រាជធានីភ្នំពេញ ៖ ប្រជាពលរដ្ឋបានរាយការណ៍ទៅកម្លាំងប្រជាការពារភូមិឲ្យរាយការណ៍បន្តទៅកាន់នគរបាលដើម្បីចុះទៅពិនិត្យមើលរថយន្តម៉ាកកាមរីបាឡែន១គ្រឿង ប្លុងចោលរយៈពេល៤ថ្ងៃកន្លងមកហើយ មិនឃើញម្ចាស់ទៅយកវិញសោះ។ ប្រជាពលរដ្ឋបានឲ្យដឹងថា ជនមិនស្គាល់មុខបានយករថយន្តនោះទៅប្លុងចោលនៅក្បែរផ្ទះវីងមួយកន្លែងស្ថិតនៅតាមបណ្ដោយមហាវិថីសហព័ន្ធរុស្ស៊ី មុខអាកាសយានដ្ឋានអន្តរជាតិភ្នំពេញ ក្នុងភូមិក្បាលដំរី២ សង្កាត់កកាប២ ខណ្ឌពោធិ៍សែនជ័យ។
ដោយខ្លាចមានបញ្ហាបទល្មើសកើតឡើង នាំឲ្យគាត់មានទោសទណ្ឌ ទើបមិនអាចនៅស្ងៀមបាន ហើយក៏រាយការណ៍ទៅកម្លាំងប្រជាការពារភូមិ កាលពីវេលាម៉ោង៣រសៀល ថ្ងៃទី១១ ខែធ្នូ ឆ្នាំ២០១៧។ ប្រភពដដែលបានបន្តថា រថយន្តខាងលើនោះម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2Z-4642 ដោយមិនត្រូវបានគេដឹងថា តើម្ចាស់របស់វាឈ្មោះអ្វី មានទីលំនៅនៅឯណានោះទេ។ មិនតែប៉ុណ្ណោះក៏មិនបានដឹងថា មានបញ្ហាអ្វីដែរទើបបានជាបើករថយន្តយកទៅប្លុងចោលបែបនេះ ព្រោះមិនមាននរណាបានឃើញគេបើករថយន្តទៅកាន់ចំណុចនោះដោយផ្ទាល់ភ្នែកឡើយ។ ប្រភពដដែលបានបន្តថា ពួកគាត់មានការសង្ស័យថា រថយន្តនេះត្រូវគេយកទៅប្លុងចោលនៅចំណុចខាងលើពេលយប់ ហើយវេលាព្រឹកព្រលឹមថ្ងៃទី៨ ខែធ្នូ ក្រោយពីភ្ញាក់ពីដេកបានឃើញរថយន្តនោះនៅកន្លែងកើតហេតុបាត់ហើយ ដែលគិតមកទល់នឹងពេលនេះមានរយៈពេល៤ថ្ងៃកន្លងមកហើយ។
ពួកគាត់មិនបានដឹងថា តើម្ចាស់មានបញ្ហាអ្វីទើយកទៅប្លុងចោល ឬក៏ត្រូវក្រុមចោរលួចយកពីទីតាំងណាមួយរួចយកទីប្លុងចោលនៅកន្លែងមួយនោះឡើយ ហើយក៏មិនបានដឹងថានៅក្នុងរថយន្តនោះមានអ្វីប្លែកនោះដែរ។ នគរបាលព្រហ្មទណ្ឌខណ្ឌពោធិ៍សែនជ័យបានឲ្យដឹងថា រថយន្តនោះសង្ស័យថាជារបស់ជនជាតិថៃម្នាក់ឈ្មោះ ប្រៃសិន ផារ៉ាន់កុលក្រិតទីយ៉ា ស្នាក់នៅផ្ទះលេខ២ ក្នុងសង្កាត់បឹងកេងកង១ ខណ្ឌចម្ការមន រាជធានីភ្នំពេញ ហើយបានបើកយកទៅទុកចោលនៅទីនោះរួចក៏ឡើងយន្តហោះទៅកាន់ប្រទេសថៃបាត់។ ប៉ុន្តែទោះបីបែបណារហូតដល់វេលាម៉ោង៤ និង៣០នាទីល្ងាចថ្ងៃដដែលនៅមិនទាន់បានឆែកឆេរខាងក្នុងរថយន្តនៅឡើយ ព្រោះរថយន្តជាប់សោ ហើយក្រោយពេលឆែកទើបដឹងថាមាន ឬគ្មានអ្វីនៅក្នុងនោះ៕
https://youtu.be/udazXaelYM0
ចែករំលែកព័តមាននេះ