រាជធានីភ្នំពេញ៖ ដើម្បីលើកកម្ពស់ការយល់ដឹងអំពីវិសោធនកម្មច្បាប់ និងមាត្រា ថ្មីៗមួយចំនួនសម្រាប់ឈានទៅរឹតបន្ដឹងការអនុវត្ដច្បាប់ចរាចរណ៍ផ្លូវគោកប្រកបដោយប្រសិទ្ធភាព ក្រសួងសាធារណការ និងដឹកជញ្ជូនបានចាប់ផ្ដើមវគ្គបណ្ដុះបណ្ដាលមន្ដ្រីជំនាញសុវត្ថិភាពចរាចរណ៍តាមរាជធានី-ខេត្ដ ស្តីពីច្បាប់ចរាចរណ៍ផ្លូវគោកនិងការរឹតបន្តឹងអនុវត្តច្បាប់។
លោកស្រី ម៉ែន ចាន់សុកុល ប្រធាននាយកដ្ឋានសុវត្ថិភាពចរាចរណ៍នៃក្រសួងសាធារណការ និងដឹកជញ្ជូនបានលើកឡើងក្នុងសិក្ខាសាលាស្ដីពី «ច្បាប់ចរាចរណ៍ផ្លូវគោក និងការរឹតបន្ដឹងអនុវត្ដច្បាប់» កាលពីពេលថ្មីៗនេះ នាទីស្ដីការក្រសួងសាធារណការថា ការរៀបចំបណ្ដុះបណ្ដាល នេះឡើងក្នុងគោលដៅជួយលើកកម្ពស់ការយល់ដឹងដល់មន្ដ្រីជំនាញសុវត្ថិភាពចរាចរណ៍នៅតាមមន្ទីរសាធារណការរាជធានី-ខេត្ដទាំង២៥ ដើម្បីផ្សព្វផ្សាយបន្ដដល់ប្រជាពលរដ្ឋ ឱ្យយល់ដឹងអំពីច្បាប់ និងការចូលរួមគោរពច្បាប់ឱ្យបានគ្រប់ៗគ្នា។
លោកស្រីបានបន្ថែមទៀតថា ក្រសួងសាធារណការ បានផលិតស្ពតអប់រំចំនួន៥ស្ពត ក្នុងនោះ ស្ពតចំនួន៣ និយាយអំពីហានិភ័យនៃការបើកបរក្រោម ឥទ្ធិពលនៃការប្រើប្រាស់គ្រឿងស្រវឹង១ស្ពត និយាយអំពីការប្រើប្រាស់ ផ្លូវទាក់ទងនឹងសញ្ញាចរាចរណ៍ និងស្ពតអប់រំមួយទៀត និយាយអំពីជីវិតពិត របស់កុមារីម្នាក់ដែលទទួលរងគ្រោះថ្នាក់ចរាចរណ៍តាំងពីអាយុ៤ឆ្នាំ បណ្ដាលឱ្យពិការជើងម្ខាង និងបានបន្សល់ទុកនូវទុក្ខសោកដល់ក្រុមគ្រួសារ និងកុមារកម្ពុជាទាំងមូលផងដែរ។
សូមរម្លឹកថា ច្បាប់ស្ដីពីចរាចរណ៍ផ្លូវគោក ត្រូវបានរដ្ឋ សភាធ្វើ វិសោធនកម្មចំនួន៩មាត្រា ដែលផ្ដោតសំខាន់ទៅលើប័ណ្ណបើកបរ សម្រាប់ម៉ូតូ ដែលពីមុនបានកំណត់ប្រភេទប័ណ្ណបើកបរក១ និងប្រភេទក២។ ប៉ុន្ដែក្រោយពីធ្វើវិសោធនកម្មច្បាប់រួចគឺ កំណត់តែ១ប្រភេទប៉ុណ្ណោះ ដែលតម្រូវឱ្យទោចក្រយានយន្ដដែលមានកម្លាំងលើសពី ១២៥ សេសេ ឡើងទៅ ទើបមានប័ណ្ណបើកបរ។
សូមជម្រាបថា ការធ្វើវិសោធនកម្មច្បាប់នេះ ក៏បានផ្ដោតទៅលើការដាក់ទោសទណ្ឌ និងការផាកពិន័យដល់អ្នកបើកបរ ក្រោមឥទ្ធិពលនៃគ្រឿងស្រវឹង និងការផ្ទេរកម្មសិទ្ធិយានយន្ដផងដែរ៕
ចែករំលែកព័តមាននេះ