ខេត្តតាកែវ ៖ ជនសង្ស័យម្នាក់ត្រូវបាននគរបាលស្រុកបាទី ធ្វើការឃាត់ខ្លួនទៅតាមពាក្យបណ្ដឹងគ្រួសារជនរងគ្រោះដោយចោទប្រកាន់ពីបទបង្កហិង្សាដោយចេតនា ខណៈពេលដែលជនរងគ្រោះកំពុងច្រូតស្រូវនៅក្នុងស្រែក្បែផ្ទះ រួចជនសង្ស័យស្ទុះយកកាំបិតប៉័ងតោទៅកាប់ជនរងគ្រោះដោយគ្មានមូលហេតុតែម្តង ក្រោយពេលកើតហេតុ ជនរងគ្រោះត្រូវបានក្រុមគ្រួសារដឹកយកទៅព្យាបាលនៅមន្ទីពេទ្យបង្អៃកស្រុក ចំណែកជនសង្ស័យត្រូវបាននគរបាលឃាត់ខ្លួនបញ្ជូនបន្តមកការិយាល័យព្រហ្មទណ្ឌកំរិតធ្ងន់ខេត្ត ដើម្បីចាត់ការបន្ត ។ ហេតុការណ៍នេះបានកើតឡើងនៅវេលាម៉ោង១៦និង០០នាទី ថ្ងៃទី៣០ ខែវិច្ឆិកា ឆ្នាំ២០១៧ នៅភូមិរកាពក ឃុំត្រពាំងក្រសាំង ស្រុកបាទី ខេត្តតាកែវ ។
លោក ង៉ាន់ សារី អធិការនគរបាលស្រុកបាទី បានឲ្យដឹងថា ជនសង្ស័យឈ្មោះ ឯម ឆើត ភេទប្រុស អាយុ២៤ឆ្នាំ រស់នៅភូមិឃុំកើតហេតុ បានធ្វើសកម្មភាពប្រដាប់ដោយកាំបិតប៉័ងតោកាប់ទៅលើជនរងគ្រោះឈ្មោះ ឃ្លោក បែក ភេទប្រុស អាយុ៥៨ឆ្នាំ រស់នៅភូមិឃុំជាមួយគ្នា បណ្ដាលឱ្យរងរបួសជាទម្ងន់ ខណៈដែលជនរងគ្រោះកំពុងច្រូតស្រូវនៅស្រែជិតផ្ទះ ។
លោកអធិការនគរបាលស្រុកបាទី បានបន្តទៀតថា មុនពេលកើតហេតុ ជនរងគ្រោះកំពុងតែច្រូតស្រូវតែម្នាក់ឯងសុខៗ ស្រាប់តែជនសង្ស័យបានចុះកាប់ជនរងគ្រោះឲ្យរងរបួសធ្ងន់តែម្តង ។ នៅចំពោះមុខសមត្ថកិច្ច ជនសង្ស័យបាននិយាយសារភាពថា រូបគេពិតជាបានយកកាំបិតប៉័ងតោកាប់ទៅលើជនរងគ្រោះពិតប្រាកដមែន មូលហេតុស្រវឹងស្រា ។
លោកវរសេនីយ៍ឯក សែម សុជាតិ ប្រធានការិយាល័យព្រហ្មទណ្ឌកំរិតធ្ងន់ខេត្ត បានឲ្យដឹងថា បានកសាងសំណុំរឿងគ្រប់គ្រាន់អស់ហើយ នៅព្រឹកថ្ងែទី០២ ខែធ្នូ ឆ្នាំ២០១៧ នឹងបញ្ជូនជនសង្ស័យទៅសាលាដំបូងខេត្ត ចាត់ការទៅតាមច្បាប់ ៕
ចែករំលែកព័តមាននេះ