ការប្រើប្រាស់រថយន្តក្នុងជីវិតប្រចាំថ្ងៃ មិនត្រឹមតែប្រើសម្រាប់ធ្វើដំណើរចេញពីចំណុចមួយទៅកាន់ចំណុចមួយទៀតប៉ុណ្ណោះទេ ប៉ុន្តែយកល្អ យើងគួរថែទាំវាផងដែរ ដើម្បីពន្យារអាយុការប្រើប្រាស់ឲ្យបានយូរអង្វែង និងសន្សំសំចៃថ្លៃថែទាំទៀតផង ។
យើងគួរចៀសវាងនូវឥរិយាបថ៥យ៉ាងខាងក្រោមនេះ ដែលបំផ្លាញរថយន្តដោយមិនដឹងខ្លួន ដែលយើងអាចកំពុងតែធ្វើក៏ថាបាន ។
១-ជាន់បង្កើនល្បឿនខ្លាំងពេក ខណៈម៉ាស៊ីនរថយន្តត្រជាក់ ៖
មនុស្សភាគច្រើនធ្វើដំណើរទៅធ្វើការនៅពេលព្រឹក ពេលបញ្ឆេះម៉ាស៊ីនហើយ ក៏ធ្វើដំណើរដោយប្រើប្រាស់ល្បឿនលឿនភ្លាមៗ ។ ការបញ្ឆេះម៉ាស៊ីនពេលព្រឹក បន្ទាប់ពីចតរថយន្តចោលពេញមួយយប់ហើយ ប្រេងម៉ាស៊ីននៅមិនទាន់ធ្លាក់ទៅដល់ផ្នែកខាងក្នុងគ្រឿងម៉ាស៊ីនភ្លាមទេ ។ ជាលទ្ធផល នឹងធ្វើឲ្យកកិតធ្ងន់ធ្ងរ រួមទាំងសីតុណ្ហភាពប្រេង និងប្រេងលេខរថយន្តនៅត្រជាក់ដូចគ្នា ។
វិធីល្អ គួរតែផ្លាស់ទីទៅមុខយឺតៗ រហូតដល់ភ្លើងសញ្ញាប្រេងត្រជាក់ (ពណ៌ខៀវ) ធ្លាក់ចុះ ឬរហូតដល់សន្ទះសីតុណ្ហភាពត្រជាក់មកជិតចំណុចកណ្តាលរង្វាស់ ។
២-Kickdown (ប្ដូរលេខ)ជាញឹកញាប់ ៖
ការបង្កើនល្បឿនលឿនដោយប្ដូរលេខ រហូតដល់លេខរថយន្តផ្លាស់ប្តូរទាបជាង(ពីលេខ៤ ទៅលេខ៣) ដើម្បីប្រញាប់ឆ្ពោះទៅមុខជាញឹកញាប់ នឹងធ្វើឲ្យកើតផលមិនល្អដល់ប្រព័ន្ធលេខរថយន្តក្នុងរយៈពេលយូរ ។ ក្រៅពីប្រអប់លេខ (មីញុង) ត្រូវកម្លាំងបង្វិលកើនឡើងយ៉ាងខ្លាំង វាធ្វើឲ្យប៉ះពាល់ដល់អាយុនៃការប្រើប្រាស់លេខរថយន្តថយចុះ ដូចដែលបានឃើញយ៉ាងច្បាស់ ។ ដូច្នេះ បើគ្មានភាពចាំបាច់ត្រូវប្រញាប់ទេ គួរតែបើកទៅមុខសន្សឹមៗល្អជាង ។
៣-ឆ្លងទួលថ្នល់ដោយមិនបង្អង់ល្បឿន ៖
មិនគ្រាន់តែទីទួលដែលត្រូវបង្អង់ល្បឿន ប៉ុណ្ណោះទេ សូម្បីតែជង្ហុក និងគម្របលូនៅតាមផ្លូវ ក៏ជាដើមហេតុធ្វើឲ្យផ្នែកខាងក្រោមនៃរថយន្តអន់ថយលឿនជាងធម្មតាបានដែរ បើអ្នកបើកបរឆ្លងកាត់ដោយល្បឿនលឿនខ្លាំង ។
យើងគួរតែបង្អង់ល្បឿនឲ្យសមស្រប មុននឹងឆ្លងកាត់ទួលថ្នល់ ឬបើកបរកាត់គម្របលូ ។ វានឹងជួយពន្យារអាយុផ្នែកក្រោមរថយន្តបាន ថែមទាំងជួយមិនឲ្យកើតសំឡេងពីការប៉ះទង្គិចខ្លាំងក្នុងរយៈពេលយូរទៀតផង ។ រថយន្តណាដែលមានសម្បកកង់ទាប គួរតែប្រុងប្រយ័ត្នចំណុចនេះជាពិសេស ។
៤-បើកបរកាត់ទឹកលិចខ្លាំង ៖
ទោះបីជាពេលខ្លះ យើងចៀសវាងការបើកបរកាត់ទឹកលិចមិនបាន ប៉ុន្តែគួរតែជ្រើសរើសបើកបរនៅកន្លែងណាដែលមានទឹកលិចរាក់បំផុត ព្រោះទឹកចំនួនច្រើនអាចត្រូវស្រូបចូលទៅក្នុងគ្រឿងម៉ាស៊ីន និងធ្វើឲ្យទឹកចូលទៅក្នុងប្រអប់លេខផងដែរ ។
៥-មិនចាប់អារម្មណ៍នឹងភ្លើងព្រមាននានា ៖
ភ្លើងព្រមាននានានៅលើតាប្លូ គឺសំខាន់ខ្លាំងណាស់ ជាពិសេស ភ្លើងសញ្ញាពណ៌លឿង និងពណ៌ក្រហម ។ ភ្លើងសញ្ញាក្រហម មានន័យពាក់ព័ន្ធនឹងប្រព័ន្ធមានសារសំខាន់ក្នុងការបើកបរ និងប្រព័ន្ធសុវត្ថិភាព ។
បើមានសញ្ញាភ្លើងណាមួយលោតឡើង គួរតែត្រួតពិនិត្យភ្លាមថា កើតបញ្ហាអ្វី ហើយបើជាភ្លើងរូបម៉ាស៊ីន គួរយករថយន្តទៅយានដ្ឋានជួសជុល ដើម្បីឲ្យជាងពិនិត្យបន្តទៀត។ បើអ្នកបណ្តោយវានោះ អាចកើតបញ្ហារាលដាលបាន ។
ទាំងនេះគឺជាវិធីសាស្ត្រតូចៗ ដែលនឹងជួយពន្យារអាយុការប្រើប្រាស់របស់រថយន្តឲ្យបានយូរ និងជួយសន្សំសំចៃថ្លៃថែទាំផងដែរ ជាពិសេសបំផុត សម្រាប់អ្នកបើកបរថ្មីដែលនៅមិនទាន់មានចំណេះដឹង និងឈ្វេងយល់អំពីរថយន្តរបស់ខ្លួនប៉ុន្មាន ៕
ចែករំលែកព័តមាននេះ