រាជធានីភ្នំពេញ ៖ បុរសជាជនសង្ស័យចំនួន២នាក់ក្នុងនោះមានជនជាតិវៀតណាមម្នាក់ និងជនជាតិខ្មែរម្នាក់ផងដែរ ត្រូវបានកម្លាំងព្រហ្មទណ្ឌខណ្ឌដូនពេញដេញបាប់ឃាត់ខ្លួនបានភ្លាម ខណៈពេលដែលពួកគេបាននាំគ្នាជិះម៉ូតូមួយគ្រឿងធ្វើសកម្មភាពឆក់កាបូបពីនារីវ័យក្មេងស្រស់ស្អាតមានគ្នា៣នាក់ កំពុងតែជិះលើម៉ូតូរ៉ឺម៉កកង់បី ហើយពួកនាងស្រែកឆោឡោឡើងថា ចោរៗ ធ្វើឱ្យមានការភ្ញាក់ផ្អើលទៅដល់កម្លាំងមានសមត្ថកិច្ចជិះម៉ូតូដេញធាក់ផ្តួល។ ករណីនេះដែរបានកើតឡើងកាលពីវេលាម៉ោង៤ល្ងាច ថ្ងៃទី១១ ខែធ្នូ ឆ្នាំ ២០១៧ នៅចំណុចផ្លូវលេខ៥១ កែងនឹងផ្លូវលេខ២០៨ ក្នុងសង្កាត់បឹងរាំង ខណ្ឌដូនពេញ។
តាមប្រភពព័ត៌មានពីនគរបាលបានប្រាប់ឱ្យដឹងថា បុរសជាជនសង្ស័យដែលបានឃាត់ខ្លួនមានទី១-ឈ្មោះ យ៉ យ៉ាំងថាវ ជនជាតិវៀតណាម អាយុ១៨ឆ្នាំ មុខរបរមិនពិតប្រាដក ស្នាក់នៅផ្ទះលេខ៤៤ ផ្លូវលេខ៣៦៩ ក្នុងសង្កាត់ច្បារអំពៅទី១ ខណ្ឌច្បារអំពៅ និងទី២-ឈ្មោះ ម៉ាន់ ម៉េងហួរ ជនជាតិខ្មែរ អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួលគ្មានលេខ ផ្លូវលំ ភូមិព្រែកប្រា សង្កាត់ព្រែកប្រា ខណ្ឌច្បារអំពៅ។ មុនពេលកើតហេតុ ក្រុមនារីរងគ្រោះវ័យក្មេងទាំង៣នាក់ បាននាំគ្នាជិះម៉ូតូរ៉ឺម៉កកង់បីមួយគ្រឿងពីផ្សារធំថ្មី ទៅផ្សារបឹងកេងកង ក្នុងទិសដៅពីជើងទៅត្បូង ដើម្បីរកទិញរបស់របរ។
តាមប្រភពដដែលបានប្រាប់បន្តទៀតថា លុះពួកនាងៗជិះមកដល់ចំណុចខាងលើ ក៏ស្រាប់តែលេចមុខក្រុមជនសង្ស័យចំនួន២នាក់ជិះម៉ូតូម៉ាកហុងដា C125 ពណ៌ខ្មៅ ស៊េរីឆ្នាំ២០១៧ ពាក់ស្លាកលេខ បាត់ដំបង ១B-៧៥៣៧ មួយគ្រឿងមកក្បែរធ្វើសកម្មភាពឆក់កាបូបដៃពណ៌ខ្មៅដែលមានលុយចំនួន១៩០ដុល្លារយកទៅបាត់។ ភ្លាមនោះ ពួកនាងក៏បានស្រែកឆោឡោថា ចោរ ធ្វើឱ្យភ្ញាក់ផ្អើលទៅដល់កម្លាំងព្រហ្មទណ្ឌខណ្ឌដូនពេញដែលកំពុងតែដើរល្បាតជិះដេញតាមធាក់ផ្តួល និងចាប់បានតែម្តង ហើយកាបូបនោះត្រូវបានធ្លាក់បាត់។
ក្រោយពេលកើតហេតុ ក្រុមនារីវ័យក្មេងរងគ្រោះទាំង៣នាក់បាននាំគ្នាមកដាក់ពាក្យបណ្តឹងនៅនគរបាលប៉ុស្ត៍បឹងរាំង ហើយក្រុមជនសង្ស័យជាជនជាតិវៀតណាម និងជនជាតិខ្មែរទាំង២នាក់ក៏បាននាំមកធ្វើការសាកសួរ និងកំណត់ហេតុ រួចបញ្ជូនខ្លួនពួកគេទៅកាន់ងអធិការដ្ឋាននគរបាលខណ្ឌដូនពេញ ដើម្បីចាត់ការទៅតាមផ្លូវច្បាប់ជាបន្តទៅទៀត៕
ចែករំលែកព័តមាននេះ