រាជធានីភ្នំពេញ ៖ អាជីវករផ្សារ «ខិនថេនើរសឃ្វែរ» ប្រមាណជាង១០នាក់ ដែលបានធ្វើសំណើសុំរំលាយកិច្ចសន្យាជួលតូបបានចោទប្រកាន់ថា លោក តាំង វេងហេង ថៅកែផ្សារខិនថេនើរសឃ្វែរ…
រាជធានីភ្នំពេញ ៖ អាជីវករផ្សារ «ខិនថេនើរសឃ្វែរ» ប្រមាណជាង១០នាក់ ដែលបានធ្វើសំណើសុំរំលាយកិច្ចសន្យាជួលតូបបានចោទប្រកាន់ថា លោក តាំង វេងហេង ថៅកែផ្សារខិនថេនើរសឃ្វែរ មិនគោរពកិច្ច សន្យា និងការសន្យារបស់ខ្លួន ក្នុងការរៀបចំផ្សារឱ្យដំណើរការបានល្អ ហើយទទូចសុំអោយអាជ្ញាធរ និងសមត្ថកិច្ចជួយអន្តរាគមន៍ឱ្យពួកគេបានចុះទៅរុះរើយករបស់របរខ្លួន ដែលរៀបចំតុបតែងតូបនោះ ។ ផ្សារ «ខិនថេនើរសឃ្វែរ» នេះ មានទីតាំងស្ថិតនៅតាមបណ្ដោយផ្លូវសម្តេច ជា ស៊ីម ក្នុងភូមិច្រេស សង្កាត់គោកឃ្លាង ខណ្ឌសែនសុខ បានព្រមព្រៀងគ្នាបើកដំណើរលក់តាំងពីថ្ងៃទី១៥ ខែតុលា ឆ្នាំ ២០១៧ ដោយពុំទាន់បើកសម្ពោធនៅឡើយទេ ។
តាមអាជីវករចំនួន ១៧តូប ក្នុងចំណោម៣៦តូប ដែលលក់ដូរជុំវិញឆាកបានអោយដឹងថា ពួកគាត់បាននាំគ្នា មកជួលតូបលក់ភេសជ្ជៈ នៅក្នុងផ្សារ នោះតាំងពីថ្ងៃទី១ខែកញ្ញា ដោយជួលតូបក្នុងតម្លៃ៦០០ដុល្លារក្នុងមួយខែ ។នៅពេលលក់ដូរបានប្រមាណជិត ១ខែ អាជីវករក៏បានជូនដំណឹងសុំរំលាយកិច្ចសន្យា និងទាមទារសំណងប្រាក់កក់ និងថ្លៃខូចខាតក្នុងការជួសជុលតូបពីភាគីម្ចាស់ផ្សារ ដោយមូលហេតុថា ថៅកែផ្សារមិនគោរពកាតព្វកិច្ចដូចមានចែង ក្នុងកិច្ចសន្យាជួលតូបសម្ពោធផ្សារថ្ងៃទី១ខែកញ្ញា ឆ្នាំ ២០១៧និងមិនគោរពការសន្យាផ្ទាល់មាត់ថានាំភ្ញៀវ ទេសចរណ៍ មកលេងផ្សាររាត្រី ខិនថេនើរសឃ្វែរ (CONTAINER SQUARE), ការប្រគំតន្ត្រី ដែលមានក្រុមតន្ត្រីខ្មែរ ថៃ និងហ្វីលីពីន ហើយឆាកតន្ត្រី វិល និងរៀបចំកម្មវិធីប្រូម៉ូសិន ផ្សេងៗដើម្បីជួយលើកកម្ពស់ដំណើរការអាជីវកម្ម តែផ្ទុយទៅវិញគ្មាន តាមពិតគឺជាការបោកប្រាស់តែប៉ុណ្ណោះ។
តាមអាជីវករទាំងនោះបានអោយដឹងទៀតថា នៅពេលដែលផ្សារបានដំណើរការ ពួកគាត់បានស្នើរសុំជួយរកដំណោះស្រាយលើបញ្ហា ផ្សេងៗ ទាក់ទិនដំណើរការអាជីវកម្មក្នុងផ្សារ ដូចជា អោយជួយសម្រួល ប្រព័ន្ធទឹក ភ្លើង ដែលមិនអាចប្រើប្រាស់បាន គ្រប់គ្រាន់ បញ្ហាចំណតរថយន្ត ម៉ូតូអោយបានត្រឹមត្រូវ សម្រាប់ អាជីវកម្ម និងអតិថិជន និងបញ្ហាផ្សេងៗទៀត ខាងក្រុមហ៊ុន ផ្សារ មិនដោះស្រាយសមស្រប និងប្រើពាក្យ ពេចន៍ ប្រមាថ ហើយគិតតែគំរាមកំហែងអោយបង់ថ្លៃតូប ។ តាមព័ត៌មានអោយដឹងថា បន្ទាប់ពីអាជីវករ ជូនដំណឹងសុំរំលាយកិច្ចសន្យា ក្រោយមក មានការប្ដឹងផ្ដល់គ្នាទៅសង្កាត់ ធ្វើការសម្របសម្រួលគ្នាដើម្បីរុះរើសម្ភារៈ ។
តាមកំណត់ហេតុ របស់សាលាសង្កាត់គោកឃ្លាំង បានអោយដឹងថា ខាងអាជីវករ សុំរុះរើយកសម្ភារៈ របស់ខ្លួននៅក្នុងតូបវិញ ដែលអាជីវករបានចំណាយ ក្នុងការតុបតែង ព្រមទាំងសុំដកយកប្រាក់កក់វិញ។ ចំណែក ខាងផ្សារ មិនអាចអោយរុះរើយកសម្ភារៈតុបតែងបានទេ ចោទថា អាជីវករមិនបានបង់ប្រាក់ ឈ្នួលសម្រាប់ខែវិច្ឆិកា ។ ចំពោះប្រាក់កក់ក្រុមហ៊ុនមិនប្រគល់អោយវិញទេ ព្រោះធ្វើកុងត្រា ៥ឆ្នាំ អាជីវករឈប់មុនកិច្ចកុងត្រា ។លុះក្រោយមក ខាងក្រុមហ៊ុន ក៍បានដាក់ពាក្យបណ្តឹងទៅសាលាដំបូងរាជធានីភ្នំពេញដើម្បីសុំរក្សាការពារ។ នៅថ្ងៃទី ២៨ ខែ វិច្ឆិកា ឆ្នាំ ២០១៧ សាលាដំបូង រាជធានីភ្នំពេញចេញដីកាសម្រេចចាត់ចែងជាបណ្ដោះអាសន្ន ដោយ សម្រេច អោយកូនបំណុលជាអាជីវករ ចំនួន ១២នាក់ រុះរើ សម្ភារៈចេញពីតូបផ្សារខិនថេនើរសឃ្វែរ (CONTAINER SQUARE), និងប្រគល់តូបអោយម្ចាស់បំណុលគ្របគ្រងជាបណ្ដោះអាសន្ន។
តាមអាជីវករ បានអោយដឹងទៀតថា មូលហេតុ ដែលនាំអោយអាជីវកររំលាយកិច្ចសន្យា នោះដោយសារតែថៅកែផ្សារមិនបានគោរពកិច្ចសន្យា និងតាមការសន្យារបស់ខ្លួន ព្រមទាំងមិនបានដោះស្រាយបញ្ហាផ្សារដូចជាទឹក ភ្លើង ដែលប្រើមិនគ្រប់គ្រាន់ តើពូកគាត់រកស៊ីយ៉ាងម៉េច ។ នៅពេលរំលាយកិច្ចសន្យា ពួកគាត់មានសិទ្ធិ រុះរើរបស់របរខ្លួន ដែលតុបតែងមកវិញ ព្រោះផ្សារមានតែ ទូរដែក កុងតឺន័រកញ្ចាស់ពុកដាច់តែប៉ុណ្ណោះ។ មិនតែប៉ុណ្ណោះ នៅល្ងាចថ្ងៃសុក្រ ទី ៣០ ខែវិច្ឆិកា ឆ្នាំ២០១៧ វេលាម៉ោង ៦ល្ងាចថៅកែផ្សារបានកាត់សោតូបពួកគាត់ដែលតុបតែងរួចយកទៅជួលអោយអាជីវករផ្សេងទៀត។ អាជីវករ ក៍បានទទូចអោយអាជ្ញាធរ និងសមត្ថកិច្ចជួយអន្តរាគមន៍ បញ្ឈប់រាល់សកម្មភាពនៅលើតូបដែលមានជម្លោះ ដើម្បីរង់ចាំដីកាអនុវត្ត ទៅលើដីកាបណ្ដោះអាសន្នរបស់សាលាដំបូងរាជធានីភ្នំពេញ។ ទោះបីជាយ៉ាងណា អ្នកយកព័ត៌មានពុំបានទទួលការបំភ្លឺណាមួយពីថៅកែផ្សារឡើយ ។
ចែករំលែកព័តមាននេះ