ក្នុងអំឡុងពេលមានផ្ទៃពោះ អ្នកគួរតែយកចិត្តទុកដាក់បន្ថែមទៀតនៅពេលធ្វើដំណើរ ទោះវាជាការធ្វើដំណើរប្រចាំថ្ងៃ ឬដើរនៅឧទ្យាន ឬការដើរឆ្ងាយក៏ដោយ ។
គ្រូពេទ្យភាគច្រើននឹងណែនាំអ្នកមិនឱ្យធ្វើដំណើរផ្លូវឆ្ងាយក្នុងអំឡុងត្រីមាសទី១ ឬ១២សប្តាហ៍ដំបូងនៃការមានផ្ទៃពោះ ។ ទោះជាយ៉ាងណាក្តី នៅពេលអ្នកឆ្លងកាត់ត្រីមាសទី១និងមានគម្រោងធ្វើដំណើរផ្លូវឆ្ងាយ ពេលវេលាដែលល្អបំផុតគឺត្រីមាសទី២ចាប់ពីខែទី៤ដល់ខែទី៧នៃការមានផ្ទៃពោះ ។
ប៉ុន្តែយើងសូមណែនាំថាអ្នកមិនត្រូវសម្រេចចិត្តឆាប់រហ័សពេកទេ ឬរៀបចំគម្រោងធ្វើដំណើរដែលលំបាកក្នុងកំឡុងពេលនេះ ។ អ្នកគួរតែយកចិត្តទុកដាក់ថាការធ្វើដំណើររបស់អ្នកជាការធ្វើដំណើរប្រកបដោយភាពរីករាយ និងមិនសូវមានភាពតានតឹង ។ ប៉ុន្តែមុនពេលអ្នកចេញធ្វើដំណើរ សូមប្រាកដថាអ្នកបានពិភាក្សាជាមួយវេជ្ជបណ្ឌិតរបស់អ្នក។
ខាងក្រោមនេះគឺជាមូលហេតុមួយចំនួនដែលត្រីមាសទី២គឺជាពេលវេលាដ៏ល្អបំផុតសម្រាប់ការធ្វើដំណើរ៖
-ដោយសារសរីរាង្គ សំខាន់ៗរបស់កូនអ្នកបានលូតលាស់ក្នុងអំឡុងត្រីមាសទី១នោះអ្នកមានឱកាសតិចជាងមុនក្នុងការរលូតកូននៅពេលនេះ ។
-រោគសញ្ញាចាញ់កូន និងក្អួតចង្អោររបស់អ្នកអាចនឹងថយចុះ ដូច្នេះអ្នកនឹងមានអារម្មណ៍ថាមិនសូវឈឺនៅតាមផ្លូវ ឬក្នុងអំឡុងពេលធ្វើដំណើរតាមផ្លូវអាកាស ។
-អ្នកប្រហែលជាបានចាក់វ៉ាក់សាំងដែលចាំបាច់ក្នុងកំឡុងពេលមានផ្ទៃពោះ ហើយអ្នកត្រូវបានការពារប្រឆាំងនឹងការឆ្លងមេរោគ ផ្សេងៗ ។ ទោះជាយ៉ាងណាក្តី នៅពេលធ្វើដំណើរផ្លូវឆ្ងាយ អ្នកត្រូវរក្សាអនាម័យល្អដូចជាការបរិភោគអាហារនៅកន្លែងមានអនាម័យ លាងដៃមុន និងក្រោយពេលបរិភោគអាហារជាដើមពីព្រោះប្រព័ន្ធភាពស៊ាំរបស់អ្នកនៅខ្សោយនៅឡើយ ហើយអ្នកអាចឆ្លងមេរោគបានគ្រប់ពេល ។
-នៅពេលដែលអ្នកឆ្លងផុតត្រីមាសទី២ វាអាចមានការលំបាកក្នុងការធ្វើដំណើរបន្ទាប់ពីខែទី៧ពីព្រោះឱកាសនៃការកើតកូនមិនគ្រប់ខែអាចកើនឡើង ៕
ចែករំលែកព័តមាននេះ