រាជធានីភ្នំពេញ ៖ បុរស២នាក់ដែលម្នាក់ជិត៣០ឆ្នាំ និងម្នាក់ទៀតជាង៣០ឆ្នាំទៅហើយ ប៉ុន្តែមិនចេះគិតនូវអ្វី សម្រាប់អនាគតខ្លួនឯង និងក្រុមគ្រួសារ ព្រមទាំងសង្គមជាតិនោះទេ បែរជាយកគ្រឿងញៀនធ្វើជាត្រីមុខ ហើយបាននាំគ្នាទៅសម្ងំលាក់ខ្លួននៅក្នុងផ្ទះសំណាក់មួយកន្លែង ហើយត្រូវបានកម្លាំងនគរបាលប៉ុស្ដិ៍ចោមចៅ២ ចុះទៅធ្វើការចាប់ខ្លួនបានទាំង២នាក់ ។ ហេតុការណ៍កើតឡើងកាលពីវេលាម៉ោង១២ ថ្ងៃត្រង់ ថ្ងៃទី០១ ខែធ្នូ ឆ្នាំ២០១៧ នៅចំណុចក្នុងផ្ទះសំណាក់ មានទីតាំងស្ថិតនៅក្នុងភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ ។
ជនសង្ស័យទាំង២នាក់ ម្នាក់ឈ្មោះកង សុខជាតិ អាយុ២៨ឆ្នាំ និងម្នាក់ទៀតឈ្មោះសុខ សារ៉េន អាយុ៣៧ឆ្នាំ ពួកគេស្នាក់នៅផ្ទះជួលនៅក្នុងបុរីសន្តិភាព២ ភូមិត្រាំដោក សង្កាត់ពងទឹក ខណ្ឌដង្កោ រាជធានីភ្នំពេញ ។ វត្ថុតាងដែលនគរបាលដកហូតបានពីអ្នកទាំង២នេះមិនមានថ្នាំញៀននោះឡើយ គឺមានតែឧបករណ៌សម្រាប់ប្រើប្រាស់១កំប្លេរតែប៉ុណ្ណោះ ចំណែកថ្នាំញៀនពួកគេបានប្រើប្រាស់អស់ហើយ ។
នគរបាលបានឲ្យដឹងថា ក្រុមអ្នកសេពគ្រឿងញៀនជាមនុស្សអាវាសែ គ្មានគំនិតរកស៊ីដោយសុចរិតនោះទេ ពួកគេបានយក ពេលវេលាដើរទាត់ខ្យល់ប្រព្រឹត្តនូវអំពើល្មើសច្បាប់ ប៉ះពាល់ដល់សង្គម ដោយបាននាំគ្នាចូលទៅសម្ងំប្រើប្រាស់គ្រឿងញៀននៅក្នុងផ្ទះសំណាក់មួយកន្លែង ។
ដោយសារមានការរាយការណ៌ពីប្រជាពលរដ្ឋជូនកម្លាំងនគរបាលប៉ុស្ដិ៍ចុះទៅបង្ក្រាប និងចាប់ខ្លួនតែម្ដង ។ កម្លាំនគរបាលអរគុណខ្លាំង ណាស់ដល់បងប្អូនប្រជាពលរដ្ឋ ដែលបានសហការណ៌ផ្ដល់ព័ត៌មាន ឈានទៅដល់ការចាប់ខ្លួនជនខាងលើ ហើយកម្លាំងបានកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់ហើយ ៕
ចែករំលែកព័តមាននេះ