រាជធានីភ្នំពេញ ៖ បុរសម្នាក់មិនដឹងថាជិះម៉ូតូធ្វើដំណើរយ៉ាងម៉េចនោះទេស្រាប់តែធ្លាក់ចុះពីលើស្ពានដែលអត់មានបង្កាន់ដៃដោយធ្លាក់ទាំងម៉ូតូ និងមនុស្សបណ្តាលឲ្យឈ្លក់ទឹកស្លាប់យ៉ាងអាណោចអាធម៌នៅនឹងកន្លែង ហេតុការណ៍នេះកើតឡើងនៅវេលាម៉ោង៩យប់ថ្ងៃទី១១ ខែធ្នូ ឆ្នាំ២០១៧ ផ្លូវ២១៧ចំណុចស្ពានថ្មក្បែរ ភូមិព្រែកជ្រៃ សង្កាត់ស្ពានថ្ម ខណ្ឌដង្កោ ។
សពជនរងគ្រោះឈ្មោះសុខ ចាន់រស្មី ភេទប្រុស អាយុ២៦ឆ្នាំ មុខរបរនិសិត្សពេទ្យសត្វ មានស្រុកកំណើត នៅភូមិពៃ ឃុំត្នោត ស្រុកបាទី ខេត្តតាកែវ ជិះម៉ូតូស៊េរីឆ្នាំ២០១៥ ពណ៌ខ្មៅ ស្លាកលេខ ភ្នំពេញ១CT-៩០៧៩ ។
ព័ត៌មានពីអ្នកធ្វើដំណើរតាមផ្លូវបានឲ្យដឹងថា មុនពេលកើតហេតុពួកគាត់បានធ្វើដំណើរតាម ផ្លូវ២១៧ ពីត្បូងទៅជើងខណៈមកដល់លើស្ពានដែលអត់មានបង្កាន់ដៃមានតែបង្កាន់ដៃម្ខាង ក៏ស្រាប់តែឃើញមានភ្លើងកុងទ័រម៉ូតូនៅក្នុងទឹក ពេលឃើញសភាពបែបនេះ គាត់បានឈប់ម៉ូតូ ដើម្បីរកមើលក៍ស្រាប់តែឃើញជនរងគ្រោះដេកត្រាំនៅក្នុងទឹក ហើយពេលនោះដែរពួកគាត់បានទៅរាយការណ៍ប្រាប់សមត្ថកិច្ចមូលដ្ឋានឲ្យចុះមកជួយមើល ហើយពេលនោះសមត្ថកិច្ចមូលដ្ឋានបានចុះទៅកន្លែងកើតហេតុ រួចហើយបាននាំជួយស្រង់ជនរងគ្រោះយកមកលើគោក ដើម្បីជួយសង្គ្រោះ តែស្រង់មកដល់លើ ជនរងគ្រោះបានស្លាប់បាត់ទៅហើយ ។
សម្តីអ្នកឃើញហេតុការណ៍ផ្ទាល់ភ្នែកវិញបានឲ្យដឹងថា នៅមុនពេលកើតហេតុ ជនរងគ្រោះបានជិះម៉ូតូ មកដល់កន្លែងកើតហេតុ រួចហើយបានចាំងភ្លើងហ្វាជាមួយ និងរថយន្តមួយគ្រឿងទៀត ដែលបើកបញ្ច្រាសទិសគ្នាទើបធ្វើជនរងគ្រោះធ្លាក់ពីលើស្ពានចូលទឹកតែម្តងទៅ ។
ក្រោយពេលកើតហេតុ បន្ទាប់ពីដឹងថាជនរងគ្រោះស្លាប់ហើយ គឺសមត្ថកិច្ចជំនាញបានចុះទៅកន្លែងកើតហេតុ រួចហើយបានទំនាក់ទំនងទៅក្រុមគ្រួសារឲ្យមកយកសពជនរងគ្រោះព្រមទាំងម៉ូតូយកទៅធ្វើបុណ្យនៅស្រុកកំណើតតាមប្រពៃណី ៕
ចែករំលែកព័តមាននេះ