រាជធានីភ្នំពេញ ៖ អាជ្ញាធររាជធានីភ្នំពេញ បានអះអាងថា ក្នុងឱកាសបុណ្យចូលឆ្នាំសកល ឆ្នាំ២០១៧ ឈានចូលឆ្នាំ២០១៨ នេះ ប្រជាពលរដ្ឋនឹងចូលរួមសប្បាយរីករាយជាមួយពិធីរាប់ថយក្រោយ (Count Down) ដើម្បីអបអរសាទរឆ្លងចូលឆ្នាំថ្មីច្រើនជាងឆ្នាំមុនៗ បន្ទាប់ពីអាជ្ញាធរបានបង្កលក្ខណៈ និងរៀបចំ ឲ្យមានកន្លែងសប្បាយជាច្រើនទីតាំង ព្រមទាំងពង្រឹងផែនការរក្សាសន្តិសុខជាងឆ្នាំមុនៗ។ លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបានឲ្យដឹងថា បុណ្យចូលឆ្នាំសកលឆ្នាំ២០១៧ ឆ្លងចូល ឆ្នាំ២០១៨នេះ រដ្ឋបាលរាជធានីភ្នំពេញនឹងធ្វើពិធីទទួលអំណរសាទរឆ្នាំថ្មី នៅរមណីយដ្ឋានវត្តភ្នំ ដើម្បី បង្កលក្ខណៈសប្បាយរីករាយជូនប្រជាពលរដ្ឋក៏ដូចមហាជន តាមរយៈការប្រគុំតន្ត្រី និងពិធីខោនដោន រាប់ថយក្រោយរួមគ្នា ក្នុងគោលបំណងបួងសួងសុំឲ្យថ្នាក់ដឹកនាំ និងប្រជាពលរដ្ឋជួបតែសេចក្តីសុខ សប្បាយ និងសម្បូររុងរឿង។
លោកបន្តថា សម្រាប់បុណ្យចូលឆ្នាំសកលឆ្នាំនេះ រដ្ឋបាលរាជធានីភ្នំពេញ បានរៀបចំឲ្យមានកន្លែងសប្បាយជាច្រើនទីតាំងដូចជា នៅសួនច្បារមុខវត្តបុទុមវត្តី សួនច្បារសម្តេចតេជោ ហ៊ុន សែន មុខណាហ្គាវើល រមណីយដ្ឋានវត្តភ្នំ និងក្នុងតំបន់កោះពេជ្រជាដើម។ តាមរយៈការប្រគុំតន្ត្រី របស់ស្ថានីយទូរទស្សន៍ និងការប្រគុំតន្ត្រីនានា ដើម្បីទទួលអំណរសាទរឆ្នាំថ្មី ដែលសង្ឃឹមថា មានមហាជ ន ចូលរួមច្រើនកុះករ។ លោក ម៉េត មាសភក្តី បានបញ្ជាក់ថា រដ្ឋបាលរាជធានីភ្នំពេញ មិនត្រឹមតែបង្ក និងរៀបចំឲ្យប្រជាពលរដ្ឋមានភាពសប្បាយរីករាយប៉ុណ្ណោះទេ គឺបានគិតគូរ និងមានការខិតខំដោយ យកចិត្តទុកដាក់ ក្នុងកិច្ចការពាររក្សាសន្តិសុខសណ្តាប់ធ្នាប់ ជាពិសេសបញ្ហាចរាចរណ៍តែម្តង ដើម្បីជួយសម្រួលដល់ការធ្វើដំណើរជូនប្រជាពលរដ្ឋ និងមហាជន ប្រកបដោយភាពសប្បាយរីករាយផងដែរ។
ចំណែកមន្ត្រីជំនាញសាធារការ និងដឹកជញ្ជូនរាជធានីភ្នំពេញ បានឲ្យដឹងថា ដោយមានការណែនាំពីរដ្ឋបាលរាជធានីភ្នំពេញ មន្ត្រីជំនាញគ្រប់ផ្នែក បាន និងកំ ពុងដំឡើងរបាកាត់ទទឹងផ្លូវចំនួន៤ទីតាំង គឺនៅមុខរមណីយដ្ឋានវត្តភ្នំ កាត់ទទឹងផ្លូវព្រះស៊ីសុវត្ថិជិតព្រះបរមរាជវាំង កាត់ទទឹងផ្លូវព្រះនរោត្តមជិតវិមានឯករាជ្យ និងរបាកាត់ទទឹងផ្លូវជិតរូបសំណាកសម្តេចសង្ឃរាជ្យជួន ណាត ក្នុងន័យអបអរសាទរបុណ្យចូលឆ្នាំស កល ឆ្នាំ២០១៨ ព្រមទាំងមានការតុបតែងភ្លើងពណ៌តាមសួនច្បារ និងទីសាធារណៈ ផ្សេងៗជួយលើក កំពស់សោភ័ណភាពរាជធានី និងជាការទាក់ទាញភ្ញៀវទេសចរណ៍ឲ្យកាន់តែច្រើន ជាពិសេស ដើម្បីចូលរួមអបអរកម្មវិធីឆ្លងឆ្នាំសកលឆ្នាំ២០១៨នេះ ប្រកបដោយភាពសប្បាយ រីករាយ៕
ចែករំលែកព័តមាននេះ