ដើម្បីទទួលទានដំណេកបានស្រួលលោក អ្នកគួរជៀសវាងបញ្ហា៦យ៉ាងដូចខាងក្រោម ៖
១-កុំបរិភោគពេលគេង:តើអ្នកដឹងទេថា ទំលាប់ធម្មតារបស់អ្នកក្នុងពេលចូលគេងអាចរំខានដល់ការទទួលទានដំណេកដ៏ស្កប់ស្កល់របស់អ្នកនាពេលរាត្រីបាន ។ ឧទាហរណ៍ប្រសិនបើអ្នកទទួលទានអាហារច្រើនមុនពេលចូលគេងអាចឱ្យអ្នកពិបាកក្នុងការគេងលក់ ឬគេងមិនស្រួលក៏មាន ប៉ុន្ដែបើអ្នកចង់ញ៉ាំអ្នកគួរទទួលទានអាហារប្រភេទប្រូតេអ៊ីន ដូចជាសណ្ដែកដី ប៊រ័ ឬនំធុងជាដើម ។
២-ចៀសវាងប្រើគ្រឿងអេឡិចត្រូនិក ក្នុងបន្ទប់:យើងទាំងអស់គ្នាតែងយល់ថា ទូរទស្សន៍ គឺជាផ្នែកកំសាន្ដមួយនៃបន្ទប់គេងរបស់អ្នកប៉ុន្ដែការទស្សនាកម្មវិធីដែលអ្នកពេញចិត្ដមុន ពេលគេង អាចរំខាន ឬបង្អាក់ដំណេករបស់អ្នក ។ ជាងនេះទៀត ព័ត៌មានខ្សែភាពយន្ដ ឧក្រិដ្ឋកម្មផ្សេងៗ ឬកម្មវិធីជជែកកំសាន្ដពេលរាត្រី អាចឱ្យខួរក្បាលរបស់អ្នកមិនចង់សំរាក នាំឱ្យដំណេករបស់អ្នកមានបញ្ហា ។ ក្រៅពីមើលទូរទស្សន៍ អ្នកគួរសាកល្បងអានសៀវភៅល្អៗ ប្រសើរជាង ដែលអាចឱ្យ អ្នករំងាប់អារម្មណ៍បាន ។ ក្រៅពីនេះមានការធ្វើសម្មាធិ ការបន់ស្រន់ផ្ដោតអារម្មណ៍របស់អ្នកទៅរកភាពរីករាយដែលអាចឱ្យប្រព័ន្ធ ប្រសាទរបស់អ្នកបានសំរាក គឺជាការល្អ ។
៣-កុំយកការងារមកធ្វើនៅកន្លែងដេក :មនុស្សជាច្រើនតែងតែយកការងារមកធ្វើនៅផ្ទះ ដោយយកកិច្ចការនោះមកដាក់ លើគ្រែដេកតែម្ដងហេតុនេះអ្នកគួរតែឈប់ធ្វើបែបនេះតទៅទៀត ។ ពេលអ្នកកំពុងគិត លេខ ឬផ្ទៀងផ្ទាត់លេខ ឬរៀបចំធ្វើការរបស់អ្នក ជាទូទៅអ្នកកំពុងស្ថិតនៅក្នុងភាពដាស់តឿន ឬមិនស្ងប់ ហើយអារម្មណ៍របស់អ្នកអាចមិនសំរាកធ្វើឱ្យអ្នកមានភាពសៅហ្មងទៀតផង ។ រឿងដែលល្អសំរាប់ប្រឆាំងបញ្ហានេះ គឺការទទួលទានដំណេកដ៏ស្កប់ស្កល់។ ប្រសិនបើអ្នកទទួលអារម្មណ៍សៅហ្មងដោយសាររឿងនេះ អ្នកគួរតែប្ដូរទៅធ្វើអ្វីផ្សេង ឬកន្លែងផ្សេង ហើយនៅពេលដែលអ្នកមានអារម្មណ៍ថាងងុយគេង អ្នកត្រូវឈប់ភ្លាម ហើយទុកវាធ្វើនៅថ្ងៃស្អែកទៀត ឬក៏ឈប់ធ្វើការឱ្យបាន១ម៉ោងមុនពេលអ្នកចូលគេង ។
៤-កុំនិយាយច្រើន: ទោះបីពេលគេងជាពេលវេលាដ៏ល្អបំផុត ដែលអ្នកគិតថាអាចនៅក្នុងបន្ទប់ដ៏ស្ងប់ស្ងាត់ជាមួយដៃគូរបស់អ្នកក្ដី សូមអ្នកកុំប្រើរយៈពេលនេះមកបញ្ចេញមនោសញ្ជេតនាឱ្យសោះ ។ គ្រួសារភាគច្រើនតែងតែនិយាយគ្នាពីទំនាក់ទំនងរបស់គេ និងរឿងលុយកាក់ជាដើមដែលអាចឈានដល់ការឈ្លោះប្រកែកគ្នា ឬខឹង ខ្លាច ឬក៏មានអារម្មណ៍ រំភើបក៏មានធ្វើឱ្យបង្កើតថាមពលក្នុងខ្លួនយើង ។ បញ្ហានេះសំរាប់អ្នកដែលធ្លាប់ឈ្លោះប្រកែក គ្នានៅពេលចូលគេងពិតជាបានដឹងហើយថា វាពិបាកឱ្យអ្នកងងុយគេងខ្លាំងណាស់ ។ ជា មធ្យោបាយល្អ ដើម្បីដោះស្រាយបញ្ហាខាងលើ គឺនៅពេលដែលក្បាលរបស់អ្នកនៅលើ ខ្នើយកើយហើយ ត្រូវទុកបញ្ហា ឬរឿងដែលសំខាន់ៗទៅម្ខាងសិន និងចាំដោះស្រាយវា នៅពេលថ្ងៃវិញ ។
៥-កុំយកកូនដេកលើគ្រែជាមួយ : ទោះបីជាការយកកូនក្មេងមកគេងលើគ្រែជាមួយ គឺជារឿងល្អក្ដី តែវាក៏អាចរំខានដល់ដំណេករបស់អ្នកផងដែរ ។ ជាងនេះទៅទៀត អាចឱ្យក្មេងធ្លាក់ពីលើគ្រែមកក្រោមទៀតផង យកល្អអ្នកគួរតែមានគ្រែកូនក្មេងមួយសំរាប់កូនរបស់អ្នក ព្រោះការធ្វើបែបនេះអាចឱ្យអ្នក និងកូនគេងលក់បានស្កប់ស្កល់ដូចគ្នា ។
៦-កុំយកសត្វចិញ្ចឹមដេកជាមួយ :ជាធម្មជាតិរបស់សត្វវាមិនដែលដេកនៅស្ងៀមមួយកន្លែងទេ នៅពេលយប់សត្វនោះ នឹងដើរជុំវិញកន្លែងដែលវាដេក ហើយប្រសិនបើអ្នកយកវាទៅដេកលើគ្រែជាមួយ អាចរំខានដល់ដំណេករបស់អ្នកមិនខាន ឬអាចឱ្យអ្នកពេលភ្ញាក់ពីដំណេកពិបាកដកដង្ហើមទៀតផង ។ មានម្ចាស់សត្វឆ្កែ ឬឆ្មាជាច្រើនដែលកើតមានជំងឺគេងមិនលក់ ដោយសារតែការរំខានពីសត្វចិញ្ចឹមរបស់ខ្លួន ។ ហេតុនេះយកល្អអ្នកគួរតែទិញគ្រែសំរាប់សត្វចិញ្ចឹមរបស់អ្នក ដើម្បីកុំឱ្យវាមកដណ្ដើមគ្រែដេកជាមួយអ្នក ៕
ចែករំលែកព័តមាននេះ