាធទៅលើមុខរបួសដដែល ។
•ដាក់ផ្នែកនៃរាងកាយរបស់ជនរងគ្រោះ ដែលត្រូវបានរងរបួសឲ្យនឹងថ្កល់នៅពេលដែលការហូរឈាមត្រូវបានបញ្ឈប់។ រក្សាបង់រុំមុខរបួសឲ្យស្ថិតនៅកន្លែងដដែលនិងប្រញាប់បញ្ជូនជនរងគ្រោះទៅកាន់បន្ទប់សង្គ្រោះបន្ទាន់ឲ្យបានឆាប់រហ័ស តាមដែលអាចធ្វើបាន ។
ប្រសិនបើអ្នកមានការសង្ស័យថា ជនរងគ្រោះមានការហូរឈាមផ្នែកខាងក្នុង នោះអ្នកត្រូវប្រញាប់ហៅរកក្រុមសង្គ្រោះបន្ទាន់ឲ្យបានភ្លាមៗ ។
សញ្ញានៃការហូរឈាមផ្នែកខាងក្នុងមានដូចជា ៖
•មានការហូរឈាមចេញពីប្រហោងផ្នែកណាមួយនៃរាងកាយ ។
•មានការក្អួត ឬក្អកធ្លាក់ឈាម ។
•មានស្នាមជាំនៅលើក ,ដើមទ្រូង ,ពោះ ឬ នៅផ្នែកចំហៀងនៃដងខ្លួន ។
•មុខរបួសដែលមានការចាក់ទម្លុះចូលដល់លលាដ៍ក្បាល,ដើមទ្រូង ឬពោះ ។
•មានការបាក់ឆ្អឹង ។
•មានសភាពអស់កម្លាំងល្ហិតល្ហៃ,ការថប់បារម្ភ មានការស្រេកទឹកជាខ្លាំង ឬស្បែកមានសភាពត្រជាក់ខ្លាំង ៕
ចែករំលែកព័តមាននេះ