រាជធានីភ្នំពេញ ៖ វិមានឯករាជ្យត្រូវបានសាងសង់ឡើងដើម្បីរំលឹកដល់បុព្វបុរសខ្មែរ ដែលបានពលីជីវិតក្នុងការដណ្តើមឯករាជ្យពីបារាំង ហើយក៏ជាសំណង់បង្ហាញពីអច្ឆរិយនៃស្ថាបត្យកម្មខ្មែរផងដែរ ។ យ៉ាងណាក៏ដោយ យើងនិយាយពីការសាងសង់ក្បាលនាគចំនួន១០០ ដែលបានដាក់នៅទិសទាំង៤នៃវិមានឯករាជ្យ ស្ថិតក្នុងភាពជាអាថ៌កំបាំងនៅឡើយ…
រាជធានីភ្នំពេញ ៖ វិមានឯករាជ្យត្រូវបានសាងសង់ឡើងដើម្បីរំលឹកដល់បុព្វបុរសខ្មែរ ដែលបានពលីជីវិតក្នុងការដណ្តើមឯករាជ្យពីបារាំង ហើយក៏ជាសំណង់បង្ហាញពីអច្ឆរិយនៃស្ថាបត្យកម្មខ្មែរផងដែរ ។ យ៉ាងណាក៏ដោយ យើងនិយាយពីការសាងសង់ក្បាលនាគចំនួន១០០ ដែលបានដាក់នៅទិសទាំង៤នៃវិមានឯករាជ្យ ស្ថិតក្នុងភាពជាអាថ៌កំបាំងនៅឡើយ ។
ដើម្បីបកស្រាយអាថ៌កំបាំងនេះ កោះសន្តិភាពបានធ្វើកិច្ចសម្ភាសន៍ជាមួយលោកសាស្ត្រាចារ្យ ភឿង សុភ័ណ្ឌ រដ្ឋលេខាធិការនៃក្រសួងរៀបចំដែនដី នគរូបនីយកម្ម និងសំណង់ដើម្បីបកស្រាយអាថ៌កំបាំងនេះ ។
មន្ត្រីជាន់ខ្ពស់រដ្ឋាភិបាលរូបនេះបានថ្លែងឲ្យដឹងនាព្រឹកថ្ងៃទី៩ វិច្ឆិកា ថា វិមានឯករាជ្យត្រូវបានសាងសង់ឡើងដោយវីរស្ថាបត្យករ វណ្ណ ម៉ូលីវណ្ណ ក្នុងកំឡុងឆ្នាំ១៩៥៨ ។ វិមានឯករាជ្យបានយកលំនាំតាមប្រាសាទបាគង ក្នុងខេត្តសៀមរាប ជាតំណាងឲ្យទស្សនប្រាសាទភ្នំ ដែលបានសាងសង់នៅសតវត្សរ៍ទី៩ ដោយព្រះបាទជ័យវរ្ម័នទី១ ។
លោកសាស្ត្រាចារ្យបានបន្តថា ការសាងសង់វិមានឯករាជ្យនេះ ក៏មានការទទួលឯកភាពពីអតីតសម្តេចព្រះបាទនរោត្តម សីហនុ ដែលបង្ហាញពីស្នាព្រះហស្តរបស់ព្រះអង្គ និងដើម្បីរំលឹកដល់បុព្វបុរសខ្មែរ ដែលបានពលីជីវិតក្នុងការដណ្តើមឯករាជ្យពីបារាំង ហើយសំណង់នេះ ក៏បង្ហាញពីអច្ឆរិយភាពនៃទស្សនស្ថាបត្យកម្មខ្មែរផងដែរ ។
លោកបន្តថា ៖« ប្រាសាទវិមានឯករាជ្យជាតំណាងឲ្យវប្បធម៌ អរិយធម៌ខ្មែរ ដែលសមស្របតាមនយោបាយដឹកនាំប្រទេសនាសម័យនោះ និងក្សត្រខ្មែរយើង ត្រូវគេចាត់ទុកជាបុត្ររបស់ព្រះព្រហ្ម ដែលយកអំណាចពីឋានលើមកដឹកនាំប្រទេសជាតិ ទើបគេសាងសង់ប្រាសាទឲ្យខ្ពស់បែបនេះ » ។
លោកបន្ថែមថា ៖« ការសាងសង់វិមានឯករាជ្យ ជាការបូកបញ្ចូលនូវទស្សនៈធំៗទាំងអស់នេះ និងការបង្ហាញស្នាព្រះហស្តរបស់សម្តេចសីហនុ ដែលលោកបានយាងចុះតាមគ្រប់ខេត្ត ក្រុងទាំងអស់ ហើយចលនាឲ្យមានការបង្កើតកងកម្លាំង បង្កើតកាំភ្លើងឈើ ដើម្បីបង្ហាញកម្លាំងទាមទារឯករាជ្យ រហូតដល់បារាំងផ្តល់ឯករាជ្យភាពដល់កម្ពុជា អាចគ្រប់គ្រងដោយខ្លួនឯង » ។
ចំណែកក្បាលនាគទាំង១០០នៅលើវិមានឯករាជ្យ លោកសាស្ត្រាចារ្យ ភឿង សុភ័ណ្ឌ បានថ្លែងថា ជាទូទៅ ក្នុងទំនៀមទម្លាប់ប្រពៃណីខ្មែរយើង សត្វនាគតំណាងឲ្យទេវកថា ព្រោះយើងមិនដែលឃើញនាគរាជទេ យើងឃើញតែពស់ ។ នាគរាជនៅលើវិមានឯករាជ្យមានក្បាលចំនួន៥ និងបែរមុខទៅទិសទាំង៤ ដែលតំណាងឲ្យបារមីព្រះមហាក្សត្រគ្រប់គ្រងដឹកនាំប្រទេស ។
លោកបន្តថា ៖« ក្បាលនាគទាំង១០០បង្ហាញពីអំណាចបារមីនៃការខិតខំប្រឹងប្រែងរបស់ព្រះមហាក្សត្រ ក៏ដូចជាប្រជារាស្ត្រខ្មែរទាំងអស់ដើម្បីការពារនូវឯករាជ្យភាពជាតិរបស់ខ្មែរ » ៕
ចែករំលែកព័តមាននេះ