រាជធានីភ្នំពេញ៖ នេះជាឆ្នាំទី៥ហើយដែលសហគ្រាសផលិតឱសថ ប៉េ ប៉េ អឹម (PPM) បានរៀបចំការប្រឡងប្រជែងស្នាដៃស្រាវជ្រាវផ្នែកសុខាភិបាលដែលល្អប្រសើរជាងគេក្នុងចំណោមស្នាដៃរបស់និស្សិតឱសថសាស្ត្រ និងវេជ្ជសាស្ត្រនៃសកលវិទ្យាល័យវិទ្យាសាស្ត្រសុខាភិបាលនានានៅទីក្រុងភ្នំពេញ។ សម្រាប់ប្រធានបទឆ្នាំនេះ គឺផ្តោតសំខាន់ទៅលើ…
រាជធានីភ្នំពេញ៖ នេះជាឆ្នាំទី៥ហើយដែលសហគ្រាសផលិតឱសថ ប៉េ ប៉េ អឹម (PPM) បានរៀបចំការប្រឡងប្រជែងស្នាដៃស្រាវជ្រាវផ្នែកសុខាភិបាលដែលល្អប្រសើរជាងគេក្នុងចំណោមស្នាដៃរបស់និស្សិតឱសថសាស្ត្រ និងវេជ្ជសាស្ត្រនៃសកលវិទ្យាល័យវិទ្យាសាស្ត្រសុខាភិបាលនានានៅទីក្រុងភ្នំពេញ។
សម្រាប់ប្រធានបទឆ្នាំនេះ គឺផ្តោតសំខាន់ទៅលើ «ការអង្កេត Ethnobotany ទៅលើរុក្ខជាតិឱសថដែលប្រើប្រាស់សម្រាប់បំបាត់ការឈឺចាប់» ដោយមានការចូលរួមប្រកួតប្រជែងពីនិស្សិតផ្នែកសុខាភិបាលទាំងស្រី-ប្រុសប្រមាណ៨០ មកពីសាកលវិទ្យាល័យសុខាភិបាល និងសាកលវិទ្យាល័យអន្តរជាតិ។
សហគ្រាសផលិតឱសថ ប៉េ ប៉េ អឹម (PPM) កាលពីថ្ងៃទី១៦ ធ្នូ ឆ្នាំ២០១៧ នេះ បានរកឃើញនិស្សិតស្រី ៣ក្រុម ដែលមានគ្នា១៣នាក់ មានស្នាដៃល្អក្នុងការស្រាវជ្រាវ ជាប់ជាជ័យលាភីសម្រាប់ការប្រកួតប្រជែងនេះ។
កម្មវិធីប្រកួតប្រជែងពានរង្វាន់គីណាល់ ត្រូវបានផ្តួចផ្តើមឡើងតាំងពីឆ្នាំ២០១៣មក ក្នុងគោលបំណងលើកទឹកចិត្តដល់និស្សិតផ្នែកសុខាភិបាល ដើម្បីធ្វើការស្រាវជ្រាវឱ្យបានត្រឹមត្រូវសមស្របទៅតាមកម្រិតស្តងដាអន្តរជាតិ ពង្រីកវិសាលភាព ចំណេះដឹងជំនាញរបស់ខ្លួន លើកតម្កើងចំណេះដឹងនិស្សិតដែលជាដើមទុនក្នុងវិជ្ជាជីវៈនាពេលអនាគត ទាំងចូលរួមក្នុងការអភិវឌ្ឍការស្រាវជ្រាវផ្នែកវិទ្យាសាស្ត្រនៅកម្ពុជា។
លោកឧកញ៉ាឱសថបណ្ឌិត ហៃ លីហៀង ប្រធានមូលនិធិគីណាល់ មានប្រសាសន៍ថាកម្មវិធីប្រកួតប្រជែងនេះ នឹងជំរុញឱ្យនិស្សិតកម្ពុជាបង្កើនការស្រាវជ្រាវរបស់ខ្លួន ដែលអាចមើលឃើញនូវចំណុចខ្វះខាត និងរកមធ្យោបាយដើម្បីឆ្លើយតបនូវចំណុចខ្វះនៃផ្នែកវិជ្ជសាស្ត្ររបស់កម្ពុជាដែលនឹងធ្វើឱ្យវិស័យសុខាភិបាលនៅកម្ពុជាកាន់តែល្អប្រសើរជាងមុន។
លោកឧកញ៉ាឱសថបណ្ឌិត បន្តថា៖ «នៅក្នុងនឹងគឺថា យើងបានចូលរួមបង្កើតនូវការភ្ញាក់ ដាស់សតិឡើងវិញ ដើម្បីឱ្យក្មួយៗនិស្សិតអស់ហ្នឹងមានការចាប់អារម្មណ៍ និងមានការត្រិះរិះស្វែងរកមធ្យោបាយដោះស្រាយនូវការខ្វះខាតផ្នែកវិស័យសុខាភិបាលយើង។ អញ្ចឹងការស្រាវជ្រាវហ្នឹង គឺឱ្យគាត់មើលទៅឆ្ងាយទៅទៀត ព្រោះថា ឥឡូវហ្នឹងយើងឃើញគេធ្វើ យើងធ្វើបាន ប៉ុន្តែឥឡូវនេះយើងត្រូវធ្វើឱ្យបានលើសហ្នឹងទៅទៀត»។
លោក នួន វ៉ាន់សឿន អនុប្រធាននាយកដ្ឋានតំរង់ទិសវិជ្ជាជីវៈនៃក្រសួងអប់រំបានលើកឡើងថា ការស្រាវជ្រាវនេះ មានសារសំខាន់ណាស់ ដែលធ្វើឱ្យនិស្សិតមានការខិតខំស្រាវជ្រាវដោយខ្លួនឯង ។ លោកសង្ឃឹមថា នៅឆ្នាំក្រោយៗ សមត្ថភាពនៃការស្រាវជ្រាវនឹងកាន់តែល្អថែមទៀត ដើម្បីពង្រឹងនូវសមត្ថភាពវិស័យវិសាស្ត្រនៅកម្ពុជា។
កញ្ញា ថេង សេដាដួង ជានិស្សិតឆ្នាំទី៤ នៃសាកលវិទ្យាល័យសុខាភិបាលតំណាងក្រុមទទួលបានជ័យលាភីលេខ៣ ជាក្រុមដែលបានអង្កេតទៅលើ Ethnobotany ទៅលើរុក្ខជាតិឱសថដែលប្រើប្រាស់ដោយគ្រូបុរាណ ដើម្បីបំបាត់ការឈឺធ្មេញបានឱ្យដឹងថា ក្រុមរបស់នាងបានរយៈពេលជាងមួយខែ ដើម្បីស្រាវជ្រាវទៅលើប្រធានបទនេះ ដែលការសិក្សាស្រាវជ្រាវបានជួបលំបាកជាច្រើន តែរៀនបានច្រើនពីការស្រាវជ្រាវនេះ។
កម្មវិធីប្រកួតប្រជែងដណ្តើមពានរង្វាន់គីណាល់ ប្រព្រឹត្តិឡើងក្រោមការឧបត្ថម្ភរបស់សហគ្រាសផលិតឱសថ ប៉េ ប៉េ អឹម ដែលជាសហគ្រាសផលិតឱសថដ៏ធំ និងដំបូងគេបង្អស់នៅកម្ពុជា៕
ចែករំលែកព័តមាននេះ